Luka 11 - Mawu a Mulluku

Dda nivekello

¹ Nllapo nimodda Yesu aavekella vanipuroni nimodda nene. Amallihalleeye, mmodda a oohudderaaye allota wi, “Apwiya nihuddiheni ovekella wonanko Yohane aahuddihalleeye oohudderaaye.”

² Nave Yesu aallota wi, “Mwaavekellaka, mulloteke wi, ‘Attiitthiihu, nnddina nanyu naweella nititimihiwe, omwenaanyu owe.

³ Munivahe nllapo ni nllapo yoocha ya nllapo ni nllapo.

⁴ Munikhululukelle machimwaahu, vawi ninnaakhululukella attheene enanilakwella. Nave muhinikuselle woweesiwa.’ ”

⁵ Yesu aallotattho wa oohudderaaye wi, “Ngaphwanaphwanihani wi nyuwaano mooya o enyumba ya mukhwiinyu variyari va mahiiyu mullota wi, ‘Mukhwaaka, okipolleye buledi mitthi miraru.

⁶ Mukhwaaka ari voolendonaaye sika oophiya onyumbani wakanngu nave nginna yoocha yawi kimuvahe.’

⁷ Nave ngaganizerani wi mukhwiinyu awaakhullani wi, ‘Ohikihoose! Mullako tti woowalla khalle nave anaaka aakona, sika ngiwora ovenya wi kuuvahe weyaano ello.’

⁸ Kinimuulleellani wi aahivenya awinnya buledi kaambiiwa tti mukhwaawo, aneerovenya ekaamba ya ntthitti nawo na ovekanko uuvaha ddittheddene onapaalleewe.

⁹ Sika kinimuulleellani wi, vekani nave muneerewaakhella; ashaashani nave muneerophwanya; okothani nave nchiwi nineerohulliwa wa nyuwaano.

¹⁰ Vawi attheene ayo enaveka eneerewaakhella nave ayo enaashaasha eneerophwanya nave oyo anookotha aneerohullelliwa nchiwi.

¹¹ Ttaani mwa nyu attiitthi anaamuvahe mwanaye enowa mwaanooyo avekille ehomba?

¹² Apaalle uuvekani nooche munaamuvahe namukalizi?

¹³ Naari muri oonanara munnadduwella waavaha aniinyu ddeko ddaphaama. Vano Attiitthiihu ooddullu enaalephele mwawiidde waavaha Munepa Waweella ayo enamuveka olliye!”

Yesu ni Belezebulu

¹⁴ Vano Yesu aakhumiha munepa woonanara woomweeriha muthu ohillota. Munepooyo wakhumalliiwa, muthooyo aallota nave mulloko wa athu yaari vaavwaayo waattikhina.

¹⁵ Koma athu amodda yaallota wi, “Masiva ookhumihella minepa ddoonanaraalla anavahiwa ni Belezebulu,* muullupalli a minepa ddoonanara.”

¹⁶ Amodda yaamweesa Yesu, voomuvekani echizindikiro yoovenyera oddullu wooniha wi Mulluku sika aamurumalle.

¹⁷ Koma Yesu aadduwella maganizwiiwa nave aallota wi, “Orive omwene wakawaneya va weekhiiwa ni owana, khollekella omalla. Navettho naari nibanja nakawaneya va weekhiiwa ni owana khanillekella omalla.

¹⁸ Sika mulloko mmodda waawanaka ni mmodda mu omwene wa Satana, oyo ari Belezebulu, omwene yooyo onaavirellelle mwawiidde? Kinuulleellani ddenndda vawi munallota wi kinnakhumiha minepa ddoonanara ni masiva a Belezebulu.

¹⁹ Miyaano kaakhumihaka minepa ddoonanara kaambiiwa Belezebulu sika anakivaha masiva aweerella ddenndda, vano aanaavaha oothwarellellaanyu masiva ooddikhumiha ttaani? Ddineera oothwarellellaanyu ddineeroweeruzani wi nyuwaano tti oolakwa vookiphwanyellani mullatu!

²⁰ Koma kaakhumihaka minepa ddoonanara ni masiva a Mulluku ddinnooniha wi omwene wa Mulluku woowa khalle wa nyuwaano.

²¹ “Muthu amasiva aaweheraka ddeko dda mu enyumbaaye akusalle ezida ddaye, ddeko ddayennddo ddinnakhalla phaama.

²² Koma wawa muthu amasiva oomukhwaranya amugonjiha, annamwaakha ezida aroromelleeyennddo nave akawakawa ddeko aakhilleeyennddo.

²³ “Muthu oyo ahiniiwanana ni miyaano, yooyo annakikhoota miyaano navettho oyo ahinakikavihera waatthukumaniha athu mu omwene wa Mulluku yooyo annaamwaramwasa athu mu omwene wa Mulluku.

Ohokollowa wa munepa woonanara

²⁴ “Munepa woonanara wakhuma mwa muthu, onneeteeta m'mapuroni awumma waashaasha vawiithuuwella. Koma waahiphwanya, onnallota weekhiiwa wi, ‘Kinahokollweella onyumbani waka yakhalle!

²⁵ Nave wawa onaphwanya mpammo muri mooshelliwa ni moopotokosiwa phaama.’

²⁶ Vano onnakhuma oya wakusa minepa ddimodda mitthanu ni miilli ddoonanara ohiyana ni olliyooyo nave ddinnawa ddivollowa ddinakhalla mwemmo. Vano muthooyo makhallellwaaye voomallihella ennakhalla oonanara ohiyana ni vawaamba valle!”

Ehakallallo yawoona

²⁷ Yesu allotilleeye ddenndda, mutthiyana mmodda oovenyera m'mullokoni wa athwaayo aallota moollipiha wi, “Oodalisiwa tti mutthiyana oyo uuyanreni nave awaamwihani!”

