Luka 3 - Mawu a Mulluku

Ollalleya wa Yohane Oobatiza

¹ Waari muyakha wa khumi ni mitthanu wa olamulella wa Kaisara* Tiberiyo, o Roma. Enthawi yeeyo Pontio Pilato aari oolamulella a o echigawo ya Yudeya. Herode* aari oolamulella a o echigawo ya Galileya nave mwanamunne Filipo* aari oolamulella a o echigawo ya Itureya ni ya Trakoniti. Lusaniya aari oolamulella a o echigawo ya Abilene.

² Nave Anasi ni Kayafa yaari allupa mukutho uullupalli. Mallapo yaayo Mulluku aallota ni Yohane, mwaana aamullopwana a Zakariya, aariiye ochipululuni.

³ Sika Yohane aaya o echigawo ettheene ya muhinje wa Yordani, allalleyaka wi, “Rukunuwani murima, mubatiziwe wi Mulluku uukhululukelleni machimwaanyu”

⁴ Moollikana ni olemba wa namallotella Yesaya wi, “Okhuwa wa muthu mmodda muchipululuni onallalleya wi, ‘Llimani musewu wa Apwiya, okollani ettilla wi yeetemo.

⁵ Nirive ntapo nivuhellelliwa, orive mwaango ni mwanamwaango ddineerokumulliwa. Misewu ddookhoromana ddineerewookolliwa, nave ettilla ddookateyakateya ddineeromwaramwarelliwa.

⁶ Athu attheene eneerewoona ovullusa wa Mulluku.’ ”

⁷ Athu anchichi yaawa wa Yohane wi aabatize. Nave aallota wi, “Nyu enowa! Ttaani uulleelleni wi muthawe ollaka wa Mulluku onawanko?

⁸ Mweereke ddeko ddawooniha wi moorukunuwa murima wonanko muteekho onimma ezipaso ddaphaama. Nave muhinallotaka weekhiinyu wi, ‘Abrahamu sika nikhollo nahu.’ Kinimuulleellani wi Mulluku ttuuwora otthattusa mallukwaalla okhalla edduullu dda Abrahamu.

⁹ Kottokwa ari khalle vatthi va orive muteekho wi yuuhe woohimma ezipaso ddaphaama wi ovokhelliwe viikho.”

¹⁰ Athwaayo yaamukoha wi, “Vano, neereke tini?”

¹¹ Ahaakhulla wi, “Muthu arina malaya meelli anaphwanella wi amuvahe amoddaayo mukhwaaye oyo ahinna nave muthu arina yoocha aakawellettho akhwaaye.”

¹² Ookhomiha musonkho yaawattho wi ebatiziwe nave yaamukoha wi, “Ahuddihi, neereke tini?”

¹³ Olliye ahaakhulla wi, “Muhikhomiheke musonkho mwawaanjerera va nnddo mulamuliweenyu.”

¹⁴ Akhoto amodda yaamukohattho wi, “Hi neereke tini?” Nave ahaakhulla wi, “Muhaakheke ddeko dda athu moowoopopiha apaalle moowootthera, mukwakhwanihiweke ni mallivellwaanyu.”

¹⁵ Nave athu yaanamutiyera wi Mesiya* awe nave yahaamba ottikhina dda Yohanooyo wi apaalle ttuukhalla Mesiyooyo.

¹⁶ Sika Yohane ahaalleella attheenaayo wi, “Kinuubatizani ni maaddi koma animawa mmodda muullupalli ookikhwaranya miyaano. Ngiphwanenlle naari ottaphulla mikwe dda esapato ddaye. Olliyooyo aneerewuubatizani ni Munepa Waweella ni munllo.

¹⁷ Ookusa etthello m'mattani mwaye wi amuveethe tirigu. Aneeromuhella tirigwaaye mukhokweni mwaye; koma aneerowoosa mallullaayo vamunlloni woohithiima.”

¹⁸ Yohane aallalleya othenga waphaama moohiyanahiyana waachenjeza athu.

¹⁹ Navettho aamuhumullulla Herode, oolamulella kaambiiwa aamutthella Herodiyasi, mwaara a mwanamunne ni weera ddeko ddimodda ddinchichi ddoonanara.

²⁰ Waanjererattho va ddoonanara eerilleeyennddo, aamuwallella Yohane mundende.

Obatiziwa wa Yesu

²¹ Athu attheene ebatiziwe, Yesu nayeenettho aabatiziwa. Avekelleeye, oddullu waahulleya.

²² Nave Munepa Waweella aakitthella va olliye, awooneya wonanko ekhunda. Vano mawu yahiiweya ovenyera oddullu wi, “We tti Mwanaka ookondiwa. Kinnahakallalla ni murimaaka muttheene ni weyaano.”

Makhollwaaye a Yesu

²³ Yesu aphiyalleeye miyakha 30 ahaamba muttekwaaye woohuddiha. Athu yaaganiza wi aari mwaana a Yosefe, oyo aari edduullu ya Eli,

²⁴ Matati, Levi, Meliki, Yanai, Yosefe,

²⁵ Matatiyasi, Amosi, Nahumu, Esili, Nagai,

²⁶ Maati, Matatiyasi, Semeini, Yoseki, Yoda,

²⁷ Yoanani, Resa, Zerubabele, Shalatiele, Neri,

²⁸ Meliki, Adi, edduullu ya Kosamu, Elimadamu, Ere,

²⁹ Yoswa, Eliezera, Yorimu, Matati, Levi,

³⁰ Simiyoni, Yuda, Yosefe, Yonamu, Eliyakimu

³¹ Meleya, Mena, Matata, Natani, Davide,

³² Yese, Obedi, Bowazi, Sala, Nashoni,

³³ Aminadabu, Adimini, Arini, Hezironi, Perezi, Yuda,

³⁴ Yakobo, Isaki, Abrahamu, Tera, edduullu ya Nahoro

³⁵ edduullu ya Serugi, edduullu ya Rewu, edduullu ya Pelegi, Ebere, edduullu ya Shela,

³⁶ Kainani, Arifakisadi, Shemu, Nowa, Lameki,

³⁷ Metusela, Enoki, Yaredi, Mahalaleeli, Kainani,

³⁸ Enoshi, Seti, Adamu, mwaana a Mulluku.