Luka 13 - Mawu a Mulluku

Orukunuwa murima apaalle okhwa

¹ Va enthawi yeeyo waari athu amodda ayo yawiille wa Yesu, emulleellaka dda Agalileya ayo yiiphiwe ni Pilato eheraatthiki mukutho wa Mulluku.

² Yesu ahaakoha wi, “Muneesa wi Agalileyaayo yaari oochimwesesa ohiyana ni Agalileya attheene kaambiiwa yiiphiwe mwawi ddiidda?

³ Iyaayi koma kinimuulleellani wi mwaahirukunuwa murima nanyeenettho muneerokhwa wonanko yaayo.

⁴ Nave muneesa wi athu 18 yaphittiwe ni enyumba yootthinddaanyerana yakumuwalle o Shilowamu mu Yerusalemu, yaari oochimwa ohiyana ni athu attheene ookhalla o Yerusalemunko?

⁵ Iyaayi koma kinimuulleellani wi mwaahirukunuwa murima nanyeenettho muneerokhwa wonanko yaayo.”

Niphwanaphwaniho na muteekho wanamukuyu woohimma

⁶ Yesu ahaalleella niphwanaphwaniho wi, “Waakhalla muthu mmodda oyo aari ni muteekho wanamukuyu oyo waalliwe m'matani mwaye mwa ezipaso ddampesa. Aaya wi aashemo ezipaso ddanamukuyu koma khaaphwanyillemo.

⁷ Vano aallota wa oomullimella wi, ‘Ngoona, miyakha miraru ddoomalla kiwaaka wi kaashe ezipaso ddanamukuyu ohiphwanyamo, uhavo! Okhallekeve onanarihaka ethaya kaambiiwa tini?’

⁸ Oomullimelloolle ahaakhulla wi, ‘Apwiya, uhiyeni muyakha mmoddave yoolla, kineerowukatella mukhwipimmo kihellemo manyowa.

⁹ Vano muteekhoolla wimma muyakha woosiisello, ddaphaama koma waahimma, oneerewuuhiwavo.’ ”

Yesu anachiriha va nllapo na Sabata

¹⁰ Va nllapo na Sabata Yesu aanahuddiha mu enyumba yamavekello.

¹¹ Mwemmo mwaakhalla mutthiyana ookhalla ni munepa woonanara, oyo wamweeriha wi avoriiweke wa miyakha 18. Aari ookhoromana mutthana wawi khaawora wiimella mowookowa.

¹² Yesu amoonilleeye, aamwiithana allota wi, “Moowe, moottaphulliwa o eretaanyu!”

¹³ Vano ahiiyaatthi mattaaye va olliyooyo nave enthawi yeeyo ahookowa iimella, amutitimiha Mulluku.

¹⁴ Vano muttekweene a mu enyumba yamavekello mulle aasha murima kaambiiwa Yesu aachiriha va nllapo na Sabata nave ahaalleella athu attheene wi, “Vookhalla mallapo matthanu ni nimodda oowaakhullelliwa ophara mutteko, muweeke mallapo yaalla muchirihiweke, ohikhalla va nllapo na Sabata!”

¹⁵ Apwiya yahaakhulla wi, “Awoottha nyu! Khe nyuwaano munattaphulla eng'ombe ddanyu apaalle abulwaanyu vamukweeni muyaakana wowaawiryiha maaddi va nllapo na Sabata?

¹⁶ Nave ollattho nayeene tti edduullu ya Abrahamu oyo amakiwe ni Satana wa miyakha 18. Vano ahittaphulliwe va nllapo na Sabata?”

¹⁷ Waakhulla wonngu wahaawulliha muru adanaaye attheene koma athu amodda attheene yaahakallalla ni ddeko ddittheddene ddoottikhiniha eerilleeye.

Niphwanaphwaniho na mmiddo wooyevesesa

¹⁸ Yesu ahaakoha wi, “Omwene wa Mulluku tti wonanko tini? Nave omwenooyo kinawuuphwanaphwanihe ni tini?

