Luka 5 - Mawu a Mulluku

Yesu anawiithana oohudderaaye awaamba

¹ Nllapo nimodda Yesu ahiimella mukhwipi mwa enyanja ya Genesareti nave athu yaanakakhana moompanikiza wi yiiwe mawu a Mulluku.

² Ahoona ekallawa piilli ddikakhelliwe vakhwipi va enyanja koma oottottha yaari evenyillemo, eyiille woohuwa mathaviiwa.

³ Yesu aawella mukallawani emodda eyo yaari ya Simoni nave aamuveka wi akakhe vang'ono evollowe m'maaddini. Nave Yesu aanahuddiha mulloko wa athwaayo akeraatthille mukallawanimmo.

⁴ Amallihalleeye ohuddiha, aamulleella Simoni wi, “We ni akhwaawaayo yaannani ekallaweeyo woowallamellanko, muvokhellewo nthavi nanyu wi mwiiphe ehomba.”

⁵ Simoni ahaakhulla wi, “Apwiya, mahiiyu mattheenaalla noophara mutteko moollipiha ohiipha ello koma vawi nyuwaano moollota, kineerovokhellawo nthavinno.”

⁶ Yaavokha nthavinno nave yahiipha ehomba ddinchichi wawi mathaviiwa yahanlle vang'ono waahuwa.

⁷ Sika yaawiithana akhwiiwa a mukallawani emoddeeyo wi yaakavihere. Yaawa nave ehomba ddaaddalla ekallawa piillinnddo wawi ddahanlle vang'ono opwina.

⁸ Nave Simoni Petro oonilleeye ddeereyillennddo, aakokhora moomuvaha olemu Yesu, allota wi, “Apwiya, mukivenyerevo kaambiiwa miyaano tti muthu oochimwa!”

⁹ Vawi Simoni ni akhwaayaayo yaattikhina wunchichi ni waata wa ehomba yiiphalliiwannddo.

¹⁰ Yohane ni Yakobo anamwani a Zebedayo, ayo yaarittho akhwaaye a Simoni ni alliwattho yaattikhina. Yesu aallota wa Simoni wi, “Ohoove, waambeella ollello oya muhoollo oneerekewaattottha athu.”

¹¹ Nave yaapurullella ekallawa ddiwannddo vakhwipi va enyanja, ehiya ddittheddene nave emuthwara Yesu.

Yesu anamuchiriha muthu amakate

¹² Enthawi emodda Yesu aari mu etawoni mmo mwaari muthu mmodda amakate. Amoonilleeye Yesu, aamukokhorella amuveka wi, “Apwiya, mwaapaallaka, ttuuwora okeelliha!”

¹³ Yesu ahookolla nnatta, amuttannya nave allota wi, “Kinnapaalla, ellihiwa!” Nave enthawi yeeyo aheellihiwa o makataaye.

¹⁴ Vano Yesu aamulamula wi, “Ngiiwa nndda vano! Ohimulleelle arive muthu koma khawe wa mullupa mukutho wi awoone wi woheella. Vano waheraatthi mukutho olle walamuliwe ni Mose wi vikhalle omboni wa athu wi woheellihiwa.”

¹⁵ Nave epilli ya Yesu yaavuwa moovirellella, sika athu anchichi yaawa wi emwiiwe ni ochirihiwa o ereta ddiwa.

¹⁶ Koma aanaya onipuroni nayeekha, avekellaka.

Yesu anamuchiriha muthu oorakalla

¹⁷ Nllapo nimodda Yesu ahuddiheeye, Afarisi* amodda ni ahuddihi a malamulo* oovenyera m'mapuroni a mu ezigawo dda Galileya, Yudeya ni muzinda wa Yerusalemu yaari vaavo. Nave Yesu aakhalla ni masiva a Apwiya wi aachirihe oovoriiwa.

¹⁸ Nave allopwana amodda yaawa emutukhullalle muthu oorakalla vamachirani. Yapaalla evollowena muthooyo mpammo wi yamuhiye vamiitthoni va Yesu.

