Luka 6 - Mawu a Mulluku

Nikoho na dda nllapo na Sabata

¹ Nllapo nimodda na Sabata Yesu ni oohudderaaye yaheeta variyari va emata ddimodda dda tirigu. Oohudderaaye yahaamba okhoddolla makalla a tirigu, enatikitha ni mattiiwa nave enamucha tirigooyo.

² Nave Afarisi* amodda, yahaakoha oohudderaalle wi, “Kaambiiwa tini muneereenyu ddoohaakhullelliwa ni malamulwaahu voopharani mutteko va nllapo na Sabata vookhoddollani makalla a tirigu?”

³ Yesu ahaakhulla wi, “Khamweerengille nnddo Davide enreeye enthawi yeelle olliyooyo ni akhwaaye yavolliwiiwa ettalla?

⁴ Davide aavollowa mu enyumba ya Mulluku, amuchamo buledi oovelleelliwa wa Mulluku naari malamulo kheyaakhullelle wi olliyooyo amuche. Allupa mukuthove sika enaakhullelliwa omuchamo buledi yoolla. Nave ahaavahattho akhwaaye.”

⁵ Yesu aamallihella ni ollota wi, “Mi Mwaana a Muthu sika kiri mwaneena a nllapo na Sabata.”

Muthu a nnatta noorakalla

⁶ Va nllapo na Sabata nimodda Yesu aavollowa mu enyumba yamavekello aahuddiha. Muthu a nnattanatta noorakalla aarittho mwemmo.

⁷ Ahuddihi a malamulo* amodda ni Afarisi amodda yaamweetellella Yesu wi yoone eeki amuchirihe muthooyo va nllapo na Sabata wi emphwanyelle yoomwiipella mullatu.

⁸ Yesu aadduwella maganizwiiwa nave allota wa muthooyo wi, “Ngawa wiimelle wuno wi arive muthu awooneke.” Sika muthooyo aavenya iimella vaavo.

⁹ Vano Yesu aallota wi, “Kinuukohani nyuwaano, malamulo enanaakhullella weera tini va nllapo na Sabata? Weera ddaphaama apaalle weera ddoonanara? Omvullusa muthu apaalle omwiipha?”

¹⁰ Ahaaweha attheenaayo, vano aallota wa muthu oorakalla nnattoolle wi, “Okolla nnatta nawo.” Ahookolla nave naachirihiwa.

¹¹ Ahuddihi a malamulo ni Afarisi yaasha murima yaamba okambirana yawi emweerelle Yesu.

Yesu ahaatthoolla amurummwa khumi ni eelli

¹² Nllapo nimodda Yesu aawella m'mwaangoni wi avekelle nave aakhallawo mahiiyu avekellaka wa Mulluku.

¹³ Wasilliiwa, aawiithana oohudderaaye nave aatthoollavo khumi ni eelli, ayo aaromonlleeye wi amurummwa.

¹⁴ Alla sika amurummwaayo: Simoni, (oyo Yesu amuvahilleeye nnddina nawi Petro) ni mwanamunne Andreya, Yakobo ni Yohane, Filipo* ni Bartolomeyu,

¹⁵ Mateyu ni Tomasi, Yakobo mwaana a Alifeyu ni Simoni ooromolliwa Zelote,*

¹⁶ Yudasi mwaana a Yakobo ni Yudasi Isikariyoti oyo amuvelleenlle Yesu.

Ohuddiha ni ochiriha wa Yesu

¹⁷ Yesu akitthalleeye m'mwaangonimmo ni amurummwaayo, ahiimella muhito mwa mwaango ni mulloko muullupalli wa oohuddera. Mulloko muullupallittho wa athu oovenyera mu Yudeya mutthemwene ni o Yerusalemu ni mukhwipi mwa enyanja mmo mwaari mizinda dda Tiro ni Sidoni yaari vaavo.

¹⁸ Yawiille wi emwiiwelle ni ochirihiwa ereta ddiwa. Athu ayo yahoosiwa ni minepa ddoonanara yaawattho nave yaachirihiwa.

¹⁹ Athu attheene yaapaalla wi emuttannye vawi masiva yavenyera mwa olliyooyo yaanamuchiriha arive muthu.

Oodalisiwa ni ootulli

²⁰ Yesu ahaaweha oohudderaaye nave allota wi, “Oodalisiwa tti nyuwaano muri oohoowa, vawi munnahakallalla ni madaliso a omwene wa Mulluku.

²¹ Oodalisiwa tti nyuwaano munavolliwa ettalla ollello, vawi muneerovona. Oodalisiwa tti nyuwaano muninlla ollello, vawi muneerottheya.

²² “Oodalisiwa tti nyuwaano athu yawiitani, yuukhootani, yuullotellani epewe ni wuullotellani wi tti oonanara, ddittheddenennddo kaambiiwa muri oohuddera a miyaano Mwaana a Muthu.

²³ Hakallallani ddeko ddenndda ddaaweereyellakani nave mwiine ni ehakallallo kaambiiwa muneerothuviwa wuullupalli oddullu. Vawi makhollo a athu oonanaraayo yaheera ddimoddamoddave ddennddo wa anamallotella.”

²⁴ “Koma ootulli tti nyuwaano muri ni eyuuma, vawi mohaakhella khalle yowuuhakallallihani.

²⁵ Ootulli tti nyuwaano murina yoocha ollello, vawi muneerovolliwa ettalla. Ootulli tti nyuwaano munattheya ollello, vawi muneerewinlla ekutho ni omora miitthori.

