Maliro 3 - Mawu a Mulluku

Ollakiwa, olapa ni etiyerello

¹ Mi sika awoona ddoohoosa, koollakiwa ni ekopo ya owalli wa Mulluku.

² Aakikakhella ni okivollochiha mwiipiphini moohiwala naari vang'ono.

³ Ddawoona, aakuukutha ni nnatta niwa, aheera ddenndda moohihiyerera nllapo nittheene.

⁴ Aagugiha mwiillaaka ni nttapara naka, aakotholla makhuvaaka mattheene.

⁵ Aakaapheelliha virive veko ni ddoovoreya owaaka ddoohoosa.

⁶ Aakitathillella munipuroni na epiphi wi kikhalle wonanko athu ookhwa khallekhalle.

⁷ Aakiwallella mumpandani wi kihithawe, aakimaka ni onyolo woollemella wunchichi.

⁸ Naari kinllellaka nikavihero, khiiwa ovekella wakanko.

⁹ Aakiwallella musewu ni malluku oosema nave aavirikaniha ettilla ddaka.

¹⁰ Aakiwukila wonanko echimbalangondo apaalle wonanko mukango okiipitthenlle.

¹¹ Aakhoromaniha ettillaaka, vatulli viwa aakitthallatthalla akihiya mattave.

¹² Aakoka muuraaye, aakeesa ello yaaweerellavo echaandamale.

¹³ Aahoma murimaaka ni mipaamba dda munthumbani mwaye.

¹⁴ Kootthattuwa ello yoottheyiwa ni athu attheene, enniipa machipo ookinyaambusa.

¹⁵ Aakichiha ddoowaawa, aakiwiryiha tthuukwi.

¹⁶ Aakittakhuniha mihava, aakuupurusa muntuurani.

¹⁷ M'murimani mwaka khamurittho murendelle, ohakallalla kaawutiwalla khallekhalle.

¹⁸ Sika kaallota wi, “Ovillella waka ottheene woomalla, waatiyerella waka Apwiya woomallattho.”

¹⁹ Kinnuupuwella ddoohoosa ddaka ni ddookatamiha ddaka, ddiri wonanko yoowaawa nave nttipwi.

²⁰ Enthawi ddittheddene kinakhallella oddiganizera ddenndda nave ddinnakikukhumulla mwiilli.

²¹ Komave vookhallattho emodda kinuupuwellaami, yeeyo ennakillipiha murima.

²² Echikondi yoohisintheya ya Apwiya khewa emalla, echifundwiiwattho khenamalla.

²³ Orive ohinase ddenndda ddinnakhalla ddanaanweene vawi Apwiya tti oororomelleya wunchichi.

²⁴ Kinnallota wi, “Apwiya sika ddaaka ddittheddene, sika etiyerellwaaka eri mwa alliwaayo.”

²⁵ Apwiya tti aphaama wa ayo enatiyerella mwa alliwa, wa attheene enawaashaasha alliwa.

²⁶ Tti waphaama waatiyerella Apwiya moovillella wi yoonihe ovullusa wiwa.

²⁷ Tti waphaamattho wi muthu iireye nigoli* olliye ari musombwe.

²⁸ Muthu akeraatthi vatthi moomaalleya, Apwiya yaamureyaka nigoli.

²⁹ Apopheye ekhovaaye vanthupini, apaalle etiyerellwaaye ttuukhallavove.

³⁰ Avelleelle nrama naye wa oopaalla omuukutha, avillelle ddoomunyaambusa ddittheddene.

³¹ Vawi Apwiya khenaakhoota oorumeyelliiwa wa enthawi yoohimalla.

³² Naari yaallakaka mweekuku, koma eneerewooniha echifundo, ekaamba ya echikondiiwa yoohisintheya.

³³ Alliwa khenahakallalla omukatamiha apaalle omuhoosa arive muthu.

