Luka 9 - Mawu a Mulluku

Yesu anaarumiha oohuddera khumi ni eelli

¹ Yesu aawiithana oohuddera khumi ni eelli vamodda, aavaha masiva ni olamulello wookhumiha minepa ddoonanara ni woochiriha ereta.

² Nave ahaarumiha wi yallalleye dda omwene wa Mulluku ni waachiriha oovoriiwa.

³ Ahaalleella wi, “Muhikuse ello voolendonoolla naari ekopo yaweetana, nthumba na voolendoni, yoocha, makobiri naari malaya mamodda.

⁴ Mpa mutthemwene munaakhelliweenyumo, mwakhalleke mwemmo, ophiyera mwavenyemo.

⁵ Nave athu yaahiwaakhellaniwoni, venyaniwoni nave muttatthe nthupi omanyalloni wanyu. Yoolla okhalle omboni wawi mohaakhoota ekaamba ya nnddo yenriiwa.”

⁶ Sika oohudderaalle yaatimulla yeeteeta m'mizi mutthemwene, ellalleyaka othenga waphaama nave yaachirihaka athu virive veko.

Okhupanya wa Herode

⁷ Vano Herode,* o Galileya, iiwalleeye ddittheddene ddeereyennddo ddaamuhalleelliha vawi athu amodda yaallota wi Yohane Oobatiza sika avenyille wa ookhwa.

⁸ Amodda yaallota wi namallotella Eliya ohooneya nave amodda yaallota wi mmodda a anamallotella akhalle sika avenyille.

⁹ Koma Herode aallota wi, “Kaamuphadda muru Yohane koma muthu yoolla ttaani kiniiwaami ddawi ddiidda?” Vano aapaallesesa omoona Yesu.

Yesu anachiha mulloko wa athu muullupalli

¹⁰ Vano amurummwa a Yesu yahokollowilliiwa yaamulleella Yesu ddittheddene yenriiwa. Ahaakusa attheenaayo ayaana wa weekhiiwa o etawoni yooromolliwa Betisaida.

¹¹ Athu yiiwalliiwa ddenndda, yaamuthwara. Aawaakhella, allota dda omwene wa Mulluku nave ahaachiriha athu oovoriiwa.

¹² Waari nndduwa nivollowaka, oohuddera khumi ni eelli yawiilliiwa wa Yesu ellota wi, “Mwaalleelle athu eye m'mizi ddawaatamella wi yaashe yoocha ni vookona vawi mva tti vahakani va weekhiihu.”

¹³ Yesu aallota wi, “Nyu mwaavahe yoocha.” Yahaakhulla wi, “Nirina mitthi dda buledi mitthanu ni ehomba piilli. Munapaalla niye naakullelle yoocha athu attheenaalla?”

¹⁴ (Vawi vaakhalla allopwana 5,000.) Nave Yesu ahaalleella oohudderaaye wi, “Akeraatthiheni athwaayo m'millokoni dda athu 50.”

¹⁵ Vano oohudderaalle yahaakeraatthiha athu attheenaalle vatthi.

¹⁶ Yesu aakusa mitthi dda buledi mitthanu ni ehomba piilli, aweha oddullu, avekella omuthokoza Mulluku. Aameyameya nave awinnya oohuddera wi evelleelle wa athwaayo.

¹⁷ Attheene yaacha evona nave oohuddera yaatotella ddoohalla ddooddalla mitaanga khumi ni miilli.

Petro anasimikizella dda Yesu

¹⁸ Nllapo nimodda Yesu avekelleeye yeekhaaye oohudderaaye yaawa wa olliye nave ahaakoha wi, “Athu enallota wi miyaano kiri aani?”

¹⁹ Yaamwaakhulla wi, “Amodda eni Yohane Oobatiza, amodda eni namallotella Eliya nave amodda eni mmodda a anamallotella akhalle sika avenyille.”

²⁰ Vano ahaakoha wi, “Nyu munihina miyaano ttaani?” Petro ahaakhulla wi, “Nyu tti Mesiya* oovenyera wa Mulluku.”

²¹ Nave Yesu ahaalamulella moollipa wi, “Muhimulleelle arive muthu dda miyaano.”