¹⁹ Koma ekaamba ya mulloko wa athwaayo kheyaaworille wi evollowena. Sika yaawellana vaddullu va enyumbeeyo ephovolla nave emukitthihella variyari va athwaayo vamiitthoni va Yesu emukonaatthihalle vamachirani.

²⁰ Yesu vawoonani echikhulupililwiiwa, aallota wa oorakallooyo wi, “Mukhwaaka, machimwaawo aakhululukiwa.”

²¹ Ahuddihi a malamulo ni Afarisi yahaamba wiikoha weekhiiwa wi, “Muthu yoolla ttaani, anamullotella epewe Mulluku! Mullukuve sika anawora okhululukella machimo.”

²² Yesu aadduwella maganizwiiwa, sika ahaakoha wi, “Kaambiiwa tini muniikoheenyu ddennddo m'murimani mwanyu?

²³ Yookhweya ttiivi, ollota wi, ‘Machimwaawo aakhululukiwa,’ apaalle ollota wi, ‘Venya weete?’

²⁴ Kineerowoonihani vano wi mi Mwaana a Muthu kookhalla ni olamulello va ellapo yavatthi wookhululukella machimo.” Sika aamulleella muthu oorakallooyo wi, “Venya, kusa machiraawo oroweke owaninyu!”

²⁵ Enthawi yeeyo muthooyo aavenya attheenaayo yoonaka, akusa machira akonaatthilleeyevo, arowa owaniwa amutitimihaka Mulluku.

²⁶ Attheenaayo yaattikhina nave yamutitimiha Mulluku. Moomoova yaallota wi, “Nohoona ddoottikhiniha ollello!”

Yesu anamwiithana Levi

²⁷ Ddimallille ddenndda Yesu aakhuma nave aamoona ookhomiha misonkho nnddina naye Levi, akeraatthille mu enyumba yookhomihella misonkho. Aallota wi, “Kithware.”

²⁸ Levi aavenya, ahiya ddittheddene nave amuthwara Yesu.

²⁹ Nave Levi aamukhozera Yesu machellello onyumbani waye. Nave wenko waakhalla mulloko muullupalli wa ookhomiha misonkho ni athu amodda ayottho yachille ni alliwaayo.

³⁰ Afarisi amodda ni ahuddihiiwa a malamulo yahaamba owinya, yaakoha oohudderaaye wi, “Kaambiiwa tini munacheenyu ni owirya ni ookhomiha misonkho ni athu amodda oochimwa?”

³¹ Yesu aawaakhulla wi, “Athu oohivoriiwa khenaya wa mullupa murete koma yaayove enavoriiwa.

³² Miyaano ngiwiille wi kiwiithane athu oolungama koma athu oochimwa wi erukunuwe mirima.”

Nikoho na dda ohalla ocha

³³ Amodda yaallota wa Yesu wi, “Oohuddera a Yohane Oobatiza ennahalla ocha* wiilliwiilli ni ovekella wiilliwiilli, emoddamoddavettho ni oohuddera a Afarisi koma aanywaalla enimoona ocha ni owirya.”

³⁴ Yesu ahaakhulla wi, “Ethiyo ttuuworeya wi awiithaniwa o machellello a okwati ehalleke ocha ootthellooyo ari vaavo? Wohiworeya iyaayi!

³⁵ Koma eneerophiyattho enthawi yawi ootthellooyo aneerokusiwa va yaayo nave eneerohalla ocha.”

³⁶ Yesu ahaalleellattho niphwanaphwaniho wi, “Khaavo muthu anakusa echigamba ya ekuwo esha asowella va yoowara yakhalle. Vawi echigamba esheeyo eneerokwinyeya ni waahuwa vamodda ni yakhalleeyo.

³⁷ Navettho khaavo muthu anamuhella vinyo musha mu mathumba anttapara akhalle vawi mathumba yaayo eneerophulleya, vinyooyo aneerotathiyamo nave mathumbaayo eneerewoonongeya.

³⁸ Koma vinyo mushooyo anahelliwa m'mathumbani asha.

³⁹ Khaavo muthu amuwiryalle vinyo akhalle anapaalla omuwirya vinyo anaanweene. Vawi aneerollota wi, ‘Akhalloolla annaddiva.’ ”