Luka 4 - Mawu a Mulluku

Yesu aneesiwa ni Satana

¹ Yesu aahokollowa ovenyera o Yordani addalliwe ni Munepa Waweella nave aakusiwa ahoollelliwa ni Munepooyo wi aye ochipululuni.

² Wenko aheesiwa ni Satana wa mallapo 40. Mallapo mattheenaayo Yesu khaachille ello, wawi ettalla yaamuvolla voomallihella viwa.

³ Vano Satana aallota wi, “Nyu mwaarimi muri Mwaana a Mulluku lamulani mallukwaalla wi etthattuwe yoocha.”

⁴ Koma Yesu ahaakhulla wi, “Mawu a Mulluku eni, ‘Athu khenakhalla ni okumi ekaamba ya yoochave.’ ”

⁵ Vano Satana aamukusa Yesu awellana vaddullu nave va enthawi yooyeva aamooniha moomwene mattheene a va ellapo yavatthimva.

⁶ Satana aamulleella wi, “Kineerewuuvaha weyaano olamulellwiiwa muttheene ni ntitimiho niwa nene. Ddittheddenenndda ddaavahiwa wa miyaano nave kinaavaha ayo kinaatthoolleemi.

⁷ Ddittheddenenndda ddinaakhalle ddaawo, wakikokhorella okillapella miyaano.”

⁸ Yesu aamwaakhulla wi, “Mawu a Mulluku eni, ‘Waallapelleke Apwiya Mullukwaawo nave omurumeyelleke yooyove!’ ”

⁹ Vano Satana aamukusella Yesu o Yerusalemu nave aamwiimesa otthoka va enyumba ya Mulluku nave allota wi, “Nyu mwaarimi muri Mwaana a Mulluku, ivokheni nyookha vatthi ovenyera vaava.

¹⁰ Vawi mawu a Mulluku eni, ‘Mulluku aneerewaalamulella angelwaaye dda nyuwaano wi yuutetezeni.’

¹¹ Ennallotattho wi, ‘Eneerewuukaphullani ni mattiiwa wi manyallwaanyu ehiphoreye vamallukuni.’ ”

¹² Koma Yesu ahaakhulla wi, “Mawu a Mulluku eni, ‘Ohiiweese Apwiya Mullukwaawo.’ ”

¹³ Vano Satana amallihalleeye omweesa mutthemwene, aamuhiya enthawi vang'ono.

Yesu anaamba muttekwaaye o Galileya

¹⁴ Yesu aahokollweella o Galileya nave masiva a Munepa Waweella yaari ni olliye. Epillaaye yaavuwa mu echigawo mutthemwene.

¹⁵ Aahuddiha mu enyumba ddamavekello* nave athu attheene yaamutitimiha.

Yesu anakhootiwa o Nazareti

¹⁶ Yesu aaya o Nazareti, nko allelliweeyewo nave va nllapo na Sabata aavollowa mu enyumba yamavekello moollikana ni mmo addollweellelleeye. Ahiimella eerenga mawu a Mulluku.

¹⁷ Nave aavahiwa yoolembiwa ni namallotella Yesaya. Ayittaphurusalleeye aaphwanya valembiwe wi;

¹⁸ “Munepa wa Apwiya ari va miyaano, kaambiiwa yaakizoza miyaano wi killalleye othenga waphaama wa oohoowa. Aakirumiha wi killalleye wa oomakiwa wi ettaphulliwe, ni wa athu oohoona wi yoonettho, ni wa athu oohoosiwa wi kaavahe murendelle,

¹⁹ nave killalleye wi muyakha wookwakhwana oyo Apwiya eneeriiwa yoonihe echifundwiiwa.”

²⁰ Nave Yesu aakhuneella yoolembiweeyo, ayihokollosella wa muthu amwinnyallooyo nave aakeraatthi. Athu attheene yaari mu enyumba yamavekello yaamuwehesesa olliyooyo.

²¹ Nave ahaamba waalleella wi, “Mawu a Mulluku muwiiwalleenyu keerengaka ollellwaalla aakwakhwanihiwa.”

²² Athu attheene yaallota ddaphaama dda olliyooyo nave voottikhinani ni mawu oophara murima ayo aallotilleeye, yaallota wi, “Olla khe mwaana a Yosefe?”

²³ Nave Yesu aallota wi, “Kinnadduwella wi muneerokillotella miyaano mwambi wawi, ‘Mullupa murete we, ichirihe weekha’ nave weerilleewe mu Kaperenao weerettho wuno o etawoni yoowaninyweella.”

