Luka 24 - Mawu a Mulluku

Yesu anavenyihiwa wa ookhwa

¹ Ohinase wa Nllapo Namulungu atthiyana yaaya omahame, ekusalle makhura a nthuko naphaama yaakhozilliiwaalle.

² Yaphwanyille nlluku niphikirisiwewo khalle omullakoni wa mahamaayo.

³ Vano yaavollowa koma kheyaaphwanyillemo mutembo wa Apwiya Yesooyo.

⁴ Yahiimella ekhwille mullakallaka ni yeella nave moorurumusa allopwana eelli ewanre ddaweellesesa yahiimella vakhuviru ni alliwaayo.

⁵ Atthiyanaayo yahoova nave yaaweha vatthi. Vano allopwanaayo yaallota wi, “Kaambiiwa tini munamwaasheenyu muthu mukumi variyari va ookhwa?

⁶ Olliye khaamo mmu, oovenyihiwa wa ookhwa. Upuwellani nnddo uulleelleeyeni aariiye ni nyuwaano o Galileya wi,

⁷ ‘Miyaano Mwaana a Muthu kinaphwanella wi kivelleelliwe wa athu oochimwa, katthomeyiwe vamutandani nave vavira mallapo mararu kineerovenya wa ookhwa.’ ”

⁸ Vano atthiyanaalle yahuupuwella mawaayaalle.

⁹ Nave yaahokollowa ovenyera omahameni wulle nave yaaya yaalleella ddittheddene oohuddera khumi ni mmodda ni athu attheene.

¹⁰ Atthiyanaayo yaari Mariya Magadalena, Yohana ni Mariya amennya a Yakobo. Alliwaalla ni atthiyana amodda yaallota ddeko ddittheddenenndda wa amurummwa.

¹¹ Koma amurummwaayo kheyaapharihalle mutteko mawaalla nave kheyaakhulupililalle atthiyanaayo.

¹² Naari ddaari ddiiddo, Petro aavenya athamakella o mahame wulle. Aphiyalleeye aawarama atthurumellamo nave oonillemo ekuwove nndde ddahuruwelliwena mutembo wa Yesoolle. Vano aahokollweella owaniwa attikhinaka ni ddeko ddeereyillennddo.

Ddooneye va ettilla yo Emawu

¹³ Nllapo nene nenno athu eelli ayo yamuthwara Yesu yaaya m'muzi wa Emawu, woorekamellana ni Yerusalemu wa makilomita khumi ni nimodda.

¹⁴ Nave yaamakambirana ddeko ddittheddene ddeereyillennddo.

¹⁵ Yakambiraniiwa, Yesu aawa awaatamella nave aathaananana.

¹⁶ Yaamoona koma kheyaamudduwenlle.

¹⁷ Yesu aallota wi, “Munatakhellana dda tini mweetaka?” Nave yahiimella, yooneyaka ookhumuwa.

¹⁸ Mmoddooyo nnddina naye Keleopa, aamukoha wi, “Nyu tti mulleto yooyove mu Yerusalemummu ahinadduwella ddeko ddeereyille mallapo yaalla?”

¹⁹ Yesu ahaakoha wi, “Ddawiidde?” Yahaakhulla wi, “Ddeko ddeereyille wa Yesu a o Nazareti. Muthu yoolla aari namallotella nave mitteko ddaye ni mawaaye ddaari ddamasiva vamiitthoni va Mulluku ni athu attheene.

²⁰ Allupa mukutho uullupalli ni attekweenaahu yaamuvelleella wi iipiwe mullatu ni wiiphiwa nave yaamutthomeya vamutandani.

²¹ Hiyaano natiyera wi tti olliyenooyo anaawoopolle Aisraele. Wawiddiidda, ollello tti nllapo naneeraru waambeella mvo ddeereyilliiwa ddenndda.

²² Atthiyana amodda a mullokwaahu yaanittikhiniha. Yapehilliiwa ohinase oya omahame,

²³ kheyaaphwanyillemo mutembwaaye. Nave voowaani yallotille wi yaawoona angelo ayo yaalleelle ddawi olliyooyo okhallattho mukumi.

²⁴ Akhwiihu amodda yaayaawo omahamenko nave yaphwanyille moollikana ni mmo yallotille atthiyanaayo koma kheyaamoonille Yesooyo.”

²⁵ Vano Yesu aallota wi, “Athu ookarangeya nyu, mookhalla ni olesi voohikhulupililani ddittheddene yallotille anamallotella!

