Luka 18 - Mawu a Mulluku

Niphwanaphwaniho na naamukhwelle ni aweeruza

¹ Yesu ahaalleella oohudderaaye niphwanaphwaniho nowaahuddiha wi enaphwanella wi evekelleke mallapo mattheene, oohitopa.

² Ahaalleella wi, “Mu etawoni emodda mwaakhalla muthu aweeruza millatu oyo ahimoova Mulluku naari opwatha dda muthu.

³ Mwaakhallattho naamukhwelle mu etawoni yeeyo oyo aweesa wa aweeruzoolle amuvekaka wi, ‘Mukeeruzelle mullatwaaka wi okeetelle phaama ohiyana ni mudanaaka.’

⁴ Vaavira mallapo manchichi oweeruzoolle amukhootellaka koma omamallihello wene aallota yeekha m'murimani mwaye wi, ‘Naari nginamoova Mulluku apaalle opwatha dda athu,

⁵ kineeromweeruzella mullatwaaye vawi naamukhwelloolla animakihoosa. Kaaheera ddiiddo aneerekowaave nave aneerokitopiha!’ ”

⁶ Nave Apwiya yaallota wi, “Ganizerani ddallotille aweeruza oohikhalla ni echilungamoolle.

⁷ Koma Mulluku aneeroweeruzella millatu wi ddiweetelle phaama athu ootthoolliwaaye ayo enamuveka otthaana ni mahiiyu wi ddiweetelle phaama. Nave khaselliha nikavihero naye.

⁸ Kinimuulleellani wi, aneerewaakuva oweeruzella millatu ddiwa wi ddiweetelle phaama. Koma ethiyo mi Mwaana a Muthu kaahokollowaka kineerophwanya echikhulupililo va ellapo yavatthi?”

Niphwanaphwaniho na Mufarisi ni ookhomiha musonkho

⁹ Yesu ahaalleella niphwanaphwaniho athu ayo yiikhulupilila weekhiiwa wi tti oolungama yaavevullaka athu attheene.

¹⁰ Aallota wi, “Waakhalla athu eelli ayo yayiille o enyumba ya Mulluku wi yavekelle. Mmoddooyo aari Mufarisi,* mmoddooyo aari ookhomiha musonkho.

¹¹ “Mufarisooyo ahiimella vayeekhaaye avekella wi, ‘Mulluku kinimuuthokozani vawi ngiri wonanko athu amoddaalla ayo eri a nrima, oohikhalla ni echilungamo, ooraruwa apaalle wonanko ookhomiha musonkhoolla.

¹² Kinnahalla ocha* wiilli vamulunguni nave kinnavelleellattho yaneekhumi ya ddittheddene kiriimina.’

¹³ “Koma ookhomiha musonkhoolle ahiimella voorekamella naari khaatukhunlle ekhovaaye oweha oddullu koma aamoona odduukutha vakhakaddani vaye allotaka wi, ‘Mulluku mukeerelle echifundo, miyaano muthu oochimwa!’ ”

¹⁴ Yesu aallotave wi kinimuulleellani wi, “Ookhomiha musonkhoolla aaya owaniwa alungamihiwe koma ohiri Mufarisoolle. Vawi attheene enaddunnuwiha weekhiiwa eneeroyevihiwa nave ayo eniiyeviha weekhiiwa eneerewunnuwihiwa.”

Yesu anaadalisa anamwani

¹⁵ Athu amodda yaawaana aniiwa wa Yesu wi iiyaatthi mattaaye va alliwaayo wi aadalise. Koma oohuddera vawoonani ddenndda yahaahumullulla athwaayo.

¹⁶ Koma Yesu aawiithana anamwanaayo allota wa oohudderaayo wi, “Ahiyeni anamwanaayo ewe wa miyaano, muhaahiihe kaambiiwa omwene wa Mulluku tti wa athu ookhalla wonanko anamwanaalla.

¹⁷ Ddawoona, kinimuulleellani wi, muthu oohaakhullella omwene wa Mulluku wonanko mwaana aneerelleeye khavollowamo.”

Muthu eeyuuma

¹⁸ Muthu mmodda a attekweene a Ayuda* aamukoha Yesu wi, “Ahuddihi aphaama, keere tini wi kaakhelle okumi woohimalla?”