²⁴ Nave Yesu aallota wi, “Ddawoona, kinimuulleellani wi anamallotella khenaakhelliwa mu etawoni yoowaniwa.

²⁵ “Ddawoona, kinimuulleellani wi mwaakhalla anaamukhwelle anchichi mu Israele m'mallaponi a namallotella Eliya, waramilliiwa murimu wa miyakha miraru ni miyeri mitthanu ni mmodda nave waakhalla ettalla yuullupalli mu ellapo ettheeneeyo.

²⁶ Namallotella Eliya khaarumihiwe wa mmodda mu Israele koma wa naamukhwelle o etawoni ya Zarefati ellapo ya Sidoni.

²⁷ Mwaakhallattho athu amakate anchichi mu Israele m'mallaponi ayo Elisha aariiye namallotella, khaavo muthu eellihiwe ni olliye koma Namanive a o ellapo ya Siriya.”

²⁸ Athu attheene yaari mu enyumba yamavekello yiiwalliiwa ddenndda, yaasha murima.

²⁹ Vano yaavenya, emukhumihella Yesu otte wa etawoneeyo, eyaana otthoka va mwaango mvo yamakilliiwavo etawoniweeyo wi yamukakhelle vatthi ovenyera vaavo.

³⁰ Koma olliye aavira variyari viwa, avenyavo.

Muthu a munepa woonanara

³¹ Nave Yesu aaya o Kaperenao, etawoni ya mu Galileya, wenko ahaahuddiha athu va nllapo na Sabata.

³² Athu attheene yaattikhina ni ehuddiherwaaye kaambiiwa allota ni olamulello.

³³ Vano mu enyumba yamavekellwiiwa mwaawa muthu ookhalla ni munepa woonanara.

³⁴ Nave aakhuwa moollipiha wi, “Aa! Nuullikalleni tini nyuwaano Yesu a o Nazareti? Munapaalla wi muniiphe hiyaano? Miyaano kohuudduwellani wi nyuwaano tti Aweella a Mulluku!”

³⁵ Nave Yesu aawusimwella munepa woonanarooyo wi, “Okhurumuwe nave okhumemo mwa muthooyo!” Vano munepa woonanarooyo waamukuha vatthi muthooyo vahoollo va athu attheene, okhumamo mwa muthooyo ohimuvoreyille.

³⁶ Athu attheene yaattikhina enallota wa mmodda ni mukhwaaye wi, “Mawu yaalla tti awiidde? Ni olamulello navettho masiva muthu yoolla annalamulella minepa ddoonanara nave ddinakhuma!”

³⁷ Nave epilli ya Yesu yaavuwa virive veko mu echigawommo.

Yesu anaachiriha athu anchichi

³⁸ Yesu aavenyamo mu enyumba yamavekello aya mpa mwa Simoni. Amoottonaaye a Simonooyo yaamavoriiwa ooviha mwiilli wunchichi nave Yesu aavekiwa wi aachirihe.

³⁹ Aaya iimella vakhuviru ni mutthiyanooyo nave aalamula oviha mwiillinko wi omuhiye. Nave aachirihiwa. Enthawi yeeyo aavenya aamba waarumeyella ni ddoocha.

⁴⁰ Misikuwa nndduwa nivollowaka athu attheene yaarina akhwiiwa oovoriiwa ereta ddoohiyanahiyana yaawaana wa Yesu. Vano ahiiyaatthi mattaaye va attheenaayo, aachiriha.

⁴¹ Minepa ddoonanarattho ddaakhuma mwa athu anchichi, ddikhuwaka wi, “Nyu tti Mwaana a Mulluku!” Koma Yesu aaddisimwella minepa nnddo wi ddimaalle vawi ddaanamudduwella wi olliyooyo tti Mesiya* allotelliwe khalle.

Yesu anallalleya mu enyumba ddamavekello

⁴² Ohinase Yesu aavenya o etawoninko nave aya vanipuroni nayeekha. Athu yaamwaashaasha nave yamphwanyilliiwa, yaapaalla omutchinga wi ahaavenyerevottho.

⁴³ Koma aallota wi, “Tti ddookiphwanella wi killalleye othenga waphaama wa omwene wa Mulluku mu matawoni amoddaayottho kaambiiwa Mulluku akirumalle wi keere yeeyo.”

⁴⁴ Sika aallalleya mu enyumba ddamavekello dda mu echigawo ettheene ya Yudeya.