³⁴ Apwiya ennadduwella dda waanyingallella a mundende a veellaponi,

³⁵ dda okhoromaniha echiweruzo ya muthu vamiitthoni va Amasiva Mattheene.

³⁶ Alliwa yaakamullaka mullatu mooweha ekhove ethiyo Apwiya khenoona ddenndda?

³⁷ Ttaani anaawore olamula wi ddawi yooriyoori ddeereye, yaarimi Apwiya ehaakhullenlle ddennddo?

³⁸ Ethiyo madaliso ni otulli ddittheddene khaddinavenyera wa Amasiva Mattheene.

³⁹ Ethiyo muthu ookumi anakhupanyella tini aallakiwaka ekaamba ya machimwaaye?

⁴⁰ Hankoni niwoone ni oweesa makhallellwaahu nave nihokollweelle wa Apwiya.

⁴¹ Hankoni nitukhullelle mirima ddahu ni mattaahu wa Apwiya ooddullu.

⁴² “Hi noochimwa nave noowukila nave nyuwaano khamukhululukalle.”

⁴³ “Nyu mooniikariha mushille murima nave mooniipha moohimoriwa ethakaraka.

⁴⁴ Mooddiipitthiha ni mirapo wi mavekellwaahu ehiwore ophiyera.

⁴⁵ Moonitthattusa oonyaambuseya wonanko nddalla variyari va athu a mitundu ddimodda.”

⁴⁶ Adanaahu attheene aanaatthamella moonyaambusa nave ennaninyindulla.

⁴⁷ Noomorella mu ddawoopiha ni munllitini, mu oraheya ni woonongeya.

⁴⁸ Miitthwaaka tti mihinje dda miitthori, kaambiiwa mwa mwaana aamutthiyana, mutundwaaka ohoonongeya.

⁴⁹ Kineeromora miitthori moohiphaddera navettho moohiithuwella

⁵⁰ ophiyera Apwiya ewehe vatthi ovenyera oddullu ni owoona athwiiwa.

⁵¹ Murimaaka onnavoreya vawoonani ddinaweereyella anamwani aatthiyana a mu muzindaaka.

⁵² “Kookhalla kisayiwaka wonanko epallame ni ayo ehinna ekaamba yookhallella adanaaka.

⁵³ Yaakivokhella munllitini kihinahiye ovuma, enakivokha malluku kiri mwemmo.

⁵⁴ Murwaaka waapwina m'maaddini, kaaganiza wi okhwa wookaatamella.

⁵⁵ Nyu Apwiya, kaawinllellani kiri munllitini noowallamella.

⁵⁶ Nyuwaano mwahiiwa mawaaka awi, ‘Muhikhoowihe maarwaanyu ephuddeene kaavekellaka miyaano wi mukikavihere.’

⁵⁷ Nyuwaano mwaasusella vakhuviru kavekelleemi wi mukikavihere nave mwaallota wi, ‘Ohoove.’

⁵⁸ Nyu Apwiya, mwaakikavihera va mullatwaaka nave mwahoopolla okumaaka.

⁵⁹ Nyu Apwiya, mohoona ohoosiwa waka, sika mukeeruzelle phaama mullatwaaka.

⁶⁰ Mwahoona mmo yakihokollosellelliiwa, mmo yiiwananelliiwa wi ekeerelle.

⁶¹ Nyu Apwiya, mwahiiwa okinyaambusa wiwa, navettho yakhozekelliiwa wi ekeerelle.

⁶² Mwahiiwa onong'ona wiwa, mmo yakillotelliiwa nllapo nittheene.

⁶³ Onani, ohinase ophiyera misikuwa, enniipa machipo ookinyaambusa.

⁶⁴ Nyu Apwiya, mwaallake moollikana ni ddoolakwa ddiwa, moollikana ni mitteko yapharilliiwa.

⁶⁵ Mwaaripihe murima, ddawoona, mwaatembelele.

⁶⁶ Nyu Apwiya, muwiikarihe moowalli, mwaatthollose va ellapo yavatthi.”