Luka 14 - Mawu a Mulluku

Yesu anamuchiriha muthu oovoriiwa

¹ Va nllapo na Sabata Yesu aaya o enyumba ya mmodda a attekweene a Afarisi* wi ache nave yaamweetellella.

² Vano muthu oovoriiwa ereta yawiipa meto ni miwono aawa wa Yesu.

³ Yesu ahaakoha ahuddihi a malamulo* ni Afarisi wi, “Malamulwaahu ennaakhullella omuchiriha muthu va nllapo na Sabata?”

⁴ Koma alliwaayo yaamaalleya. Vano Yesu aamukusa muthoolle amuchiriha nave aamulleella wi avenyevo.

⁵ Nave ahaakohattho wi, “Ttaani a nyuwaano ari ni mwaana amorenlle apaalle eng'ombe emorenlle mwiihimeni va nllapo na Sabata, khawa amukhumihamo apaalle ayikhumihamo enthawi yeeyo va nllapo na Sabata nenno?”

⁶ Athwaalle kheyaaworille omwaakhulla.

Wiiyeviha ni owaakhella alleto

⁷ Yesu awoonilleeye athu ayo yiithaniwe wi achena etthoollaka mipando ddoolemu, ahaallotella niphwanaphwaniho wi,

⁸ “Mwaneena a okwati awiithana omachellelloni, ohitthoolleke okeraatthi vampandoni woolemu kaambiiwa apaalle mwaneenooyo aamwiithana muthu oolemu ookhwaranya weyaano.

⁹ Sika mwaneena awiithanilleni attheenenyu aneerollota wa weyaano wi, ‘Mvahe muthoolla mpandwaawo.’ Nave vookitthani wi wakeraatthi vatthi oneerowulliwa muru.

¹⁰ Koma wiithaniwa, khawe wakeraatthi vatthi vawi mwaneena awiithanooyo aneerollota wi, ‘Mukhwaaka, khawe wakeraatthi vampandoni valle,’ Ddenndda ddineereweeriha wi ovahiwe olemu vamiitthoni va athu attheene ewiille va machellellomvo.

¹¹ Vawi attheene enaddunnuwiha weekhiiwa eneeroyevihiwa nave ayo eniiyeviha weekhiiwa eneerewunnuwihiwa.”

¹² Nave Yesu aallota wa muthu amwiithanillooyo wi, “Waavahaka yoocha yootthaana apaalle yamisikuwa ohiwiithaneke akhwaawo apaalle abalaawo apaalle a nlloko nawo apaalle awaatamanana eeyuuma vawi ni alliwattho eneerowiithana wi yuuhokolloselle.

¹³ Waakhozaka machellello, owiithane oohoowa, oorakalla, ookhwa meto, oohoona.

¹⁴ Vano oneerokhalla muthu oodalisiwa kaambiiwa khewora wuuhokollosella koma Mulluku sika anuuhokolleselle va nllapo nno athu oolungama eneeriiwa evenyihiwe wa ookhwa.”

Niphwanaphwaniho na machellello uullupalli

¹⁵ Mmodda a athu ayo yacha ni Yesu iiwalleeye mawaalla aallota ni Yesu wi, “Oodalisiwa tti muthu anaawe akhallevo vamachellelloni mu omwene wa Mulluku.”

¹⁶ Yesu aallota wi, “Waakhalla muthu mmodda akhozille machellellwaaye uullupalli, aawiithana athu anchichi.

¹⁷ Ekwakhwanne enthawi ya machellello, aamuruma mullupa muttekwaaye wi aalleelle alleto awiithaniwaalle wi, ‘Waawoni, ddeko ddittheddene ddohiithwa!’

¹⁸ Nave athwaalle mmoddammodda yahaamba ollota ddookhupanya ddiwa. Awaamba aallota wi, ‘Tti okulla wene emataaka, vano kinaphwanella kayoone, sika akhullellani okhupanya waka.’

¹⁹ Mmoddooyo aallota wi, ‘Tti okulla wene eng'ombe ddaka ddoollima khumi, vano kinaaka keesere ollimana, sika akhullellani okhupanya waka.’

²⁰ Mmoddooyottho aallota wi, ‘Ttuutthella wene, sika ekaamba ya yeeyo ngiwora owa.’

²¹ Mullupa muttekoolle aahokollowa nave aalleella ddittheddene apwinnyaalle. Vano apwinnyaayo yaasha murima emulleella mullupa muttekoolle wi, ‘Akuva, khawe omisewuni ni o ettilla dda etawoneella nave waweena athu oohoowa, oorakalla, oohoona ni ookhwa meto.’

²² Nave mullupa muttekooyo awiithanille athwaayo aallota wi, ‘Apwiya, mwaakilamulalleenyu koheera koma enyumbeeyo kheddanlle.’

²³ Nave apwinnyaalle yaamulleellattho mullupa muttekoolle wi, ‘Khawe omisewuni ni ettilla dda otte wa etawoneella nave waawatihere athu wi ewe ophiyera enyumbaakeella eddanlle.

²⁴ Kinimuulleellani wi khaavo naari mmodda awiithaniwaalle oyo anaallawihe machellellwaakaalla.’ ”

Ddoophwanelliha wi okhalle oohuddera

²⁵ Mulloko wa athu anchichi waamuthwara Yesu, vano aarukunuwa allota wa athwaayo wi,

²⁶ “Muthu aapaallaka okhalla oohudderaaka akikondeke miyaano ohiyana ni attiitthinnya ni amennya, mwaariye ni anaaye, asinne ni arokoriye naari okumaayeene.

²⁷ Ayo ehinatukhulla mutandiiwa ekithwara miyaano khenaphwanella okhalla oohudderaaka.

²⁸ “Ttaani a nyuwaano apaalla omaka enyumbaaye yootthinddaanyerana khanaamba akeraatthi nave eerengella makobiri wi oone aari arina ookwakhwanella omalliha muttekooyo?

²⁹ Waaheera ddenndda nave waahiwora omalliha omaka enyumba yeella otthattille matthipello, athu vawoonani ddenndda eneerewuuttheya.

³⁰ Eneerollota wi, ‘Muthu yoolla ahaamba omaka enyumbaaye koma khawonre omalliha mutteko yoolla!’

³¹ “Ttaani mwene anaya okhotoni wi awane ni mukhwaaye, ahinaambe okeraatthi aganizera wi awoone akhotwaaye 10,000 yaarimi eri ookwakhwanella owana ni akhoto a mmoddoolle, ayo eri 20,000?

³² Vano oona wi khawora owanana ari voorekamellana aneeromuruma muthu wi akumane ni mmoddoolle wi aveke murendelle.”

³³ Yesu aamalliha ollota ni mawu awi, “Khaavo a nyuwaano anaawore okhalla oohudderaaka ahinahiye ddeko ddittheddene ariiyena.”

Mwiinyu wootthulluwa

³⁴ “Mwiinyu tti waphaama koma watthulluwa khoweerihiwattho wi oddiveke.

³⁵ Khokhallattho waphaama owuhella m'matani wonanko manyowa koma owutathilla. Ngiiwani vano mwaarina maaru awiiwana!”