Luka 21 - Mawu a Mulluku

Yoovelleella ya naamukhwelle

¹ Yesu awehilleeye wa athu yamwaapheenllaayo aawoona athu eeyuuma yaari mu enyumba ya Mulluku emorihellaka moosungellamo ddoovelleella ddiwa.

² Vano aamoonattho naamukhwelle oohoowa avokhellakamo asimakobiri meelli.

³ Nave Yesu aallota wi, “Ddawoona, kinimuulleellani wi, naamukhwelle oohoowooyo sika amorihellemo ddinchichi ohiyana ni attheenaayo.

⁴ Vawi amoddaayo yaavelleella moollikana ni nnddo yavahullalliiwa va eyuumiiwa koma olliyoolla ni ohoowa wayenngu, oovelleella ddittheddene aariiyena wi achelleke.”

Dda okumulliwa wa enyumba ya Mulluku

⁵ Amodda yaanallota dda enyumba ya Mulluku wi yaamakiwa ni malluku oophwanelliwa phaama ni oreerihiwa ni ddoovelleella dda wa Mullukunndde. Vano Yesu aallota wi,

⁶ “Ddittheddene munooneenyundda, mallapo eneerophiya awi khavikhalla nlluku naari nimodda va nikhwaaye nihinaamorihiwe.”

Ddookatamiha ni ddoohoosa

⁷ Amodda yaamukoha Yesu wi, “Ahuddihi, ddineereye niini ddenndda? Echizindikiro yawi enthaweeyo yookwakhwana enaakhalle yawiidde?”

⁸ Yesu ahaalleella wi, “Chenjerani wi muthu ahiwoottottheni. Vawi athu anchichi eneerophiya mu nnddina naka ni ollota wi, ‘Mi tti Mesiya,’* nave ‘Enthawi yookwakhwana’ koma muhaathware.

⁹ Nyuwaano mwiiwa dda ekhoto ni owana, muhinahoowa m'murimani mwanyu vawi tti ddoophwanella wi ddeereye koma emallihello khenaphiye.”

¹⁰ Ahaalleellattho wi, “Mutundu ni mutundu mmodda oneerekowana navettho omwene ni omwene omodda oneerekowana.”

¹¹ Navettho oneerokhalla ezivomerezi ddawoopiha owaaka ettalla ni millilli m'mapuroni moohiyanahiyana. Oneerokhallattho ddeko ddawoopiha ni ezizindikiro dduullupalli oddullu.

¹² Koma ddihineereye ddittheddenenndda, muneerohoosiwa ni omakiwa, muneerewiipiwa millatu mu enyumba ddamavekello* ni ohiyiwa mundende. Muneerovelleelliwa wa mamwene ni oolamulella kaambiiwa nyuwaano tti oohudderaaka.

¹³ Yoolla onaakhalle mpataanyu wawi mwakhalle amboni a othenga waphaama.

¹⁴ Dduwellani, muhinakhupanya muhinaphiyewo wi munaaye mwallote tini wi mwiiteteze.

¹⁵ Vawi kineerewuuvahani yoollota ni ezeru ddawi naari adanaanyu khewora okhoota apaalle wuuvaanyihani.

¹⁶ Makhollwaanyu, asinninyu, abalaanyu ni akhwiinyu, eneerewuumakani nave amoddanyu eneerowiiphani.

¹⁷ Athu attheene eneerowiitani kaambiiwa nyuwaano tti oohudderaaka.

¹⁸ Koma khaniwa nitathiyavo naari neehi nimodda na murwaanyu.

¹⁹ Kaambiiwa mwavillella muneerewaakhella okumi woohimalla.

Yesu anallota dda woonongeya wa Yerusalemu

²⁰ “Mwamoona Yerusalemu aapheelliwe ni akhoto a adani, dduwellani wi okumulliwa waye wohaatamella.

²¹ Vano ayo eri o Yudeya ethawelle omiyaangoni nave ayo eri m'muzindani ekhumemo nave ayo eri m'matani otte wa muzinda ehivollowemo.

²² Vawi enaakhalle mallapo oohokollosellana wi ddittheddene ddalembiwe mu mawu a Mulluku ddikwakhwanihiwe.

²³ Enthawi yeeyo ootulli enaakhalle atthiyana ayo enaakhalle ni erukullu vamodda ni awaamwiha anamwani! Vawi oneerokhalla ohoosiwa wawoopiha mu ellapo yeella ni ollaka wa Mulluku va athu a mu ellapo yeella.

²⁴ Amodda a yaayo eneerewiiphiwa ni masupada, amodda a yaayo eneerophariwa okaporo oya ellapo ddinchichi ddoohiyanahiyana. Nave Yerusalemu aneerewoonongiwa ni athu oohimullapella Mulluku ophiyera enthawiiwa emanlle.

Owa wa mwaana a muthu

²⁵ “Vineerokhalla ezizindikiro vanndduwani, vamweerini ni vatheneerini. Nave va ellapo yavatthi, orive mutundu wa athu oneerohoosiwa ni ohalleellihiwa yaweera ekaamba ya oruma wa ephevo ya va enyanja.

²⁶ Athu eneerongomowa ni woova, etiyerellaka nnddo ddinaaweereye va ellapo yavatthi kaambiiwa masiva a muddullu eneerotikhiwa.

²⁷ Vano mi, Mwaana a Muthu, kineerewooneya kiwaaka vamiraponi ni masiva muullupalli ni ntitimiho.

²⁸ Vano ddeko ddenndda ddaawaambaka weereya, venyani wehani muddullu vawi woopolliwa wanyu wohaatamella.”

Mahuddero a muteekho wanamukuyu

²⁹ Vano aallota niphwanaphwaniho wi, “Ganizerani dda muteekho wanamukuyu ni miteekho ddittheddene.

³⁰ Enthambi ddiwa ddaamba ophuwa makukhu, munnadduwella wi ellimwe yohaatamella.

³¹ Emoddamoddave yeeyo nyuwaano mwawa moona ddenndda dduwellani wi omwene wa Mulluku wohaatamella.

³² Ddawoona, kinimuulleellani wi ddeko ddenndda ddineereweereya athu a mbadoolla amodda ehinakhwe.

³³ Oddullu ni ellapo yavatthi ddineeromalla koma mawaaka khemalla. Ddaaphuwaka makukhu anaanweene munnadduwella wi ellimwe yohaatamella.

³⁴ “Chenjerani wi mirima ddanyu ddihikondeke wiichellachella ni owirya ddoolezeliha navettho oviheeriwa ni dda va ellapo wi nllaponno nihuuphiyereni moorurumusa wonanko musampha.

³⁵ Vawi nineerewaaphiyera athu attheene ookhalla va ellapo yavatthimva.

³⁶ Chenjerani enthawi ddittheddene, muvekellaka wi muwore ovulluwa mu ddeko ddittheddenenndda ni wiimella vamiitthoni va mi, Mwaana a Muthu.”

³⁷ Mallapo mattheene Yesu aanahuddiha mu enyumba ya Mulluku koma mahiiyu aanakhalla va mwaango wa Olivi.

³⁸ Nave ohinase athu attheene yaanawa mu enyumba ya Mulluku wi emwiiwelle.