Luka 8 - Mawu a Mulluku

Atthiyana ayo yaamuthwanre Yesu

¹ Vatulli viwa Yesu aheetella mu matawoni ni m'mizi, allalleyaka othenga waphaama wa omwene wa Mulluku. Oohudderaaye khumi ni eelli yaamuthwara,

² navettho atthiyana anchichi. Atthiyana amodda yaachirihiwa o ereta ddiwa ni minepa ddoonanara: Mariya (ooromolliwa Magadalena) oyo mwaakhumihiwe minepa ddoonanara dditthanu ni miilli,

³ Yoana, mwaariye a Kuza kapitawo a oophara mutteko mu enyumba ya Herode* ni Suzana ni atthiyana amodda anchichi yaamurumeyella Yesu ni oohudderaaye ni eyuumiiwa.

Niphwanaphwaniho na oomidda

⁴ Athu anchichi oovenyera o matawoni mattheene yaanawa wa Yesu. Nave mulloko wa athu muullupalli otthukumanne, Yesu ahaalleella niphwanaphwaniho wi,

⁵ “Enthawi emodda waakhalla muthu ayiille woomidda mmiddo. Amiddeeye mmiddooyo, mmodda wamorenlle muttilla nave waanyingalliwamo nave epallame ddaawa ddiwuchamo.

⁶ Mmodda wamorenlle va ethaya ya malluku koma wamenlliiwa wahumma kaambiiwa ethayeeyo kheyaarina munyezi.

⁷ Mmiddo mmodda wamorenlle variyari va miiwa, miiwannddo ddahunnuwa ddikhwaranya ddoomella dding'onong'ononnddo nave ddaaddikhuneella.

⁸ Mmiddo mmodda wamorenlle va ethaya yaphaama nave ddoomellannddo ddahunnuwa niwimma ezipaso 100.” Vano Yesu amallihalle ollota nndda aallota mookhuwa wi, “Ngiiwani vano mwaarina maaru awiiwana!”

Yoolinga ya maphwanaphwaniho

⁹ Oohuddera a Yesu yaamukoha ottaphullella wa niphwanaphwanihonno.

¹⁰ Nave ahaakhulla wi, “Wa nyuwaano woovahiwa odduwella ddookhuweya dda omwene wa Mulluku koma wa alliwaayo kinaallotella m'maphwanaphwanihoni wi woona yooneke koma ehidduwelleke nave wiiwa yiiweke koma ehiiweseseke.

Ottaphullella wa niphwanaphwaniho na oomidda

¹¹ “Ottaphullella wa niphwanaphwaniho nenna tti nngu, mmiddooyo sika mawu a Mulluku.

¹² Mmiddo wamorenlle muttillooyo onaphwanaphwana ni athu ayo yiiwalle mawu a Mulluku. Koma Satana annawa awaakha m'murimani mwiwa mawu a Mullukwaayo wi ehikhulupilile navettho ehivullusiwe.

¹³ Mmiddo oyo wamorenlle va ethaya ya vamallukuni tti athu ayo enaakhella moohakallalla mawu a Mulluku koma khenna misisi dduullupalli. Vawi enakhulupilila enthawi yooyeva koma va enthawi ya weesiwa, ennahiya enthawi yeeyo.

¹⁴ Mmiddo wamorenlle variyari va miiwa onaphwanaphwana ni athu ayo yiiwalle mawu a Mulluku. Koma vatulli viwa ennakhuneelliwa ni ddookhupanyiha ni ddoohakallalliha okumi ni okonda eyuuma. Nave ezipaso ddiwa khaddinawaraalla.

¹⁵ Koma mmiddo wamorenlle va ethaya yaphaama onaphwanaphwana ni athu ayo yiiwalle mawu a Mulluku nave enaasunga m'murimani woororomelleya ni waphaama. Enallipihella ophiyera yimmalle ezipaso.”

Enyali yookhuneelliwa ni muno

¹⁶ “Khaavo muthu anakhariha enyali, ayikhuneella ni muno apaalle ayihiya vatthi va bedi. Koma anayihiya va yoohiyavo enyali wi athu ayo enavollowa mpammo yoone owalanko.

¹⁷ “Vano erive ello yawiipittheya eneerewuupullulliwa navettho erive yookhuweya eneerodduwanyeya nave eneerokhalla vaweella.

