Luka 23 - Mawu a Mulluku

Pilato anamukoha Yesu

¹ Athu attheene a vanthatoni namillatu waatimulla omukusalle Yesu oyaana wa Pilato,

² Wenko yahaamba omuhumullulla wi oochimwa voollotani wi, “Naamphwanya aweerihaka athu a mutundwaahu wi ewukile nave aahiihaka okhoma musonkho wa Kaisara.* Nave aniiromolla yeekha wi tti Mesiya,* mwene.”

³ Sika Pilato aamukoha wi, “We tti Mwene a Ayuda?” Yesu aallota wi, “Mullotillethi nyookha.”

⁴ Vano Pilato aallota wa allupa mukutho uullupalli ni mulloko waathwaayo wi, “Nginaphwanya mullatu wawi kimwiipe muthoolla.”

⁵ Koma athwaayo yaallipihellave ollota wi, “Ni ehuddihwaaye annaweeriha athu a mu Yudeya mutthemwene wi ewukile. Aambeelle o Galileya, vano ari wuno.”

Yesu wa Herode

⁶ Pilato ahiiwa ddenndda, aakoha wi, “Muthu yoolla tti a o Galileya?”

⁷ Vano iiwalleeye wi Yesu anavenyera o echigawo yoolamulelliwa ni Herode,* aamurumiha wa Herode, oyo enthawi yooyo aari o Yerusalemu.

⁸ Herode amoonilleeye Yesu aahakallalla ni murimaaye muttheene vawi ahiiwa dda olliye nave aanapaalla omoona. Aanatiyerella omoona eeraka ddoottikhiniha.

⁹ Vano Herode aamukoha Yesu ddinchichi koma Yesu khaakhunlle ello.

¹⁰ Allupa mukutho uullupalli ni ahuddihi a malamulo* yahiimella emullotella Yesu wi oochimwa.

¹¹ Vano Herode ni akhotwaaye yaamweerella ni omullotella epewe Yesu. Yaamuwariha mukanjo woomwene, emuhokollosella wa Pilato.

¹² Herode ni Pilato yaari awiitana ddihineereye ddenndda koma vano yahaattana.

Mullatu waakamulliwa wi Yesu iiphiwe

¹³ Pilato aamwiithana allupa mukutho uullupalli, attekweene a Ayuda* ni athu attheene.

¹⁴ Aallota wi, “Mwaawaana muthoolla wa miyaano wi annaweeriha athu wi ewukile. Vano koomukoha vamiitthoni vanyu koma nginamphwanya ni mullatu wa ddeko munamullotelleenyu wi oochimwa

¹⁵ Naari Herode khaamuphwanyille ni mullatu, ella sika ekaambiiwa amuhokolloselleeye wa hiyaano. Khenre ello yoophwanella okhwa.

¹⁶ Kineeromoona omuwashulla nave kimuhiye aroweke.”

¹⁸ Nave athu attheene yaakhuwave wi, “Iiphiwe! Attaphulliwe Baraba!”

¹⁹ (Baraba aahiyiwa mundende kaambiiwa aawukila niboma m'muzindanimmo navettho aamwiipha muthu.)

²⁰ Pilato apaalla omuttaphulla Yesu sika ahaavekattho athwaayo.

²¹ Koma yaakhuwave wi, “Mutthomeyeni vamutandani! Mutthomeyeni vamutandani!”

²² Pilato ahaakohattho waneeraru wi, “Achimwalle mullatu wawiidde? Nginamuphwanyella mullatu woophwanella wi iiphiwe! Kineeromuwashulla kimuhiye aroweke.”

²³ Koma athwaayo yaavirellellave okhuwa wi Yesu atthomeyiwe vamutandani nave omamallihelloni wene yaamugonjiha Pilato ni okhuwa wiwanko.

²⁴ Vano Pilato aakamulla wi ddoopaalla dda athwaalle ddeereye.

²⁵ Aamuttaphulla muthu yamupaalleewoolle, oyo ahiyiwe mundende ekaamba ya owukila niboma navettho omwiipha muthu. Koma amuvelleella Yesu wa alliwaayo wi yeerena ddoopaalla ddiwa.

Yesu anatthomeyiwa vamutandani

²⁶ Akhotwaayo yamukusalliiwa Yesu wi yamutthomeye vamutandani, yaakumana ni muthu oovenyera o Kurene nnddina naye Simoni. Olliye avenyera m'muzi ayaaka otawoninko nave yaamureya mutanda moomuwatihera nave aneeta vatulli va Yesu.

²⁷ Mulloko wa athu anchichi waamuthwara navettho atthiyana ayo yadduukutha veethirimani emwinllellaka Yesu.

²⁸ Koma Yesu aarukunuwa allota wi, “Nyu atthiyana a o Yerusalemu, muhinakinllellaka miyaano koma muddinllelleke nyookha ni aniinyu.

²⁹ Vawi mallapo enimawa ayo athu enaallotekiiwa wi ‘Oodalisiwa tti atthiyana awumma, ayo eri oohiyara nave ayo ehinamwaamwiheke mwaana!’