²⁶ Khaphwanenlle Mesiya* wi allakiwe ahinavollowe mu ntitimiho naye?”

²⁷ Nave Yesu ahaatthopoollella dda ddittheddene ddalembiwe mu mawu a Mulluku ddayeekha, waamba malamulo a Mose ophiyera ddoolembiwa dda anamallotella attheene.

²⁸ Yaatamelliiwa ophiyera m'muzi yayiiwammo, Yesu ahooniha wonanko aamakhwaranya.

²⁹ Koma alliwaayo yaamuwatihera wi, “Mukhalle ni hiyaano wuno vawi nndduwa nimmavollowa nave wohaamba khalle oripa.” Sika aavollowa akhalla ni alliwaayo.

³⁰ Akeraatthilleeye voochella wi achena, amukusa buledi, amudalisa, amumeyameya nave aavaha.

³¹ Vano miitthwiiwa yaahulleya nave yaamudduwella koma enthawi yeeyo olliye ahaarimeella.

³² Yaallota muthu ni mukhwaaye, “Naahakallalla alloteeye neetaka m'musewuni mulle anilleellaka dda mawu a Mulluku.”

³³ Enthawi yeeyo yaavenya ehokollweella o Yerusalemu, nko yaaphwanyilliiwa oohuddera khumi ni mmodda etthukumanne ni athu amodda.

³⁴ Oohudderaayo yaallota wi, “Ddawoona, Apwiya aavenyihiwa wa ookhwa! Simoni oowoona!”

³⁵ Eellaayo ni alliwattho yahaalleella ddeereyillennddo yeetiiwa m'musewuni nave ni wi yaamudduwella Yesu amumeyameyeeye buledi.

Yesu anooneya wa oohudderaaye

³⁶ Eellaayo yallootiiwa dda nnddo ddeereye, moorurumusa Yesu yeekha ahiimella variyari viwa allota wi, “Murendelle okhalle ni nyuwaano.”

³⁷ Nave yaarurumuwa enoova, yeesa enoona mutthowa.

³⁸ Nave allota wi, “Munoovella tini? Munahoowella tini ni makoho m'murimani mwanyu?

³⁹ Ngoonani m'mattani ni m'manyalloni mwaka nave moone wi tti miyaano. Kittannyeni nave moone vawi mutthowa khawinna muhehe ni makhuva wonanko kiriiminanndda mmu munakoonelleenyu.”

⁴⁰ Allotilleeye ddenndda aawooniha mattaaye ni manyallwaaye.

⁴¹ Koma kheyaakhulupililalleseve ekaamba ya ohakallalla ni ottikhina, vano ahaakoha wi, “Mookhalla ni yawi muche?”

⁴² Yaamuvaha ehomba yaawaarika.

⁴³ Ahaakhella ayicha yoonaka.

⁴⁴ Vano aallota wi, “Ddeko ddenndda kaallota khalle kaariimi ni nyuwaano wi ddittheddene ddalembiwe dda miyaano mu malamulo a Mose ni ehuddiho ya anamallotella ni Nibukhu na Masalimo, ddinaphwanella wi ddikwakhwanihiwe.”

⁴⁵ Vano aahulla miru ddiwa wi yiiwesese phaama mawu a Mulluku.

⁴⁶ Nave aallotattho wi, “Ddoolembiwa wi Mesiya anapaalleya wi allakiwe nave avenyettho wa ookhwa nllapo naneeraru.

⁴⁷ Nave mu nnddina naye ollalleyiwe othenga woorukunusa murima ni okhululukiwa wa machimo wa athu attheene, waambeella mu Yerusalemu.

⁴⁸ Nyuwaano sika amboni a ddeko ddenndda.

⁴⁹ Nave kineerewuurumihellani yalonjeziwe khalle ni Attiitthaaka. Nave mutiyereke m'muzindanimmu ophiyera mwaakhenlle masiva oovenyera oddullu.”

Yesu anawellihiwa oya oddullu

⁵⁰ Yesu ahaahoollella oohudderaaye akhumana m'muzindanimmo aphiyana o Betaniya. Wenko aawelliha mattaaye aadalisa.

⁵¹ Aadalisalleeye, ahaahiya, awellihiwa oya oddullu.

⁵² Yaamullapella, ehokollweella o Yerusalemu, ehakallallaka wunchichi.

⁵³ Nave mallapo mattheene yaanatthukumana mu enyumba ya Mulluku, emutitimihaka Mulluku.