¹⁸ “Vano chenjerani ni mmo muniiwellaanyu mawu vawi muthu arina ello aneerovahiwa yawaanjerera. Koma muthu oyo ahinna ello aneerewaakhiwa naari eng'onong'ono eyo anaganizeeye wi ookhallana.”

Amennya ni asinne a Yesu

¹⁹ Vano amennya ni asinne a Yesu yaawa vanipuroni mvo Yesu aariiye koma ekaamba ya mulloko wa athu kheyaaworille ophiyera vaariyemvo.

²⁰ Muthu mmodda aamulleella Yesu wi, “Amennyu ni asinninyu yiimenlle vaattemva nave enapaalla wi ewooneni.”

²¹ Koma Yesu aallota ni mullokooyo wi, “Amoowaaka ni asinnaka tti yaayo eniiwa mawu a Mulluku nave enawiiwellella.”

Yesu anamaalliha ephevo yuullupalli

²² Nllapo nimodda Yesu aawella mukallawani ni oohudderaaye allota wi, “Hankoni nillapuwe niye vakhopella va enyanja.” Sika yaatimulla.

²³ Yallapuwiiwa, Yesu aakona. Moorurumusa ephevo yawoopiha yahoopa va enyanjamvo nave ekallaweeyo yaaddalla maaddi wawi yahanlle vakhuviru opwina.

²⁴ Oohudderaayo yaawa wa Yesu emuvenyiha, ellota wi, “Apwiya, Apwiya! Nihanlle vakhuviru okhwa!” Yesu aavenya asimwella ephevweeyo ni mafundaayo, ddaamalla nave ddaakhurumuwa.

²⁵ Vano aallota wa oohudderaayo wi, “Echikhulupilwaanyu eri wuuwi?” Yahoova ni ottikhina ekohana wi, “Muthu yoolla tti awiidde? Vawi annalamulella naari ephevo ni maaddi nave ddinnamwiiwellella!”

Yesu anamuchiriha muthu ni a minepa ddoonanara

²⁶ Yesu ni oohudderaaye yaheeta mu ekallawa eya o echigawo ya athu a o Gadara eyo enawehana ni echigawo ya Galileya.

²⁷ Yesu aphiyalleeye mukhwipi mwa enyanja aakumana ni muthu a o etawoni wenko ookhalla ni minepa ddoonanara. Wa enthawi yoorekama muthu yoolla aakhalla oohiwara nave khaakhallattho mpa koma akhalla m'makhunguni mmo mwavitthiwa athu ookhwa.

²⁸ Amoonilleeye Yesu, aakhuwa akokhora vamiitthoni vaye nave aallota mookhuwa wi, “Yesu, Mwaana a Mulluku Muullupalli! Nuullikalleni tini nyuwaano? Kinimuuvekani, muhikillake miyaano!”

²⁹ Aallotille ddenndda kaambiiwa Yesu aari alamulenlle munepa woonanarooyo wi okhumemo mwa muthooyo. Erive enthawi munepa woonanarooyo waanamuvollowa. Nave naari muthooyo amakiwe ni onyolo miwono ni manyallo wi aweheriwe phaama aanaphadda amakelliwenaayennddo. Enthawi yeeyo munepa woonanarooyo waanamuhoollella wi aye ohakani.

³⁰ Yesu aamukoha wi, “Nnddina nawo ttaani?” Muthooyo ahaakhulla wi, “Nnddina naka tti Mulloko.” Aallotille ddenndda kaambiiwa mulloko wa minepa ddoonanara waavollowa mwa olliyooyo.

³¹ Minepa ddoonanarannddo ddaamuveka Yesu wi ahilamulelle wi ddakhuma mwa muthooyo ddavollowe mu nlliti noowallamellesesa.*

³² Vaavo vaakhalla mulloko muullupalli wa ekumba ddichihiwaka. Vano minepa ddoonanarannddo ddaamuveka Yesu wi ddavollowe mu ekumbannddo nave ahaakhullella.

³³ Sika ddaakhuma mwa muthooyo ddavollowa mu ekumbannddo. Vano ekumbannddo ddaathamaka ni okitthella munyanjanimmo nave ddaamorellamo ddipwina m'maaddinimmo.

³⁴ Oochiha ekumbannddo yoonilliiwa ddeereyillennddo yaathawa eya yavuwiha epilli o etawoni ni m'mizi ddinchichi.

³⁵ Athu yaakhuma wi yoone yeereyeeyo. Yaphiyalliiwa wa Yesu, yaamoona muthu oyo minepa ddoonanara ddaakhumalle mwa olliyooyo akeraatthille vakhuviru ni Yesu. Aari awanre phaama, ari ni maganizo aphaama. Nave attheenaayo yahoova.

