Luka 19 - Mawu a Mulluku

Yesu ni Zakeyu

¹ Yesu va olendwaaye aayeella m'muzindani wa Yeriko.

² Wenko waakhalla muthu nnddina naye Zakeyu. Aari muullupalli a ookhomiha musonkho nave aakhalla ni eyuuma.

³ Nave aapaalla omoona Yesu wi aari aani koma aari ookhuveya, sika khaaworille omoona Yesu ekaamba ya mulloko wa athu.

⁴ Aathamakella vahoollo va mulloko wa athwaayo, awella m'muteekhoni wanamukuyu wi amoone Yesu vawi ayeella musewu yooyo.

⁵ Yesu aphiyalleeye vanipuronimvo, aamuweha Zakeyu allota wi, “Zakeyu, akuva kittha vawi ollello vaava kinaphwanella kakhalle ni weyaano onyumbani wawo.”

⁶ Zakeyu ahaakuva, akittha nave amwaakhella Yesu onyumbani waye moohakallalla.

⁷ Athu attheene yoonillaayo yaananariwa ellota wi, “Ooya akhalle mulleto o enyumba ya muthu oochimwa!”

⁸ Zakeyu ahiimella allota wa Apwiya wi, “Apwiya, kineerokawa variyari eyuumaaka kivelleelle wa athu oohoowa nave ayo kawaakhilleemi ddeko ddiwa mowaalleka, kineerewaahokollosella osese.”

⁹ Yesu aallota wi, “Olliye ni nibanja naye aavullusiwa ollello vawi nayeenettho tti edduullu dda Abrahamu.

¹⁰ Mi, Mwaana a Muthu, kawiille wi kiwaashaashe ni waavullusa athu oohollowa.”

Niphwanaphwaniho na makobiri

¹¹ Athwaayo yaamwiiwa Yesu allotaka. Vano aavirellella ollotanko nave ahaalleella niphwanaphwaniho. Enthawi yeeyo aari vakhuviru ophiya o Yerusalemu nave athu yaganiza wi omwene wa Mulluku wahaatamella.

¹² Yesu aallota wi, “Waakhalla muthu a mu nibanja noovuwa oyo apaalla oya o ellapo yawoorekama wi awarihiwe omwene. Nave apaallattho wi ahokollweelle owaniwa awarihiwa.

¹³ Ahinatimulle, aawiithana allupa muttekwaaye khumi, amuvaha arive muthu nikobiri nimodda aalleella wi, ‘Mweetellekena malonda ophiyera kiweewo.’

¹⁴ Vano athu oowaniwaalle yaanamwiita nave atimullalleeye athwaayo yaamuruma oorumiwa wi allote wi, ‘Hiyaano khaninapaalla wi muthu yoolla akhalle mwenaahu.’

¹⁵ “Koma aawarihiwave omwenoolle nave aahokollweella owaniwa. Vano aawiithana allupa mutteko aavahilleeye makobiraalle wi adduwelle yaapindulallevo ddikavi.

¹⁶ Awaamboolle aawa allota wi, ‘Apwiya, koopindulavo makobiri khumi va nikobiri mwakinnyalleenyunne.’

¹⁷ Mwenoolle aallota wi, ‘Woheera phaama, we mullupa mutteko aphaama! Kaambiiwa waaroromelleya va ddeko dding'onong'ono, oneerokolamulella mizinda khumi.’

¹⁸ Mullupa mutteko aneepiilli aawattho allota wi, ‘Apwiya, koopindulavo makobiri matthanu va nimodda mwakinnyalleenyunne.’

¹⁹ Mwenoolle aallotattho wi, ‘Oneerokolamulella mizinda mitthanu.’

²⁰ “Mullupa mutteko aneeraru aawa allota wi, ‘Apwiya, ngoonani, nikobiri nanyu tti nna, kaanimakille vakuwoni.

²¹ Kaamawoovani kaambiiwa nyuwaano tti muthu awumma murima, munakusa eyo ehiri yaanyu navettho munahata nnddo muhaallilleenyu.’

²² Nave mwenoolle aallota wi, ‘We, mullupa mutteko oonanara murima, kinaathware mawaawo yaayo wi kuuvaanyihe weyaano! Onnadduwella wi miyaano tti muthu awumma murima, ookusa ehiri yaaka nave oohata eyo kihaanlleemi.

²³ Vano kaambiiwa tini wahikongolihalleewe makobiraakaayo wa oopolleyiha makobiri wi miyaano voohokollowani kaakhelle mattheene ni yoopinduleene?’

