Luka 20 - Mawu a Mulluku

Nikoho na olamulello wa Yesu

¹ Nllapo nimodda Yesu aariiye mu enyumba ya Mulluku aahuddihaka athu ni ollalleya othenga waphaama, allupa mukutho uullupalli, ahuddihi a malamulo* ni attekweene a Ayuda* yaawa.

² Yaamukoha wi, “Munilleelle, muneera ddenndda ni olamulello woovenyera wuuwi? Uuvahilleni olamulello yoolla ttaani?”

³ Yesu aawaakhulla wi, “Mittho kineerewuukohani nikoho nimodda.

⁴ Mukilleelle, Yohane aakusalle wuuwi olamulello woobatiza, waavenyenre wa Mulluku apaalle wa athu?”

⁵ Yaakambirana weekhiiwa wi, “Nillote wi tini? Namwaakhulla wi wa Mulluku, aneerollota wi, ‘Khamwaamukhulupililalle Yohane kaambiiwa tini?’

⁶ Koma nallota wi, ‘Ovenyera wa athu’, athu attheene eneeroniipha voonivokhani malluku kaambiiwa attheene yaamwaakhullella Yohane wi aari namallotella.”

⁷ Sika yaamwaakhulla wi, “Khaninadduwella wi wavenyenre wuuwi.”

⁸ Vano Yesu aallota wi, “Naari miyaanottho nguulleellani wi ddenndda kineera ni olamulello wa aani.”

Niphwanaphwaniho na oollima oonanara

⁹ Vano Yesu ahaamba waalleella athu niphwanaphwaniho nawi, “Waakhalla muthu mmodda aallimalle emataaye ya ezipaso ddampesa. Nave aapolleyiha emateeyo wa athu oollima nave olliye avenyavo aya o ellapo emodda wa enthawi yoorekama.

¹⁰ Yakwakhwanilliiwa enthawi yootthukumaniha ezipaso ddampesooyo, aamuruma mullupa muttekwaaye wa oollimaayo wi aakhelle ezipaso dda m'matanimmo. Oollimaayo yaamuukutha, emuhokollosa ehimuvahille ello.

¹¹ Aamurumihattho mullupa mutteko mmodda koma oollimaayo yaamuukuthattho emweerella ddoowulliha muru, emuhokollosa ehimuvahille ello.

¹² Aamurumihattho mullupa mutteko waneeraru koma oollimaayo yamphoriiha emuvokhella otte wa emateeyo.

¹³ Nave mwaneena a ematooyo aallota wi, ‘Keere tini vano? Kineeromurumiha mwanaka ookondiwa apaalle yoollave eneeromuvaha olemu!’

¹⁴ Koma oollimaayo yamoonilliiwa yaalleellana wi, ‘Olla sika mwanaye aamullopwana anaahallena eyuumeella, hankoni nimwiiphe wi eyuumeella ekhalle yaahu.’

¹⁵ Vano yaamuvokhella otte wa emateeyo emwiipha.” Yesu ahaakoha wi, “Vano mwaneena a ematoolle anaaweere tini wa oollimaalle?

¹⁶ Aneeroowa wi awiiphe oollimaayo nave aneeropolleyiha emateeyo wa athu amodda.” Athwaalle yiiwalliiwa yaallota wi, “Ddennddo ddiheereye!”

¹⁷ Koma Yesu ahaaweha, aakoha wi, “Vano mawu a Mullukwaalla enattaphullella wi tini? ‘Nlluku nno nakhootiwe ni oomaka enyumba nenno naakhalla nlluku noopaalleya.’

¹⁸ Nave anaamorelle va nllukunna aneerewinttakeya nave nllukunna namorella va muthu nineeromusilla.”

Nikoho na okhoma musonkho

¹⁹ Ahuddihi a malamulo ni allupa mukutho uullupalli enthawi yeeyo yaapaalla wi emmake Yesu kaambiiwa yaadduwella wi ahaalleella niphwanaphwaniho nowaavaanyiha. Koma yawoova athwaayo.

²⁰ Vano emweetellelle Yesu, yahaaruma athu ookhalla wonanko oolungama wi yamukoheke ddoomuwaka muwano nave emphwanyelle mullatu, yamuvelleelle wa oolamulella a o Roma oyo aari ni masiva ni olamulello.

²¹ Athwaayo yaamukoha wi, “Ahuddihi, ninnadduwella wi munnallota ddawoona moohiwehattho wi olla ttaani. Koma munnahuddiha ddawoona dda opaalla wa Mulluku wa athu.