¹⁹ Yesu aamukoha wi, “Onakeera miyaano muthu aphaama kaambiiwa tini? Khaavo muthu ari aphaama koma Mullukuve.

²⁰ Onnadduwella malamulo a Mulluku awi, ‘Ohiraruwe, ohiiphe, ohiiye, ohivelleelle omboni wawoottha, waavaheke olemu attiittho ni amaayo.’ ”

²¹ Muthoolle ahaakhulla wi, “Waambeella kiri mwaana, kaawiiwellella malamulo mattheenaalla.”

²² Yesu iiwalleeye ddenndda aallota wa olliye wi, “Onayelleella ello emodda. Khawe wakullihe ddeko ddittheddene oriiwena nave makobiraayo waavahe athu oohoowa nave oneerothuviwa oddullu. Weera ddiiddo owe okithware.”

²³ Muthooyo iiwalleeye ddenndda aakhupanya wunchichi kaambiiwa aakhalla ni eyuuma yinchichi.

²⁴ Yesu oonilleeye wi aakhupanya wunchichi aallota wi, “Tti wookatamiha wi athu eeyuuma yavollowe mu omwene wa Mulluku!

²⁵ Tti yavakhuviru wi ekamira* evire vamullakoni va singano ohiyana ni wi muthu eeyuuma avollowe mu omwene wa Mulluku.”

²⁶ Vano awiiwaayo yaakoha wi, “Ttaani vano, anaawore ovulluwa?”

²⁷ Yesu aawaakhulla wi, “Ddoohiworeya ni athu ddinaworeya ni Mulluku.”

²⁸ Vano Petro aallota wi, “Noohiya ddeko ddittheddene nuuthwarani nyuwaano.”

²⁹ Yesu aallota wi, “Ddawoona, kinimuulleellani wi, muthu ahiyalle enyumbaaye apaalle mwaariye apaalle asinne apaalle makhollwaaye apaalle anaaye ekaamba ya omwene wa Mulluku,

³⁰ aneerewaakhella mallapo yaalla ddeko ddawaata navettho mallapo amuhoollo, okumi woohimalla.”

Yesu anallota waneeraru dda okhwa waye

³¹ Yesu ahaakusella oohuddera khumi ni eelli vakhwipi allota wi, “Ninaya o Yerusalemu nave ddittheddene ddalembiwe ni anamallotella dda mi, Mwaana a Muthu, ddineerokwakhwanihiwa wenko.

³² Kineerovelleelliwa wa athu ayo ehiri Ayuda, eneerokeerella epewe, eneerokuukutha nave eneerokittaphera mare.

³³ Eneerokiwashulla nave eneerokiipha koma vavira mallapo mararu kineerovenya wa ookhwa.”

³⁴ Oohudderaayo kheyaawiiwesesille ddeko ddenndda. Ottaphullella wa mawu yaalla waari woovittheya wa alliwa nave kheyaadduwenlle wi Yesu anallota dda tini.

Yesu anamuchiriha muthu oohoona

³⁵ Yesu aatamenlleeye o muzinda wa Yeriko, waakhalla muthu ooveka, oohoona oyo akeraatthille mukhwipi mwa musewu.

³⁶ Muthu oohoonooyo iiwalleeye wi mulloko wa athu waamavira ahaakoha wi, “Eneereya tti tini?”

³⁷ Athwaalle yaamwaakhulla wi, “Yesu a o Nazareti animavira.”

³⁸ Nave aakhuwa wi, “Nyu Yesu, edduullu ya Davide, mukeerelle echifundo!”

³⁹ Athu yaari vahoollo yaamusimwella wi amaalle. Koma aakhuwa wi, “Yesu, Edduullu ya Davide, mukeerelle echifundo!”

⁴⁰ Vano Yesu ahiimella aalamulella athu wi eweena muthu oohoonooyo wa olliye. Aphiyalleeye vakhuviru, Yesu aamukoha wi,

⁴¹ “Onapaalla wi kiweerelle tini?” Ahaakhulla wi, “Apwiya kinapaalla wi kooneke.”

⁴² Yesu aallota wi, “Onaka! Echikhulupilwaawo yohuuchiriha.”

⁴³ Enthawi yeeyo ahoona nave ahaamba omuthwara Yesu amutitimihaka Mulluku. Nave athu attheene yoonille ddenndda, yaamutitimihattho Mulluku.