Luka 22 - Mawu a Mulluku

Opangana ddoomwiipha Yesu

¹ Ehakallallo ya Buledi Oohikhalla ni Yisiti, yooromolliwa Paska, yahaatamella.

² Allupa mukutho uullupalli ni ahuddihi a malamulo* yahaashaasha ettilla yawi emwiiphe Yesu koma yawoova athu.

Yudasi anaakhullella omuvelleella Yesu

³ Satana aavollowa mwa Yudasi, ooromolliwattho Isikariyoti, oyo aari mmodda a oohuddera khumi ni eelli.

⁴ Yudasi aaya akambirana ni allupa mukutho uullupalli ni attekweene uullupalli a oowehera enyumba ya Mulluku dda ettilla yoomuvelleellella Yesu waalliwaayo.

⁵ Yaahakallallana, yiiwanana omuvaha makobiri.

⁶ Nave Yudasi ahaakhullella nave ahaashaasha mpata waphaama woomuvelleellella Yesu athu ehiivo.

Yesu ni oohudderaaye anacha yoocha ya Paska

⁷ Nllapo na Ehakallallo ya Buledi Oohikhalla ni Yisiti naaphiya mvo athu yaphwanelliiwa omwiipha mwaanaankhosa wi emuche va Paska.

⁸ Yesu ahaaruma Petro ni Yohane aalleella wi, “Khaweni mwanikhozere yoocha ya Paska wi niche.”

⁹ Alliwaayo yaamukoha, “Munapaalla nuukhozereni wuuwi nipuro nawi mwachellevo yoocha ya Paska?”

¹⁰ Aallota wi, “Mwavollowa mu muzindammo muneerokumana ni mullopwana atukhunlle muno wa maaddi. Muthwareni nave mwavollowena mu enyumba anaavolloweeyemo.

¹¹ Mwallote ni mwaneena a enyumbeeyo wi, ‘Ahuddihi enakoha wi, eri wuuwi echipindaaka mwawi miyaano ni oohudderaaka nachellemo yoocha ya Paska?’

¹² Vano aneerewuutthoonyiherani echipinda yavaddullu yuullupalli, yowaanddellelliwa phaama ddene. Wenko mwakhozerewo yoocha ya Paskaahu.”

¹³ Oohudderaayo yaatimulla, ephwanya ddittheddene ddiri moollikana ni ollota wa Yesu nave yaakhozellawo yoocha ya Paska.

Mugonelo wa Apwiya

¹⁴ Enthawi yaphiyalliiwa, Yesu aakeraatthi voochella ni amurummwa.

¹⁵ Aallota wi, “Kookhalla ni munkhella wawi kiche Paskoolla ni nyuwaano kihinaambe ohoosiwa!

¹⁶ Vawi kinimuulleellani, ngiwa kimuchattho ophiyera ekwakhwanihiwe mu omwene wa Mulluku.”

¹⁷ Vano Yesu aamukusa kapu, avekella wa Mulluku moothokoza, allota wi, “Akhellani ella muwirye attheenenyu.

¹⁸ Kinimuulleellani wi waambeella vano ngiwa kimuwiryattho vinyo ophiyera omwene wa Mulluku ophiyalle.”

¹⁹ Vano Yesu aamukusa buledi avekella omuthokoza Mulluku. Vano aamumeyameya buledooyo aavaha oohudderaaye allota wi, “Olla sika mwiillaaka woovahiwa ekaamba ya nyuwaano. Mweereke yeella vookuupuwellani miyaano.”

²⁰ Emoddamoddave yeeyo, emanlle omucha buledoolle ahaavaha kapu, allota wi, “Kapu yoolla tti echizindikiro ya echipangano yanaanweene ya Mulluku, eyo yeeriwe oweella mu nikhame naka ekaamba ya nyuwaano.

²¹ “Koma dduwellani wi anakivelleella wa adanaaka anacha ni miyaano vaava!

²² Vawi mi, Mwaana a Muthu, kineerokhwa moollikana ni mmo Mulluku aganizereeye koma ootulli tti muthu anaakivelleellooyo!”

²³ Vano yahaamba okohana weekhiiwa wi ttaani a alliwaayo anaaweere ddennddo.

Muullupalli ttaani

²⁴ Vano oohudderaalle yaavaanyihana wi ttaani anaganizeriwa va alliwaayo wi tti muullupalli?