¹⁹ Tti wonanko mmiddo wa muteekho wa masitadi oyo muthu awumiddalleeye m'matani mwaye. Wahunnuwa okhalla muteekho muullupalli nave epallame ddinnamaka emphuru ddiwa mu enthambi ddaye.”

Niphwanaphwaniho na yisiti

²⁰ Yesu aallotattho wi, “Omwene wa Mulluku kinawuuphwanaphwanihe ni tini?

²¹ Tti wonanko yisiti oyo mutthiyana aamuttakanyihereeye ni othu wa tirigu munchichi ophiyera waafufuma muttheene.”

Mullako mung'onong'ono

²² Yesu aheeta m'matawoni ni m'mizi aahuddihaka athu voolendonaaye wooya o Yerusalemu.

²³ Muthu mmodda aamukoha wi, “Apwiya, oovullusiwaayo enaakhalle athu ooyevave?” Yesu aawaakhulla wi,

²⁴ “Mullipihelle ovollowella va mullako mung'onong'ono kaambiiwa, kinimuulleellanithi wi athu anchichi eneereweesa ovollowellavo koma khewora.

²⁵ Vano mwaneena a enyumbeeyo aneerowalla o mullako nave amodda a nyuwaano muneerewiimella vaatte, mookothaka vanchiwini mullotaka wi, ‘Apwiya, nihullelleni.’ Olliye aneerewaakhulla wi, ‘Nginuudduwellani. Munavenyera wuuwi?’

²⁶ Nave muneerewaakhulla wi, ‘Hiyaano naacha nave naawirya vamodda ni nyuwaano nave mwaahuddiha etawoni yoowanihu!’

²⁷ Aneerollotattho wi, ‘Nginuudduwellani. Munavenyera wuuwi? Mukivenyerevo, attheenenyu athu oonanara!’

²⁸ Vano muneerewinlla ni okhuuriha miino voowoonani makhollwaahu, Abrahamu, Isaki ni Yakobo ni anamallotella attheene mu omwene wa Mulluku. Nyuwaano muvokhiwe vaatte.

²⁹ Athu eneerovenyera wookhuma nndduwa ni woovollowa nndduwa, ompoto ni omwera nave eneerocha va machellello mu omwene wa Mulluku.

³⁰ Nave anchichi ayo eri awaamba eneerokhalla ookomihera nave ayo eri ookomihera eneerokhalla awaamba.”

Yesu aninllella muzinda wa Yerusalemu

³¹ Enthawi yeeyo Afarisi* amodda yaawa wa Yesu ellota wi, “Muvenyewo wuno muye waamodda wene kaambiiwa Herode* anapaalla awiipheni.”

³² Yesu ahaalleella wi, “Khaweni mwamulleelle khatwe, Herode wi kinaakhumihe minepa ddoonanara ni waachiriha athu ollello ni osiisello nave omuroto kineeromalliha muttekwaaka.

³³ Navettho kinaphwanella kikhwaranyeke voolendonaaka ollello, osiisello ni omuroto vano kaambiiwa khe waphaama wi namallotella akhwe otte wa Yerusalemu.

³⁴ “Yerusalemu, Yerusalemu! Athwaawo ennawiipha anamallotella nave ennaavokha malluku owiipha athu yarumihelliwiiwa ni Mulluku! Tti mallapo makavi kapanlleemi waakhupaarella athwaawo attheene wonanko mwanakhu anaakhupaarelleeye asaanaaye vatthi va muuphellwaaye koma nyuwaano khamwaapanlle.

³⁵ Vano muzindaanyu oneerohiyiwa moohikhalla ello. Kinimuulleellani wi waambeella vano ophiyera muhoollo khamuwa mukoonattho, ophiyera muneerollota wi, ‘Oodalisiwa tti oyo anawa mu nnddina na Apwiya.’ ”