²² Sika munilleelle hiyaano. Tti ddawaakhullelliwa ni malamulwaahu okhoma musonkho wa Kaisara,* o Roma apaalle khe ddiiddo?”

²³ Nave Yesu voodduwellani woottha wiiwa aallota wi,

²⁴ “Ngakooniheni nikobiri nookhomella musonkho! Ekhoveella ni nnddinanna tti ddawani?” Yahaakhulla wi dda Kaisara.

²⁵ Vano Yesu aallota wi, “Ddawoona, sika velleellani wa Kaisara nnddo ddiri dda Kaisara nave velleellani wa Mulluku nnddo ddiri dda Mulluku.”

²⁶ Vano kheyaaworille omuphwanyella mullatu vamiitthoni va athu. Koma yaattikhina ni ddoowaakhulla ddaye, emaalla.

Nikoho na ovenya wa ookhwa

²⁷ Asaduki* amodda ayo ehinakhulupilila wi ookhwa ttuuvenya yaawa wa Yesu ellota wi,

²⁸ “Ahuddihi, Mose aalemba wi muthu akhwa amuhiya mwaariye ahinna anamwani mwanamunne amutthelle mutthiyanooyo wi amuyarelle anamwani ookhooyo.

²⁹ Vano waakhalla muthu ni asinne atthanu ni mmodda, aatthella akhwa ahinna anamwani

³⁰ Nave mwanamunne aamutthella mutthiyanooyo akhwa ahinna anamwani.

³¹ Nave emoddamoddave yeeyo yaheereya wa mwanamunne aneeraru owaakattho wa asinne attheene.

³² Voomallihellani, mutthiyanoollettho aakhwa.

³³ Vano va nllapo na ovenya wa ookhwa mutthiyanooyo anaakhalle mwaara awani va allopwana atthanu ni eellaayo vawi attheene yaamutthella?”

³⁴ Yesu aawaakhulla wi, “Allopwana ni atthiyana amuttano ennatthella ni otthelliwa.

³⁵ Koma allopwana ni atthiyana ayo enaphwanella ovenya wa ookhwa ni okhalla mu omwene wa Mulluku khetthella apaalle otthelliwa.

³⁶ Khekhwattho koma enaakhalle wonanko angelo. Kaambiiwa tti anamwani a Mulluku vawi aavenya wa ookhwa.

³⁷ Nave Mose ahooniha khalle wi athu eneerovenya wa ookhwa. Kaambiiwa mu mwaha wa makukhu yakhara munllwaalle Mose ahaaromolla Apwiya wi, ‘Mulluku amakhollwaahu Mulluku a Abrahamu, Mulluku a Isaki ni Mulluku a Yakobo.’

³⁸ Olliyooyo khahiyo Mulluku a athu ookhwa koma tti a athu ookumi. Vawi wa olliye arive muthu tti mukumi vamiitthoni vaye.”

³⁹ Vano amodda a ahuddihi a malamulo yaallota wi, “Mohaakhulla phaama, Ahuddihi!”

⁴⁰ Nave kheyaallipalle murima wi emukohe makoho mamodda.

Nikoho na Mesiya

⁴¹ Yesu ahaakoha wi, “Enallota mwawiidde dda Mesiya* wi tti edduullu ya Davide?

⁴² Vawi Davide yeekhaaye aallota mu Nibukhu na Masalimo wi, ‘Apwiya yahaalleella apwiyaaka wi, “Khalla o nnattanatta naka

⁴³ ophiyera kaatthattusalle adanaawo voonyingallavo manyallwaawo.” ’

⁴⁴ Sika Davide aamuromolla olliye wi Apwiya, Mesiya vano anaakhalle edduullu ya Davide mwawiidde?”

Yesu anaachenjeza dda ahuddihi a malamulo

⁴⁵ Athu attheene yamwiiwelliiwa, Yesu aallota wa oohudderaaye wi,

⁴⁶ “Chenjerani ni ahuddihi a malamulo vawi ennakonda weeteeta ewanre mikanjo ddiwa ni ovahiwa mooni moolemu mu misika. Ennakondattho otthoolla mipando ddoolemu mu enyumba ddamavekello* ni mapuro oolemu vamachellelloni.

⁴⁷ Ennaachella anaamukhwelle ni waakusella katundwiiwa naari enyumba ddiwa ddene, vawaamarani athu muyeepe owiitthoni ni mavekello oorekama. Ollakiwa wiwa oneerokhalla wuullupalli waakhwaranya athu amodda!”