Maliro 1 - Mawu a Mulluku

Ethakaraka mu Yerusalemu

¹ Ha! Khalle waari muzinda wooddalla ni athu, ollello ohanlle weekhiiwa. Khalle waari woovuwa variyari va mitundu dda athu, ollello wootthattuwa wonanko naamukhwelle. Khalle waari mwene aamutthiyana, ollello wootthattuwa kaporo.

² Akhallelle winllave mahiiyu mattheene, maramaaye yoohapa miitthori. Mwa attheene ayo yamukonda, khaavo naari mmodda awi amukhurumuseke. Akhwaaye attheene khenaroromelleya, attheene aatthattuwa adanaaye.

³ Athu a o Yuda aaya wuukaporoni woohoosiwa wi yaphare mutteko woovoriiha mwiilli. Enakhalla mu ellapo dda athu a mitundu ddimodda, khenna nipuro nowiithuwellavo. Attheene oowiikariha ennaaphwanya, vawi aapaneya wunchichi.

⁴ Misewu ddooyella o Ziyoni ddiniminlla, kaambiiwa khaavo ooyaawo wi allapelle va mallapo a ehakallallo. Millako ddaye ddittheddene ddoohambuwa, allupa mukuthwaaye enimiipullella. Anamwallaaye murima onimaavoreya, ddawoona, Ziyoni arina wiiwa owaawa.

⁵ Adanaaye aatthattuwa oomulamulella, awiitana ni olliye eri vaphaama, vawi Apwiya aamukakhella mu ddookatamiha ekaamba ya machimo manchichi a athwaaye. Anaaye aamuhiya, aakusiwa okaporo ni adani.

⁶ Ntitimiho nittheene noommallella, mwaana aamutthiyana, Ziyoni. Enduna ddaye ddiri wonanko amphoyo oorama munyepu, kheyaarina masiva owaathawella adaniiwa.

⁷ Va mallapo a ddookatamiha ddaye ni ohollowa waye, Yerusalemu annuupuwella ddaphaama ddittheddene nnddo aariiyena mallapo akhalle. Athwaaye yavelleelliwiiwa m'mattani mwa adani, khaarivo oomukavihera. Adanaaye yaanamuwehesesa moomunyindulla, ettheyaka omora waye.

⁸ Yerusalemu aachimwa wunchichi, mwawi ddiiddo ootthattuwa ooripihiwa. Attheene ayo yamuvaha olemu, enimamuvevulla vano, ekaamba yawi ahoona epwillimwinddaaye. Olliye enakhallella wiipullella nave anaweha okhwipi.

⁹ Ottawaaye waanooneyella vaweella, olliye khaaganizera dda otullaaye wamuhoollo. Sika ekaambiiwa omora waye waari wawoopiha, nave khaavo anamukhurumusa murima. Olliye anallota wi, “Nyu Apwiya, onani ohoosiwa waka, vawi adanaaka aapambana.”

¹⁰ Adani yaamwaakha eyuumaaye ettheene, munipuroni mwaye mwaweella mwaavollowa athu a mitundu ddimodda, ayo nyu Apwiya mwaahiihalleenyu ovollowa m'mutthukumanwaanyu.

¹¹ Athwaaye attheene enniipullella vawaashani yoocha vawi eyuumiiwa enaakakhaniha ni yoocha, wi ephwanyettho masiva. Aninlla wi, “Nyu Apwiya, kiweheni, moone mmo enakivevullelliiwa.”

¹² Ethiyo ddenndda muneesa dda shisha, attheene oovira m'musewuninyu? Ngeesani ovokha miittho, moone, vaarimi viri ddoohoosa okhwaranya ddaakanndda, ddoohoosa nnddo ekimorihelle Apwiya, mvo yakishenlliiwa murima mwawoopiha.

¹³ “Aarumiha munllo ovenyera oddullu, waavollowa ophiyera muwari mwa makhuvaaka. Aareya mullapa manyallwaaka, nave aakihokollosella mutulli. Aakihiya kiri ni ethakaraka ddinchichi, kiri oofooka nllapo nittheene.”

¹⁴ “Ddoolakwa ddaka aaddimaka vamodda wi ddikhalle wonanko nigoli.* Aaddimaka ni mattiiwa nave aaddimakellella munikohini mwaka wi masivaaka emalle. Apwiya aakivelleella wa athu, ayo kihinaaworeemi ollipanana.”

¹⁵ “Apwiya yahaanyaambusa amasiva attheene ayo yakhalla ni miyaano. Aatthukumaniha mulloko wa athu wi owoononge asombwaaka. Apwiya aamunyingallella mwaana aamutthiyana, Yuda, wonanko mmo mpesa onavotelliwiiwa.”

¹⁶ Ekaamba ya ddenndda kiniminlla, miitthwaaka ennamora miitthori, vawi ookikhurumusa murima khari vakhuviru, ookillipiha murima oorekamella. Athwaaka ehanlle weekhiiwa, vawi mudani oonigonjiha.

¹⁷ Ziyoni ootukhulla matta, koma khaavo naari mmodda oomukhurumusa. Apwiya aalamula moomuvaanyiha Yakobo wi awaatamananaaye etthattuwe adanaaye. Yerusalemu ootthattuwa ello yoonanara variyari viwa.

¹⁸ Vaavo Apwiya aheera phaama, ekaamba yawi miyaano kaawukila malamulwiiwa. Ngiiwani, nyu athu a mitundu ddittheddene, ngoonani ohoowa waka. Anamwallaaka ni asombwaaka aapharelliwa wuukaporoni.

¹⁹ Kaawiithana ookondananaka, koma alliwa aakitathilla. Allupa mukuthwaaka ni attekweenaaka aakhwa mu muzinda, mvo yaashaashiiwa yoocha wi ephwanyettho masiviiwa.

²⁰ Nyu Apwiya ngoonani, vawi koopaneya, murimaaka woohoowa wunchichi. Murimaaka wookhumamo ekaamba yawi koohuuwukilani wunchichi. M'musewuni athu erinawiiphiwa ni nsupada, navettho mpa muri okhwa.

²¹ Athu ennakiiwa kiniipullelleemi, koma khaavo ookikhurumusa murima. Adanaaka attheene yiiwalliiwa dda otullaaka, yaahakallalla ekaamba ya nnddo mweerilleenyu. Nllapo mwalonjezilleenyunne muniphiyihe, wi alliwattho ehoowe wonanko miyaano.

²² “Muweeruze va mitteko ddiwa ddittheddene ddoonanara, mwaallake wonanko mwakillakelleenyu ekaamba ya ddoolakwa ddaka ddittheddene. Kinimiipullella wunchichi, nave murimaaka woofookellaatu.”