³⁶ Yoonille ddittheddenaayo yahaalleella athu amodda mmo muthu ookhalla ni minepa ddoonanarooyo aachirihiwelleeye.

³⁷ Vano athu attheene a o echigawonko yaamuveka Yesu wi avenyewo kaambiiwa yaamoova wunchichi. Sika Yesu aawella ekallawa wi ahokollweelleke okhopella.

³⁸ Muthu akhumihiwe minepa ddoonanaroolle aamuveka Yesu wi amuthware. Koma Yesu aamuhokollosa amulleella wi,

³⁹ “Rowa owaninyu nave waalleelle nnddo Mulluku aweerelleeye.” Nave muthooyo aaya m'muzindani mutthemwene aalleellaka nnddo Yesu aamweerelleeye.

Yesu anamuchiriha mwaana aamutthiyana a Yairo ni mutthiyana mmodda

⁴⁰ Yesu ahokollwelleeye vakhopella va enyanja, mulloko wa athu waamwaakhella vawi athu attheene yaamamutiyera.

⁴¹ Vano muthu mmodda nnddina naye Yairo aaphiya. Aari muttekweene a mu enyumba yamavekello. Aakokhora vakhuviru ni Yesu nave amuveka wi aye owaniwa.

⁴² Aamuvekille yeella kaambiiwa aakhalla ni mwaana aamutthiyana mmoddave a miyakha khumi ni miilli oyo aari vakhuviru okhwa. Vano Yesu ayeeye wenko, mullokooyo waanamupanikiza ekaamba yawaata.

⁴³ Nave vaavo vaakhalla mutthiyana oohoowa ni ereta yoohikhumamo oonille mweeri wa miyakha khumi ni miilli. Aallivella ddeko ddittheddene aariiyena wa allupa murete koma khaarivo aworille omuchiriha.

⁴⁴ Aawa otulli wa Yesu attannya mukhwipi mwa yawiikhuneellaaye. Nave enthawi yeeyo ereta yoohikhumamo oonille mweeri yaamalla.

⁴⁵ Yesu ahaakoha wi, “Akittannye ttaani?” Athu attheene yaaruna nave Petro aallota wi, “Apwiya, mulloko muttheenoolla wowaapheellani nyuwaano nave onimuupanikizani.”

⁴⁶ Nave Yesu aallota wi, “Muthu mmodda ookittannya vawi kohoona m'mwiillini mwaka wi mamodda a masivaaka oochiriha aakhumamo”

⁴⁷ Mutthiyanoolle oonilleeye wi khaaworille wiipittha aawa atthukumellaka nave aakokhora vamiitthoni va Yesu. Nave vahoollo va athu attheene aallota ekaambiiwa aamuttannyilleeye Yesu ni wi aachirihiwa enthawi yeeyo.

⁴⁸ Yesu aamulleella wi, “Echikhulupilwaawo yoohuuchiriha, rowa ni murendelle.”

⁴⁹ Yesu allotaka ddenndda, muthu mmodda aaphiya oovenyera o enyumba ya Yairo, amulleella Yairooyo wi, “Mwanawo aamutthiyanoolle ookhwa. Ohivirellelle waakatamiha Ahuddihaalla.”

⁵⁰ Koma Yesu ahiiwa nave aamulleella Yairo wi, “Ohoove koma weeremoona okhulupilila nave aneerochirihiwa.”

⁵¹ Yaphiyalliiwa o enyumba ya Yaironko, Yesu aavollowa ni Petro, Yohane ni Yakobo ni attiitthinnya ni amennya a mwaanooyo. Koma khaawaakhullenlle athu amodda wi evollowettho.

⁵² Athu attheenaayo yaaminlla ni woopa ekutho koma Yesu aallota wi, “Muhinlle vawi mwaanoolla khakhwille koma animakona!”

⁵³ Athu attheene yaamuttheya mweepewe kaambiiwa yaanadduwella wi ookhwa.

⁵⁴ Vano Yesu aamuphara nnatta naye amwiithana wi, “Mwaanawe, venya!”

⁵⁵ Vano aakhallattho ni okumi, aavenya enthawi yeeyo. Nave Yesu aalamulella wi emuvahe yoocha.

⁵⁶ Makhollwaayo yaattikhina koma Yesu ahalamulella wi ehimulleelle muthu ddeereyennddo.