Malaki 1 - Mawu a Mulluku

¹ Alla sika mawu a Apwiya oollota dda Israele oweella mwa Malaki.

Ohithokoza wa Aisraele va echikondi ya Apwiya

² Apwiya enallota wa athwiiwa wi, “Kinnuukondani nyuwaano.” Koma alliwa yahaakhulla wi, “Ethiyo moonihalle echikondaanyu va hiyaano mwawiidde?” Apwiya yahaakhulla wi, “Esau ni Yakobo yaari muthu ni mwanamunne koma kamukondille Yakobo ni edduullu ddaye

³ nave kahiitanana Esau ni edduullu ddaye. Kaatthattusa miyaango ddaye matepe ni ovelleella yoohallanaaye wa akhatwe a mu echipululu.”

⁴ Naari Aedomu, edduullu dda Esau, ellote wi, “Noonyenyiwa koma nineeromakattho m'matepenimmo. Vano Apwiya Amasiva Mattheene eneerewaakhulla wi, ‘Ahiyeni yamakettho, miyaano kineerokumullattho.’ Vano athu eneerewaaromolla wi, ‘Ellapo yoonanara’ navettho ‘Ellapo ya athu ooshelliwa murima ni Apwiya wa enthawi yoohimalla.’

⁵ “Miitthwaanyu eneerewoona ddenndda nave muneerollota wi, ‘Apwiya tti amasiva naari otte wa Israele.’ ”

Apwiya enaahumullulla allupa mukutho

⁶ Apwiya Amasiva Mattheene enallota wa allupa mukutho wi, “Anamwani ennaavaha olemu makhollwiiwa nave mullupa mutteko apwinnya. Mi tti ttiitthaanyu, ethiyo kaambiiwa tini muhinakooveenyu? Mi tti pwiinyu, ethiyo kaambiiwa tini muhinakivaheenyu olemu? Munnakinyaambusa komattho munnakikoha wi, ‘Ethiyo nuunyaambusalleni mwawiidde?’

⁷ Munnakinyaambusa voovelleellani yoocha yooripihiwa va nikuwa naka. Koma nyuwaano munakoha wi, ‘Ethiyo niniripihalle mwawiidde?’ Kinuulleellani wi mooniripiha vooneesani noohikhalla ni mutteko.

⁸ Ethiyo munaganiza wi kheviri yoonanara voovelleellani wa miyaano eziweto ddoohoona, ddoorakalla apaalle ddoovoriiwa? Munaganiza wi endunaanyu ttuuwuuhakallallellani apaalle oweerellani echifundo mwavelleella echiweto yawi ddiidda? Mi Apwiya koollota. Mi Apwiya Amasiva Mattheene koollota

⁹ Vano nyu allupa mukutho, muvekeni Mulluku wi aneerelle echifundo. Ethiyo ni emphaso ddiri m'mattani mwanyunndda, olliye ttuuweerellani echifundo? Mi Apwiya Amasiva Mattheene koollota.”

¹⁰ Apwiya Amasiva Mattheene enallota wi, “Ttaani anaawalle mullako wa enyumbaaka wi muhikharihelle nivuddo munllo wa va nikuwa naka. Nginahakallalla ni nyuwaano nave ngaakhella ddoovelleella ddanyu.

¹¹ Ovenyera wookhuma nndduwa ophiyera woovollowa nndduwa nnddina naka ninaakhalle nuullupalli variyari va mitundu ddittheddene. Va nirive nipuro ennakoosella lubani* nave ennavelleella mikutho ddoopatuleya vawi nnddina naka tti nuullupalli variyari va mitundu dda athu ddittheddene. Mi Apwiya Amasiva Mattheene koollota.

¹² Koma munnaripiha nnddina naka voollotani wi nikuwa naka khaninna mutteko voovelleellani yoocha yoonyaambuseya.

¹³ Ngoonani, munallotattho wi, ‘Ddenndda tti ddootopiha!’ Nave munnanyemulla. Munavelleella enama yawiiya apaalle yoorakalla apaallettho yoovoriiwa. Ethiyo munaganiza wi miyaano ttuuddaakhella ovenyera wa nyuwaano?

¹⁴ Vano atembeleliwe muthu oolleka oyo anavelleella wa miyaano mukutho wa echiweto yoohikhalla ni mutteko komave arina mwa eziweto ddaye yaphaama eyo alonjezilleeye okivaha! Vawi miyaano tti mwene muullupalli nave athu a mitundu ddittheddene ennakoova.” Mi Apwiya Amasiva Mattheene koollota.