²⁵ Yesu aallota wi, “Mamwene a ellapo yavattheella ennaahoosa athwiiwa koma oolamulellaayo ennaweeriha athu wi eweereke, ‘Aweera ddaphaama.’

²⁶ Koma nyuwaano khamunaphwanella weera ddiiddo vawi muullupalli variyari vanyu akhalleke wonanko mung'onong'ono nave oohoollellooyo akhalleke wonanko oorumeyella.

²⁷ Muullupalli ttaani? Oyo anacha apaalle oyo anamurumeyella? Tti oyo anacha. Koma miyaano kiri variyari vanyu wonanko oorumeyella.

²⁸ “Mookhalla ni miyaano mu ohoosiwa waka otthewene.

²⁹ Sika miyaano kinuuvahani omwene, wonanko mmo, Attiitthaaka ekivahilliiwa omwene.

³⁰ Vano muneerocha ni owirya ni miyaano mu omwenaaka nave muneerokeraatthi vampandoni woomwene wi muweeruze malloko khumi ni meelli a Israele.

Yesu anavallallella ollota wi Petro aneeromuruna

³¹ “Simoni, Simoni, ngiiwa! Satana ooveka wi aweeseni attheenenyu, wonanko muthu anamuveetha tirigu omuhiyaniha ni madeya.

³² Koma miyaano kohuuvekella weyaano Simoni wi echikhulupilwaawo ehimalle. Nave warukunuwa murima, waallipiheke murima ookhulupilila akhwaawaalla.”

³³ Koma Petro aallota wi, “Apwiya, miyaano kookhozekella omakiwa naari wiiphiwa ni nyuwaano!”

³⁴ Koma Yesu aallota wi, “Kinallota ni weyaano Petro, mahiiyu yaalla mutthupi ohininlle, onaakhalle okikhootille oraru.”

Dda okusa mathumba ni masupada

³⁵ Yesu ahaakoha oohudderaaye wi, “Kuurumalleemini kuulamulani wi muhikuse makobiri, nthumba na voolendoni apaalle esapato, mwaapaalla ello?” Alliwa yaallota wi, “Khanaapanlle ello.”

³⁶ Yesu aallota wi, “Vano, oyo arina makobiri apaalle nthumba na voolendoni anaphwanella wi akuse. Nave oyo ahinna nsupada akullihe yoowaraaye wi akulle nsupada.

³⁷ Kinimuulleellani wi, ddinaphwanella ddikwakhwanihiwe mwa miyaano ddallotiwe Mu mawu a Mulluku wi, ‘Yaamweesa wonanko mmodda a athu oohithwara malamulo.’ Vawi nnddo ddalembiwe dda miyaano ddinnakwakhwanella.”

³⁸ Oohudderaayo yaallota wi, “Apwiya, ngoonani, nookhalla ni masupada meelli vaava!” Yesu ahaalleella wi, “Ddookwakhwanella!”

Yesu anavekella va mwaango wa Olivi

³⁹ Yesu aakhumamo m'muzindanimmo aya o mwaango wa Olivi wonanko mmo addollweellelleeye nave oohudderaaye yaamuthwara.

⁴⁰ Aphiyalleeye omwaangoninko, ahaalleella wi, “Vekellani wi muheesiwe.”

⁴¹ Nave ahaahiya arakamella wookwakhwana ovokha nlluku, wenko aakokhora nave avekella.

⁴² Aallota wi, “Attiitthaaka, mwaapaallaka mukivenyiherevo kapu a ddookatamihoolla! Ohiri opaalla waka koma opaalla wanyu weereye.”

⁴³ Mungelo oovenyera oddullu aamooneyella amullipiha murima.

⁴⁴ Naari Yesu ahoowille wawoopiha m'murimani mwaye, aavekellave ohiyana ni vawaamba nave nikhurumella naye naari wonanko nikhame ninamorella vatthi.

⁴⁵ Avekenlle, voohokollweellani wa oohudderaalle aaphwanye yiikimakona, etopille ni ethakaraka.

⁴⁶ Vano ahaakoha wi, “Munakonella tini? Venyani, muvekelle wi muheesiwe.”

Omakiwa wa Yesu

⁴⁷ Yesu allotaka ddiiddo, mulloko wa athu waaphiya woohoollelliwa ni Yudasi, mmodda a oohuddera khumi ni eelli. Olliyooyo aawa wa Yesu wi amukhupaarelle.