²⁴ “Ahaalleellattho athu yaari vaavwaayo wi, ‘Mwaakheni nikobirinno nave mumuvahe mullupa mutteko oyo arina makobiri khumi.’

²⁵ Nave yaamulleella wi, ‘Apwiya ookhallana khalle makobiri khumi!’

²⁶ Ahaakhulla wi, ‘Kinimuulleellani wi attheene erina ello, eneerewaanjereriwa ddimodda koma ayo ehinna ello naari ddooyeva eriiwanannddo eneerewaakhiwa.

²⁷ Vano wa adanaaka ayo yahipaalla wi kikhalle mweniiwa, akuseni muweena wuno nave muwiiphe kiwoonaka!’ ”

Yesu anavollowa mu Yerusalemu

²⁸ Yesu amallihalle ollota ddenndda, aavirellella oya o Yerusalemu.

²⁹ Aatamenlleeye matawoni a Betefage ni Betaniya vakhuviru ni mwaango wa Olivi, ahaarumiha oohudderaaye eelli wi ehoolle.

³⁰ Ahaalleella wi, “Khaweni m'muzi muhoollo mwanyu. Wenko mwaphiya muneeromuphwanya mwaana a bulu oomakellelliwa, oyo ahinawelliweke nikhalle nene. Mwamuttaphulle muweena wa miyaano.

³¹ Muthu uukohani wi, ‘Kaambiiwa tini muneereenyu yeeyo?’ Mumulleelle wi, ‘Apwiya ennampaalla.’ ”

³² Yaavenya eya yaphwanya ddittheddene ddiri moollikana ni mmo Yesu allotilleeye.

³³ Yamuttaphulliiwa bulooyo, aneenaayo yaallota wi, “Munamuttaphullella tini?”

³⁴ Yahaakhulla wi, “Apwiya aakhalla ni mutteko,”

³⁵ Yaawaana wa Yesu mwaana a bulooyo, yaanddellella ddawiikhuneella ddiwa va yooyo nave emuwellihavo Yesu.

³⁶ Bulooyo eeteeye, oohudderaayo yahaanddellella ddawiikhuneella ddiwa m'musewuni.

³⁷ Aatamenlleeye o Yerusalemu, voosesereya va mwaango wa Olivi, mulloko muullupalli wa oohudderaaye yaamutitimiha Mulluku moohakallalla ni mawu oowella ekaamba ya ddeko ddoottikhiniha yoonilliiwa wi,

³⁸ “Oodalisiwa Mwene oyo anawa mu nnddina na Apwiya! Murendelle oddullu nave ntitimiho wa Mulluku!”

³⁹ Afarisi* amodda ayo yaari m'mullokonimmo yaallota wa Yesu wi, “Ahuddihi, amaalliheni oohudderaanywaalla!”

⁴⁰ Yesu aawaakhulla wi, “Kinimuulleellani naari emanlle alliwaalla, mallukwaalla eneerokhuwa.”

Yesu anamwinllella Yerusalemu

⁴¹ Aatamenlleeye o Yerusalemu nave awoonilleeye muzindooyo, aawinllella

⁴² Nave aallota wi, “Waaweerokhalla phaama waadduwenlleke ollello ddeko ddoopaalleya wi murendelle owe! Koma ddoovitthiwa wi miitthwaawo ehiddooneke!

⁴³ Enthawi eneerophiya yawi adanaawo eneerokata malliti moowaapheella nave eneerewaapheella embali ddittheddene.

⁴⁴ Eneerowiiphani nimodda ni aniinyu nave khavikhalla nlluku naari nimodda va nikhwaaye nihinaamorihiwe ni alliwaayo. Vawi khamwaapwathille dda enthawi eyo Mulluku awiilleeye wi uuvulluseni!”

Yesu anawiikariha athu mu enyumba ya Mulluku

⁴⁵ Vano Yesu aavollowa mu enyumba ya Mulluku aamba owiikarihamo athu yakulliha ddeko ddiwa.

⁴⁶ Nave aallota wi, “Mulluku aallota mu mawaaye wi, ‘Enyumbaaka ekhalle enyumba yoovekellamo.’ Koma nyuwaano mooyitthattusa nipuro nawiipitthamo allupaawiiya!”

⁴⁷ Nllapo ni nllapo Yesu aanahuddiha mu enyumba ya Mulluku. Nave allupa mukutho uullupalli, ahuddihi a malamulo* ni attekweene a Ayuda* yaanaashaasha ettilla yoomwiiphella.

⁴⁸ Koma kheyaaphwanyille ettilla yoomwiiphella kaambiiwa athu attheene yamwiiwenlle yahaakonda mawaaye wunchichi sika kheyaapaalla ohiyanana.