Yesu anallota wowaamba dda okhwa waye

²² Yesu aallotattho wi, “Tti woophwanella wi mi, Mwaana a Muthu, kihoosiwe wunchichi ni okhootiwa ni attekweene a Ayuda,* allupa mukutho uullupalli ni ahuddihi a malamulo.* Kineerewiiphiwa koma vavira mallapo mararu kineerovenyihiwa wa ookhwa.”

²³ Nave aallota wa attheenaayo wi, “Muthu aapaallaka okithwara iikhoote yeekhaaye, atukhulle mutandaaye nllapo ni nllapo nave akithwareke miyaano.

²⁴ Vawi muthu aapaallaka ovullusa okumaaye, eneerowutathilla nave atathilla okumaaye kaambiiwa annakithwara miyaano, aneerewuuvullusa.

²⁵ Muthu anaapindulevo tini aakhella ellapo yavatthi ettheene atathilla apaalle woononga okumaaye?

²⁶ Muthu aawulliwaka muru ekaamba ya miyaano ni mawaaka vano mi Mwaana a Muthu kineerowulliwa muru ni olliye kaawaaka mu ntitimiho naka ni ntitimiho na Attiitthaaka ni angelo aweella.

²⁷ Ddawoona, kinimuulleellani wi, aakhallavo amodda vaava khekhwa ophiyera yoonille omwene wa Mulluku.”

Otthattuwa wa ekhove ya Yesu

²⁸ Viviralle mallapo matthanu ni mararu allotille ddenndda, Yesu ahaakusa Petro, Yohane ni Yakobo awellana vaddullu va mwaango wi yavekelle.

²⁹ Avekellaka, wooneya wa ekhovaaye waatthattuwa nave ddoowara ddaye ddaatthattuwa ddikhalla ddaweella mbee.

³⁰ Nave enthawi yeeyo athu eelli yaawa enallota ni olliyooyo. Athu yaalla yaari ayo yakhwille khalle, Mose ni Eliya.

³¹ Yahooneya mu ntitimiho na oddullu nave yaallota ni Yesu dda okhwa waye nko onaakwakhwanihelliwe o Yerusalemu.

³² Enthawi yeeyo Petro ni akhwaayaayo yaari ekhwillevo ni ekhove. Nave yavenyilliiwa yahoona ntitimiho na Yesu nave athu eelli yiimenlle ni Yesu.

³³ Athwaalle yamuhiyalliiwa Yesu, vano Petro aallota ni Yesu wi, “Apwiya, ddookhalla phaama wi hiyaano niri vaava, nuutthipellelleni misasa miraru vaava; mmodda wa nyuwaano, mmodda wa Mose nave mmodda wa Eliya.” Koma Petro khaadduwenlle eyo alloteeye.

³⁴ Allotaka ddiiddo, waawa murapo waakhuneella ni muuthuuchiiwa. Vano oohudderaayo yahoova mvo murapooyo waakhuneelliwa

³⁵ Vano mawu oovenyera m'muraponimmo yaallota wi, “Olla sika Mwanaka ootthoolliwa. Mwiiwellelleni!”

³⁶ Mawaalle yamanlliiwa, oohudderaayo yahoona wi Yesu ahanlle yeekhaaye. Nave kheyaallonte ello enthawi yeeyo naari omulleella muthu dda ddeko yoonilliiwannddo.

Yesu anamuchiriha musombwe a munepa woonanara

³⁷ Osaka wene Yesu ni oohuddera ararwaayo yakitthalliiwa m'mwaangonimmo, Yesu aakumana ni mulloko wa athu anchichi.

³⁸ Vano muthu mmodda ovenyera m'mullokonimmo aakhuwa wi, “Ahudduhi, kinimuuvekani, mooneni mwanaka, ari mmoddave yoolla!

³⁹ Wiilliwiilli munepa woonanara onnavollowa mwa olliye nave onnamweeriha wi akhuweke. Weeddiiddo onnamukuhella vatthi angomowa, vano annakhuma niphoru owanoni. Nave khonamuhiya shisha ophiyera omuphoriihalle.

⁴⁰ Kahaaveka oohudderaanyu wi ekhumihe munepa koma kheyaawonre.”

⁴¹ Yesu ahaakhulla wi, “Nyu athu a mbado woohikhulupililoolla ni woonanara! Kinaakhalle ni nyuwaano ophiyera niini? Kinuuvillelleni ophiyera niini? Wannani musombooyo wa miyaano!”

