Luka 15 - Mawu a Mulluku

Niphwanaphwaniho na enkhosa yoohollowa

¹ Nllapo nimodda athu attheene ookhomiha musonkho ni athu oochimwa yaawa wa Yesu wi yiiwe mawaaye.

² Afarisi* ni ahuddihi a malamulo* yaananariwa ellota wi, “Muthoolla annawaakhella athu oochimwa naari ochana wene.”

³ Vano Yesu ahaalleella niphwanaphwaniho wi,

⁴ “Mmodda a nyuwaano akhalla ni enkhosa ddaye 100 nave emodda ehollowa, anaaweere tini? Aneerohiya ddimoddannddo 99 voochihani vaavo aya aashaashaka emodda yooholloweeyo ophiyera ayiphwanyille.

⁵ Ayiphwanya aneeroyitukhulla vamathurini vaye moohakallalla.

⁶ Aphiyana owaniwa, aneeroowiithana akhwaaye ni athu awaatamanana nave aneerollota wi, ‘Hakallallani ni miyaano vawi kooyiphwanya enkhosaaka yooholloweelle.’

⁷ Sika kinimuulleellani wi, emoddamoddave yeeyo oddullu oneerokhalla ehakallallo ekaamba ya muthu oochimwa mmodda arukunuwa murima ohiyana ni athu 99 ayo enaganiza wi tti oolungama nave khenapaalla orukunuwa murima.

Niphwanaphwaniho na nikobiri noorimeella

⁸ “Mutthiyana ookhalla ni makobiraaye khumi nave arimeehavo nikobiri, anaaweere tini? Aneerokhariha enyalaaye, aneeroshella mpa mutthemwenemmo, aashaasha mwawiithaallella virive veko ophiyera aniphwanyille nikobirinno.

⁹ Aniphwanya, aneeroowiithaniha akhwaaye ni athu awaatamanana nave aneerollota wi, ‘Hakallallani ni miyaano vawi kooniphwanya nikobiri naka narimellenne.’

¹⁰ Sika, kinimuulleellani wi, emoddamoddave yeeyo angelo a Mulluku ennahakallalla kaambiiwa muthu oochimwa mmodda oorukunuwa murima.”

Niphwanaphwaniho na mwaana oorimeella

¹¹ Yesu aavirellella ollota wi, “Muthu mmodda aakhalla ni anaaye eelli aallopwana.

¹² Mwaana mung'onong'onooyo aallota wa attiitthinnyaayo wi, ‘Attiitthaaka mukikawelle nnddo ddinaakhalle ddaaka va eyuumeenyweella.’ Vano attiitthiiwaayo yahaakawella aniiwaayo eyuumeeyo.

¹³ Viviralle mallapo ooyeva, mwaana mung'onong'onooyo aakulliha ddeko ddaye ddittheddene nave aavenyavo ni makobiraaye aya o ellapo yorekamella. Wenko ahaachella makobiraayo vaweerani makhallello oovudduwa.

¹⁴ Nave ahaamalliha makobiraaye mattheene. Enthawi yeeyo mu ellapweeyo mwaavollowa ettalla yawoopiha nave olliyooyo khaahanllena ello yawi acheke.

¹⁵ Vano aaya wa muthu mmodda a mu ellapo yeeyo wi apharekewo mutteko. Muthooyo aamurumiha woochiha ekumba ddaye.

¹⁶ Musombooyo aanapaalla ochana makattha yachiwa ni ekumbannddo koma khaarivo muthu amwinnyalle makatthaayo.

¹⁷ “Vano aadduwella olakwa waye allota m'murimani mwaye wi, ‘Allupa mutteko oowanihu aakhalla ni ddoocha ddinchichi ddawi khenawora oddimalliha koma miyaano wuno kinimakhwa ni ettalla!

¹⁸ Kineerotimulla kiye wa attiitthaaka kallote wi, Attiitthaaka, kaamuchimwella Mulluku ni nyuwaano.

¹⁹ Nginaphwanellattho oromolliwa wi mwaninyu, mukaakhullelle wi kikhalle wonanko allupa muttekwaanyu.’

²⁰ Vano aatimulla ahokollweella wa attiitthinnya. “Aweeye voorekama ni owaniwanko attiitthinnyaayo yaari emonne khalle. Vano yammorella ethakaraka wunchichi emuthamakella nave yaamuvaha mooni voomukhupaarellani.

²¹ Vano mwaanooyo aallota ni attiitthinnyaayo wi, ‘Attiitthaaka, kaamuchimwella Mulluku ni nyuwaano. Nginaphwanellattho oromolliwa wi mwaninyu.’

²² Koma attiitthinnyaayo yaallota wa mullupa mutteko wi, ‘Akuvani mwakuse mukanjo waphaama m'muwarihe. M'muwarihettho emphete o eyaalla ni esapato omanyalloni waye.

²³ Khaweni mwayikusettho eng'ombe yooneneva mwiiphe wi niche ni ohakallalla!

²⁴ Vawi mwanakoolla aari wonanko ookhwa, vano tti mukumi. Aarimeella, vano oophwanyeya.’ Vano yahaamba ohakallalla vamachellelloni.

²⁵ “Nave mwanaye muullupalli aari omata. Vano aatamenlleeye onyumbaninko ahiiwa wiipa ni wiina.

²⁶ Sika aamwiithana mmodda a allupa mutteko amukoha wi, ‘Eneereya tini?’

²⁷ Mullupa muttekooyo aamwaakhulla wi, ‘Mwanamunno oohokollowa sika attiittho aamwiiphella eng'ombe yooneneva kaambiiwa oohokollowa ari mukumi.’

²⁸ “Mwaana muullupalloolle aasha murima wawi khayiillettho onyumbani wulle nave attiitthinnya yaakhuma emuveka wi avollowe.

²⁹ Koma olliyooyo aawaakhulla attiitthinnyaayo wi, ‘Miyakha ddittheddenenndda kohuupharellani mutteko wonanko kaporo nave ngihiyalle wiiwellella malamulwaanyu. Koma khamwaakinnyalle naari mwanapuri wi kihakallalle ni akhwaaka!

³⁰ Mwaninyoolla ohoononga eyuumaanyu ettheene ni atthiyana ooraruwa. Nave ahokollowilleeye, moomwiiphella eng'ombe yooneneva!’

³¹ Attiitthinnyaayo yahaakhulla wi, ‘Mwanaka, weyaano ori ni miyaano mallapo mattheene nave ddaaka ddittheddene tti ddaawottho.

³² Sika onnaphwanella wi nihakallalle, vamachellelloni kaambiiwa mwanamunno aari wonanko ookhwa, vano tti mukumi. Aarimeella, vano oophwanyeya.’ ”