⁴⁸ Nave Yesu aallota wi, “Yudasi, onakivelleella mi Mwaana a Muthu vookikhupaarellani?”

⁴⁹ Oohuddera yaari ni Yesu yoonilliiwa ddaweereyannddo, yaamukoha Yesu wi, “Apwiya, naakakatthe ni masupadaahwaalla?”

⁵⁰ Nave mmodda a yaayo amuphadda naaru noonnattanatta kaporo a mullupa mukutho muullupalli.

⁵¹ Koma Yesu aallota wi, “Muhiwanena!” Nave aattannya naaru na muthooyo amuchiriha.

⁵² Vano Yesu aallota ni allupa mukutho uullupalli ni oowehera enyumba ya Mulluku ni attekweene a Ayuda* yawiille vaavwaayo wi, “Ethiyo muphiyalle ni masupada ni ekoonda wi mukimake wonanko miyaano tti echigawenga?

⁵³ Nllapo ni nllapo kaanakhalla ni nyuwaano mu enyumba ya Mulluku koma khamwaakimakille. Olla sika mpataanyu vawi munalamulelliwa ni masiva a epiphi.”

Petro anamuruna Yesu

⁵⁴ Yesu aamakiwa akuselliwa o enyumba ya mullupa mukutho muullupalli nave Petro ahaathwara voorekama.

⁵⁵ Nave oowehera amodda yaaviddeella munllo variyari va nthato ekeraatthi nave Petro aakeraatthittho vaavo.

⁵⁶ Mullupa mutteko a mutthiyana amoonilleeye akeraatthille vamunllonimvo, aamuwehesesa allota wi, “Muthoollattho aari nimodda ni Yesu!”

⁵⁷ Koma Petro aaruna wi, “We mutthiyana, miyaano nginamudduwella yoolla!”

⁵⁸ Viviralle enthawi yooyeva muthu mmodda aamoona Petro aallota wi, “Wettho tti mmodda a athu yaalla!” Nave Petro aamwaakhulla wi, “We mullopwana, khe miyaano!”

⁵⁹ Viviralle enthawi yooyeva muthu mmodda aallota moollipihella wi, “Kinallota ddawoona muthoolla aari ni Yesu vawi nayeenettho anavenyera o Galileya!”

⁶⁰ Koma Petro ahaakhullattho wi, “Mullopwana we, nginadduwella eyo onalloteewe!” Enthawi yeeyo allotaka, mutthupi wahinlla.

⁶¹ Vano Apwiya yaarukunuwa emuweha Petro nave Petro ahuupuwella wi Apwiya yaamulleella wi, “Mutthupi ohininlle mahiiyu yaalla onaakhalle okikhootille oraru.”

⁶² Vano Petro aakhuma vaatte inllaka ekaamba ya ethakaraka ddinchichi.

Yesu anattheyiwa ni wuukuthiwa

⁶³ Athu yamuwehera Yesu yaanamullotella epewe, enamuukutha.

⁶⁴ Yaamukhuneella owiitthoni waye emuukutha nave ellota wi, “Llotella awuukuthalle ttaani?”

⁶⁵ Nave yaamullotella mawu mamodda manchichi a epewe.

Yesu vanthatoni na attekweene a millatu a Ayuda

⁶⁶ Osaka wene ohinase, attekweene a Ayuda, allupa mukutho uullupalli ni ahuddihi a malamulo yaakumana nave ewaana Yesu o nthato niwa namillatu.

⁶⁷ Yaallota wi, “Nganilleelle, weyaano tti Mesiya?”* Yesu ahaakhulla wi, “Naari kaakhullenlle, khamukikhulupilila.

⁶⁸ Nave kuukohani nyuwaano khamwaakhulla.

⁶⁹ Waambeella vaavo muneerokoona mi Mwaana a Muthu kikeraatthille o nnattanatta na Mulluku Amasiva Mattheene.”

⁷⁰ Attheenaalle yaallota wi, “Vano weyaano tti Mwaana a Mulluku?” Yesu aawaakhulla wi, “Mullotillethi nyookha wi tti miyaano.”

⁷¹ Nave yaallota wi, “Ninapaallellatittho omboni mmodda? Nooddiiwella weekhiihu allotaka yeekha!”