⁴² Nave mwaanooyo aweeye, munepa woonanarooyo waamukuha vatthi omukomolla. Vano Yesu aasimwella munepa woonanarooyo, amuchiriha mwaanooyo nave aamuvelleella wa attiitthinnya.

⁴³ Athu attheene yaattikhina ni masiva muullupalli a Mulluku. Athu ettikhinaka ni ddeko ddittheddene Yesu addeereeyennddo, Yesu ahaalleella oohudderaaye wi,

Yesu anallota waneepiilli dda okhwa waye

⁴⁴ “Muhitiwalle kinapaalleemi wi kuulleelleni vawi mi Mwaana a Muthu kineerovelleelliwa wa athu.”

⁴⁵ Koma oohudderaayo kheyaawiiwesesa mawu yaalla kaambiiwa ottaphullella wiwa waavitthiwa wa alliwaayo. Koma yahoova wi emukohe dda mawu yaalla.

Muullupalli ttaani

⁴⁶ Ovaanyihana wahaambeya va oohuddera ddawi muullupalli ttaani mwa attheenaayo.

⁴⁷ Yesu aadduwella wi yaamavaanyihana, sika aamukusa mwaana amwiimesa vakhwipi vaye.

⁴⁸ Allota wi, “Nave muthu anamwaakhella mwaanoolla ekaamba ya miyaano, anakaakhella miyaano. Nave oyo anakaakhella miyaano, anamwaakhella oyo akirumalle miyaano. Vawi oyo ari mung'onong'ono mwa attheenenyu yooyo sika muullupalli.”

Oohivaanyihana ni nyuwaano anniiwanana ni nyuwaano

⁴⁹ Yohane aamulleella Yesu wi, “Ahuddihi, naamoona muthu akhumihaka minepa ddoonanara vooromollani nnddina nanyu. Nave naheesa omuhiiha kaambiiwa khaari mmodda a mullokwaahu.”

⁵⁰ Koma Yesu aamulleella ni oohuddera akhwaayaayo wi, “Muhinamuhiiha vawi muthu ahinanivaanyiha anniiwanana ni hiyaano.”

Okhootiwa wa Yesu o Samariya

⁵¹ Mallapo yaatamelliiwa awi Yesu awellihiwe aye oddullu, aaganizera wi aye o Yerusalemu.

⁵² Vano ahaaruma athu amodda wi ehoolle. Yaavollowa m'muzi mwa Asamariya* wi yamukhozere nipuro naye.

⁵³ Koma athu a wenko kheyaamwaakhenlle kaambiiwa aya o Yerusalemu.

⁵⁴ Oohudderaaye, Yakobo ni Yohane, yoonilliiwa wi Yesu khaakhelliwe, yaallota wi, “Apwiya, munapaalla wi niithanihe munllo okitthe oovenyera oddullu wi owiiphe athu yaalla?”

⁵⁵ Koma Yesu aarukunuwa aahumullulla oohudderaayo.

⁵⁶ Sika Yesu ni oohudderaaye yaaya m'muzi mmodda.

Dda omuthwara Yesu

⁵⁷ Yesu ni oohudderaaye yaariiwa m'musewuni yeetaka, muthu mmodda aallota wa Yesu wi, “Kineerewuuthwarani orive weko munayeenyu.”

⁵⁸ Yesu aallota wi, “Akhatwe aakhalla ni milliha ddiwa navettho epallame ddookhalla ni emphuru ddiwa koma mi, Mwaana a Muthu, nginna naari voohameella murwaaka.”

⁵⁹ Aallotattho wa muthu mmodda wi, “Kithware.” Nave muthooyo aallota wi, “Apwiya, mukaakhullelle wi kaambe waavittha attiitthaaka.”

⁶⁰ Koma Yesu ahaakhulla wi, “Waahiye ookhwa yaavittheke ookhwa akhwiiwa. Koma khawe waallalleye dda omwene wa Mulluku.”

⁶¹ Muthu mmoddattho aallota wi, “Kineerewuuthwarani, Apwiya koma mukaakhullelle wi kaambe ollaanya nibanja naka.”

⁶² Koma Yesu aallota wi, “Khaavo muthu anallima awehaka mutulli anaphwanella mu omwene wa Mulluku.”