Malaki 2 - Mawu a Mulluku

Lamulo nowaavaanyiha allupa mukutho

¹ Nyu allupa mukutho, lamulonna tti naanyu.

² Apwiya Amasiva Mattheene enallota wi, “Mwaahikiiwellellaka, mwaahivahaka olemu ni murimaanyu muttheene nnddina naka, kineerotembelela madaliswaanyu. Kahaatembelela khalle kaambiiwa khamwiiwellelle lamulo naka ni murimaanyu muttheene.

³ Ngoonani, kineerollaka edduullu ddanyu nave kineerewuumarani owiitthoni mashi a eziweto dda mikutho dda ehakallallo ddanyu nave muneerowollelliwa nimodda.

⁴ Vano muneerodduwella wi kohuuvahani lamulo nenna wi echipanganwaaka ni allupa mukutho, edduullu dda Levi, ehilepheleye. Mi Apwiya Amasiva Mattheene koollota.

⁵ Mu echipanganwaaka kaamulonjeza okumi ni murendelle nave ddenndda sika kamuvahilleemi wi akooveke. Mallapo yaayo aanavaha olemu nnddina naka ni okoova.

⁶ Malamulo awoona yaari vayanoni vaye nave khaallotille yoohilungama. Aheeta ni miyaano mwamurendelle ni mwawookowa nave ahaahokollosa anchichi o ddoonanara.

⁷ “Vawi tti mutteko wa mullupa mukutho osunga ehuddiho yawoona nave athu yaasheke malangizo ovenyera wa olliye vawi olliye sika amithenga a Apwiya Amasiva Mattheene.

⁸ Koma vano nyu allupa mukutho moohiya ettilla yawoona. Ehuddihwaanyu yohaakwakwatuwiha anchichi. Moonanariha echipangano kakeraatthihalleemi ni Levi. Mi Apwiya Amasiva Mattheene koollota.

⁹ Ekaamba yawi khemwaasungalle mawaaka nave munahuddiha mawaaka mooweha ekhove kineeroweeriha Aisraele wi yuunyaambuseni.”

Otthella ni omwallana woohaakhullelliwa

¹⁰ Ethiyo attheenehi ttiitthiihu khahiyo mmodda? Ethiyo khahiyo Mulluku mmoddave aniphatusalle attheene? Ethiyo vano kaambiiwa tini nihinaroromellanaahu mmodda ni mukhwaaye nave kaambiiwa tini nihinasungeehu echipangano eyo Mulluku akeraatthihalleeye ni makhollwaahu?

¹¹ Athu a o Yuda kheroromelleye nave aheera yoonanara mu Yerusalemu owaaka ellapo ettheene. Aaripiha enyumba yookondiwa ni Apwiya vawaatthellani atthiyana oollapella mulluku eelleto.

¹² Arive muthu aweera ddenndda Apwiya emuvenyihevo variyari va athu a Yakobo. Sika yaalla ehikhallevottho voovelleellani mikutho wa Apwiya Amasiva Mattheene.

¹³ Nave emodda mweerilleenyu tti yawi moonipwiniha nikuwa na Apwiya ni miitthori, winlla ni woopa ekutho ekaamba yawi khenaakhullella mikutho munavelleelleenyu wa alliwa.

¹⁴ Nave munnakoha wi, “Kaambiiwa tini ehinaddaakhullelliiwa?” Tti ekaamba yawi Apwiya yaakhallella omboni echipangano ya variyari va weyaano ni mwaariyo a esombwaawo wa oyo ohiroromelleyeewe naari ari mukhwaawo ni mwaariyo a echipangano.

¹⁵ Ethiyo Mulluku khaaweeriheni wi mukhalle mwiilli mmodda owaaka munepa ni alliwa? Ethiyo yoolingaaye yaari tini vaweerani ddenndda? Yaari yawi mukhalle ni anamwani ayo eri athu a Mulluku. Sika onesesani wi ahikhallevo naari mmodda a nyuwaano oyo oohiroromelleya wa mwaariye.

¹⁶ Apwiya Mulluku a Israele enallota wi, “Kinniitana ni omwallana nave ni muthu aweera yoonanara yeella wa mwaariye. Sika onesesani wi ahikhallevo naari mmodda a nyuwaano oyo oohiroromelleya wa mwaariye.”

Nllapo na echiweruzo

¹⁷ Mohaatopiha Apwiya ni ddoollota ddanyu koma munakoha wi, “Naatopihalle mwawiidde?” Mwaatopihalle voollotani wi, “Arive muthu aneera yoonanara tti aphaama vamiitthoni va Apwiya nave alliwa ennahakallallana.” Apaallettho vookohani wi, “Ari wuuwi Mulluku eechilungamo?”