²⁶ “Ootulli tti nyuwaano athu attheene yaallotaka ddaphaama dda nyuwaano vawi makhollwiiwa yaallota ddennddo wa anamallotella awoottha.

Dda waakonda adani

²⁷ “Koma kinuulleellani nyuwaano munakiiwa wi, akondeni adanaanyu, muweerelleke ddaphaama ayo enawiitani nyuwaano.

²⁸ Adaliseni ayo enuutembelelani nave mwaavekellelleke ayo enuuhoosani nyuwaano.

²⁹ Muthu awuukutha vanramani, omwinnyettho nimoddanno apaalle akusa yawiikhuneellaawo, ohinamuwatteellattho malayaawo.

³⁰ Muthu uuvekani ello mumvaheke. Nave muthu awaakhani ello, muhinamukohattho wi uuhokolloselleni.

³¹ Muweerelleke athu amodda, nnddo munapaalleenyu wi eweerellekeni nyuwaano.

³² “Mwaawaakondaka yaayove enuukondani, munaaweerelliwe echifundo kaambiiwa tini? Vawi naari oochimwa enaakonda ayo enaakonda.

³³ Nave mwaaweerellaka ddaphaama yaayove enaweerellani ddaphaama, munaaweerelliwe echifundo kaambiiwa tini? Vawi naari athu oochimwa eneera ddennddo.

³⁴ Nave mwaawaakongolihaka yaayove munaatiyereenyu wi yuuhokolloselleni, munaaweerelliwe echifundo kaambiiwa tini? Vawi naari oochimwa ennaakongolihattho oochimwa akhwiiwa wi yaahokolloselle yakongonleewannddo.

³⁵ Akondeni adanaanyu vooweerellani ddaphaama, kongolihani koma muhitiyere waakhella ello. Muneerothuviwa wuullupalli nave muneerokhalla anamwani a Mulluku muullupalli. Vawi tti aphaama wa athu oohithokoza ni oonanareene.

³⁶ Mukhalle a echifundo wonanko Attiitthaanyu ayo eri a echifundo.”

Dda oweeruza athu amodda

³⁷ “Muhiweeruzeke athu amodda nave Mulluku khaweeruzani, muhinawiipaka mullatu athu amodda nave Mulluku khawa awiipani, mwaakhululukelleke athu amodda nave Mulluku aneerewuukhululukellanittho.

³⁸ Avaheni athu amodda nave Mulluku aneerewuuvahani. Mulingo wooddalla, woochinyelleya phaama oneerohiyiwa m'mattani mwanyu. Vawi mulingo munaphariheenyu mutteko wa athu amodda, Mulluku aneeropharihattho mutteko yooyo wa nyuwaano.”

³⁹ Nave Yesu ahaalleella niphwanaphwaniho nawi, “Muthu oohoona khanamuhoollella oohoona mukhwaaye vawi eneeromorihellana munllitini.

⁴⁰ Oohuddera khanamukhwaranya muhuddihaaye koma ahuddera amalliha, annaphwanaphwana ni muhuddihooyo.”

⁴¹ “Onamoonella tini mwaneello m'mwiitthoni mwa mukhwaawo koma onahiya woona murinda ori m'mwiitthoni mwawo?

⁴² Onawora ollota wa mukhwaawo wi, ‘Kinapaalla kimuvenyihemo mwaneello ari m'mwiitthoni mwawommo,’ weyaano ohinavenyihemo murinda ori m'mwiitthoni mwawo? Nyu awoottha! Mwaambe ovenyihamo murinda ori m'mwiitthoni mwanyu nave muneerowora woona phaama wi mumuvenyihemo mwaneello ari m'mwiitthoni mwa mukhwiinyu.”

Dda muteekho ni ezipaso ddiwa

⁴³ “Muteekho wawunnuwa phaama khoniimma ezipaso ddoonanara navettho muteekho woonanara khoniimma ezipaso ddaphaama.

⁴⁴ Vawi orive muteekho onnadduwanyeya ni ezipaso ddiwa. Vawi namukuyu khanarukulliwa va miteekho ddamiiwa naari mpesa orukulliwa vamuteekhoni wa epullathi.

⁴⁵ Muthu aphaama anakhumiha ddeko ddaphaama ovenyera m'murimani mwaye koma muthu oonanara anakhumiha ddeko ddoonanara ovenyera m'murimani mwaye. Vawi eyano enallota ddeko ddiddanlle m'murimani mwa muthu.”

Dda athu eelli oomaka enyumba

⁴⁶ “Munakiithanella tini wi, ‘Apwiya, Apwiya,’ muheeraka kinalloteemi wa nyuwaano?

⁴⁷ Arive muthu anawa wa miyaano nave aniiwa mawaaka nave eeraka ddennddo, kineerowoonihani wi anaphwanaphwana ni tini.

⁴⁸ Anaphwanaphwana ni muthu oyo voomakani enyumbaaye, aakata moowallamella nave atthipella enyumbeeyo vanllukuni. Muhinje waaddalla ni maaddi, ephiya va enyumbeeyo nave kheyaatikheye kaambiiwa yaamakiwa phaama.

⁴⁹ Nave arive muthu aniiwa ni oheera mawaakaalla anaphwanaphwana ni muthu amakille enyumbaaye vamihavani, moohitthipella. Maaddi yaphiyalliiwa va enyumbeeyo, enthawi yeeyo yaakumuwavo nave okumuwanko waari wawoopiha!”