Maliro 2 - Mawu a Mulluku

Osha murima wa Mulluku ekaamba ya machimo

¹ Apwiya aasha murima wunchichi, ngoonani amukhuneellelleeye mwaana aamutthiyana, Ziyoni ni epiphi. Aawutathillella vatthi oriiheya wa Ziyoni ovenyera oddullu. Va nllapo na osha murima wiwa kheyaawupuwenlle wi Israele aari wonanko voonyingallavo manyallwiiwa.

² Apwiya yahoononga mooheerella echifundo mizi ddittheddene dda Yakobo. Ekaamba ya osha murima, aakumulla mipanda dda mizinda dda mwaana aamutthiyana a Yuda. Aaddikuhella vatthi moowulliha muru omwene wa Israele ni oolamulelliiwa.

³ Apwiya yashilliiwa murima, yaakotholla masiviiwa ayo akotella Israele. Yaahokollosa nnatta niwa wooteteza, adani yaariiwa vakhuviru. Osha murimiiwa waallaka nlloko na Yakobo, wonanko munllo wawoononga ddittheddene.

⁴ Aakunga muuriiwa wonanko mudanaahu, aakunga ekhonyiiwa wonanko mudani. Aawiipha attheene ayo naawehaahu mookotella variyari va anamwani aatthiyana, Ziyoni. Owalliiwa wakhara wonanko munllo.

⁵ Apwiya aakhalla wonanko mudani, aamoononga Israele. Ahoononga enyumba ddittheddene dda omwene, mipanda ddiwa ddittheddene aadditthattusa matepe. Ahoonjerera winlla ni okhuwa variyari va mwaana aamutthiyana, Yuda.

⁶ Aapwanyulla enyumbiiwa wonanko musasa, Apwiya aamalliha o Ziyoni mallapo a ehakallallo ni a Sabata. Nave eshille murima wunchichi, aamuvevulla mwene ni allupa mukutho.

⁷ Apwiya aavevulla naari nikuwa niwa, aanikhoota nipuro niwa naweella. Aavelleella m'mattani mwa adani mipanda dda enyumbiiwa yoomwene. Mu enyumba ya Apwiya adanaayo yaakhuwa ni moohakallalla wonanko va nllapo na ehakallallo.

⁸ Apwiya aasimikiza wi yoononge mipanda dda mwaana aamutthiyana, Ziyoni. Aawulinga ni mukwiiwa nave kheyaawiivanyihalle wi ehaatthollose. Aawinlliha ookhalla vamipandani ni vasirini, attheene enahoowella nimodda.

⁹ Machiwi a muzindooyo aavuhellelleya, mikoko ddoollipa ddiwa ddookothowa ni omwaramwareya. Mwenaaye ni enduna ddaye eri wuukaporoni variyari va athu amitundu ddimodda. Khaavottho oollalleya malamulo a Mulluku, naari anamallotellaaye khenoonattho masomphenyaaye.

¹⁰ Attekweene a mwaana aamutthiyana, Ziyoni, ekeraatthille vatthi, eri khumaa! Ahiihella nthupi omuruni nave ewanre eziguduli. Anamwalli a o Yerusalemu aawaramihella miru ddiwa vatthi.

¹¹ Miitthwaaka aatopa ni winlla, murimaaka woohoowa wunchichi. Murimaaka wooddalla ni ethakaraka, ekaamba yawi athwaaka ahoonongeya. Anamwani ni avanipelleniine enimangomowa m'misewuni dda m'mizindani.

¹² Anamwanaayo enimawinllella ameewa wi, “Ethiyo yoocha ni maaddi ddiri wuuwi?” Enakoha ddenndda nngu engomowaka wonanko athu oohomiwa m'misewuni dda m'mizindani, elluwellaka vang'ono vang'ono m'mattani mwa ameewa.

¹³ We mwaana aamutthiyana, Yerusalemu, kinaallotettho tini dda weyaano apaalle wuuphwanaphwaniha ni tini? We mwaana aamutthiyana, Ziyoni, ethiyo kinuuphwanaphwanihe ni aani wi kuuhakallallihe? Vawi woonongeya wawo tti wuullupalli wonanko enyanja, ttaani anaawore wuuchiriha?

¹⁴ Anamallotellaawo yaawoonella weyaano masomphenya awoottha ni oolleka. Kheyaawoonihalle ochimwa wawo wi okhalle waphaama, koma yaawooniha masomphenya awoottha ni oohollosa.

¹⁵ Attheene oovira m'musewuni ennoopa matta mwawuunyindulla. Ennuuttheya ni wuupukusella muru, we mwaana aamutthiyana, Yerusalemu. Alliwa enallota wi, “Ethiyo muzindoolla tti olle khalle weeriwa woodalesesa, muzinda woohakallalliha ellapo yavatthi ettheene?”

¹⁶ Adanaawo attheene yoowaatthamella enuunyindulla, enuuttheya ni okhuuriha miinwiiwa. Nave ennallota wi, “Ddawoona, noowoononga! Aha! Nna sika nllapo nanitiyerelleehu! Vano noophiya nave noonoona.”

¹⁷ Apwiya aheera nnddo yaganizelliiwa wi yeera, Akwakhwaniha nnddo yallotilliiwa mwawoopopiha. Moollikana ni mmo yaganizalliiwa khalle, aawoononga moohikhalla ni echifundo, ahaakhullella wi adanaawo ehakallalle ahaanjerera wunchichi masiva a adanaawo.

¹⁸ Inllellani mookhuwa wa Apwiya, nyu mipanda dda anamwani aatthiyana, Ziyoni. Miitthori ddanyu ddiitheye, wonanko maaddi, otthaana ni mahiiyu. Muhikhalle ni enthawi yawiithuuwa, miitthori ddanyu ddihumme.

¹⁹ Venyani nave moope ekutho variyaririyari va mahiiyu, llotani ddoonikohini ddanyu ddittheddene vamiitthoni va Apwiya. Tukhullellani matta muddullu ni ovekella wa Apwiyaayo, ekaamba ya okumi wa aniinyu ayo enangomowa ni ettalla m'misewuni ddittheddene.

²⁰ Ngoonani, nyu Apwiya, wehani! Ethiyo ttaani oyo mwaambillekeenyu omuhoosa mwawi ddiidda? Ethiyo atthiyana yaattakhuneke aniiwa yaayarilliiwa? Ethiyo allupa mukutho ni anamallotella yiiphelliwa mu nipuro naweella na Apwiya?

²¹ Ang'onong'ono ni uullupalleene, mitembo ddiwa ddiri pichillipichilli m'misewuni. Anamwallaaka ni asombwaaka ahiiphiwa ni nsupada. Moowiipha va nllapo na osha murima wanyu, moowiipha moohimoriwa ethakaraka.

²² Wonanko mmo muniithanelleenyu o ehakallallo, tti mwemmo mukiithanelleenyu ddawoopiha ovenyera o embali ddittheddene. Nyu Apwiya, va nllapo na osha murima wanyu, khaavo oyo awonre othawa apaalle ovulluwa. Attheene kaayarilleemi ni waalleella, adanaaka yaawoononga.