³⁰ Enthawi yeeyo Athu eneerollota wa miyaango wi ‘Nimorelleni!’ Eneerollota wa asimiyaango wi ‘Niphitteereni!’

³¹ Ddeko wonanko ddenndda ddineereye wa muteekho ori mukitthi, onaakhalle wawiidde wumma?”

³² Athu eelli ayo yaari ezigawenga, yaakusiwattho wi yiiphiwe vamodda ni Yesu.

³³ Nave yaphiyalliiwa onipuroni nooromolliwa “Nipuro na Nikharakadda,” yaamutthomeyawo vamutandani Yesu ni ezigawenga, mmodda onnattanatta naye nave mmoddooyo onnatta noonyottho naye.

³⁴ Yesu aallota wi, “Attiitthaaka, mwaakhululukelle vawi khenadduwella eyo eneeriiwa.” Vano akhoto yaakawana ddoowara ddaye mwawoombesa.

³⁵ Athu yahiimella enoonella nave attekweene a Ayuda yamullotelliiwa epewe wi, “Aanaavullusa amodda, muhiyeni iivulluse yeekha, aari Mesiya ootthoolliwa ni Mulluku!”

³⁶ Akhotwaayo yaamweerellattho epewe Yesu, yaamwaatamella, emuvaha vinyo oonyuunya wi amuwirye.

³⁷ Nave yaallota wi, “Wiivulluse weekha waari Mwene a Ayuda!”

³⁸ Vaddullu va murwaaye vaakhalla yoolembiwa yawi, “Olla tti Mwene a Ayuda.”

³⁹ Nave mmodda a ezigawenganndde aamullotella epewe wi, “We khe Mesiya valle? Wiivulluse weekha ni hiyaano!”

⁴⁰ Mmoddooyo aamusimwella wi, “Ethiyo weyaano khonamoova Mulluku? Vawi naweenettho onaakhella ollaka omoddamodda wenngu.

⁴¹ Hiyaanothi ninnaphwanella ollakiwa kaambiiwa ninaakhella ollikana ni ddaweera ddahu koma olliyoolla khenre yoonanara.”

⁴² Nave aallota wa Yesu wi, “Yesu, mwakuupuwelle mwawa muphiya mu omwenaanyu!”

⁴³ Yesu aallota wi, “Kinimuulleella ddawoona wi ollello vaava oneerokhalla ni miyaano mu Paradizo.”

Okhwa wa Yesu

⁴⁴ Waambeella 12 koloko otthaana ophiyera 3 koloko waakhalla epiphi mu ellapo ettheene vawi nndduwa naathiima.

⁴⁵ Owala wa nndduwa waatthattuwa epiphi nave ekatani yoohiyaniha mapuro meelli a mu enyumba ya Mulluku yahaahuwa okawaneya variyari.

⁴⁶ Vano Yesu ahinlla mookhuwa wi, “Attiitthaaka, kinavelleella munepaaka m'mattani mwanyu!” Amallihalleeye aakhwa.

⁴⁷ Akhoto muullupalli a o Roma oonilleeye ddeereyillennddo aamutitimiha Mulluku allota wi, “Ddawoona, muthoolla aari oolungama!”

⁴⁸ Athu attheene yatthukumanne wi yoonelle ddaweereyannddo yoonilliiwa ddennddo, yaarowa owaniwa edduukutha ekhakadda ekaamba yooddiiwella ethakaraka.

⁴⁹ Attheene yadduwellana phaama ni Yesu navettho atthiyana yamuthwanre ovenyera o Galileya, yahiimella voorekamella enoona ddaweereyannddo.

Ovitthiwa wa Yesu mu mahame

^50-51 Waakhalla muthu mmodda nnddina naye Yosefe oovenyera o Arimateya, etawoni ya Ayuda. Aari muthu aphaama ni oolungama. Nave aari oodduwanyeya a attekweene a millatu a Ayuda* nave aanatiyerattho owa wa omwene wa Mulluku. Nave muthoolla khaawiiwanane ni attekweene a millatu a Ayuda ddawi Yesu iiphiwe.

⁵² Aaya wa Pilato aveka mutembo wa Yesu.

⁵³ Vano aaya akitthiha mutembooyo, awuhuruwella ni ekuwo, awuvittha mu mahame oosemiwa vanllukuni ayo yaari ehinavitthiwekemo muthu.

⁵⁴ Naari nllapo nookhozekella nave nllapo na Sabata naari vakhuviru waambeya.

⁵⁵ Atthiyana yamuthwanre Yesu ovenyera o Galileya yaathaanana ni Yosefe wi yoone mahamaayo ni mavitthello a mutembwaayooyo.

⁵⁶ Vano yaarowa owaniwa yakhoza makhura a nthuko naphaama wi yazoze mutembooyo. Va nllapo na Sabata yahiithuuwa, ollikana ni malamulo a Mose.