²⁸ Koma Yesu aallota wi, “Oodalisiwa tti ayo eniiwa mawu a Mulluku ewiiwellella!”

Oveka echizindikiro

²⁹ Athu yatthukumanniiwa moomwaapheella Yesu, ahaamba ollota wi, “Athu a mbadoolla tti oonanara, enakiveka echizindikiro. Kheyiivo echizindikiro enaavahiwiiwa koma ya namallotella Yonave.

³⁰ Vawi Yona aari echizindikiro ya athu a o Nineve. Emoddamoddave yeeyo Mwaana a Muthu aneerokhalla echizindikiro ya athu a mbadoolla.

³¹ Va nllapo na echiweruzo mwene aamutthiyana a ellapo ya Sheba aneerovenya ni athu a mbadoolla. Nave aneerewaavaanyiha kaambiiwa aheeta olendo woorekama ovenyera mu ellapwaaye wi iiwe ehuddiho ya ezeru ya Solomoni. Nave kinimuulleellani wi vookhalla vaava mmodda muullupalli oomukhwaranya Solomoni.

³² Va nllapo na echiweruzo athu a o Nineve eneerovenya vamodda ni athu a mbadoolla. Athu a o Ninevaayo eneerewaavaanyiha athu a mbadoolla kaambiiwa alliwa yaarukunuwa murima yiiwalliiwa ollalleya wa Yona. Vano kinimuulleellani wi vookhalla mmodda vaava muullupalli oomukhwaranya Yona.

Miittho tti wonanko enyali ya mwiilli

³³ “Khaavo muthu anakhariha enyali, ayikhuneella ni muno. Koma enahiyiwa va yoohiyavo enyali wi athu ayo enavollowa mpammo yoone owalanko.

³⁴ Miitthwaanyu tti wonanko enyali ya mwiilli. Miitthwaanyu yakhalla aphaama mwiillaanyu muttheene onnaddalliwa owala koma miitthwaanyu yaahikhalla aphaama mwiillaanyu onnaddalliwa epiphi.

³⁵ Chenjerani wi owala ori mwa nyuwaano ohitthattuwe epiphi.

³⁶ Mwiillaanyu muttheene waddalliwa owala, ohikhalla ni epiphi vaamodda vene oneeromolleella virive veko wonanko enyali yaawuumolleellaka weyaano.”

Yesu anaahumullulla ahuddihi a malamulo ni Afarisi

³⁷ Yesu amallihalleeye ollota, Mufarisi* mmodda aamwiithanella yoocha owaniwa. Aavollowa mpa nave aakeraatthi voochella.

³⁸ Nave Mufarisooyo aattikhina oonilleeye wi Yesu khaanawille m'mattani moollikana ni ehuddiho ya Ayuda, ahinaambe ocha.

³⁹ Vano Apwiya yaallota wi, “Nyu Afarisi, munnahuwa otte wa kapu ni embale koma muwari mwanyu muddanlle nrima ni ddoonanara.

⁴⁰ Nyu ookarangeya, ethiyo Mulluku oyo aapangille otte khahiyo yooyo aapangillettho muwari?

⁴¹ Koma mwaavaheke oohoowa nnddo ddiri muwari mwa makapu ni embale ddanyu sika makapwaanyu mattheene ni embale ddanyu ddittheddene ddineerokhalla ddaweella vamiitthoni va Mulluku.

⁴² “Nyu, awoottha, ahuddihi a malamulo* ni Afarisi, mookhalla ni otulli! Munnavelleella dda khumi dda ddoomella dding'onong'ono ddooddiviha yoocha. Nave munahiya weeruza mwa echilungamo ni omukonda Mulluku. Munaphwanella wi mweereke ddenndda oohihiya ddimoddannddo.

⁴³ “Mookhalla ni otulli nyuwaano Afarisi! Vawi munnakonda mipando ddoolemu mu enyumba ddamavekello* ni ovahiwa mooni moolemu m'misikani.

⁴⁴ Mookhalla ni otulli! Vawi muri wonanko mahame ootiwalliwa ayo athu enaanyingalliiwa moohidduwella.”

⁴⁵ Muhuddihi a malamulo mmodda aallota wi, “Ahuddihi, mwaallotaka ddiidda munanillotella epewe hiyaano.”

⁴⁶ Yesu ahaakhulla wi, “Mookhallattho ni otulli nyuwaano ahuddihi a malamulo kaambiiwa munnaawatihera athu wiiwellella malamulo ookatamiha ayo enakhalla wonanko ddeko ddoollemella ni ddookatamiha otukhulla. Koma nyuwaano khamunapaalla naari wookolla eyaallaanyu wi mwaakavihere otukhullanko.

⁴⁷ Mookhalla ni otulli kaambiiwa munnamaka mahame a anamallotella yiiphiwe ni makhollwaanyu.

⁴⁸ Sika nyuwaano tti amboni wi makhollwaanyu yaawiipha alliwaayo voomakani mahamaayo.

⁴⁹ Ella sika ekaambiiwa Mulluku aallotilleeye mweezeru wi, ‘Kineerewaarumihella anamallotella ni amurummwa nave amodda a yaayo eneerewiiphiwa amodda eneerohoosiwa.’

⁵⁰ Sika athu a mbadoolla eneerollakiwa ekaamba ya wiiphiwa wa anamallotella waambeella mvo ellapo yavatthi yaphatusiwiiwa,

⁵¹ waambeella va wiiphiwa wa Abele ophiyera va wiiphiwa wa Zakariya, oyo iiphiwe variyari va nipuro naweella ni nikuwa na mukutho mu enyumba ya Mulluku. Ddawoona, kinimuulleellani wi athu a mbadoolla eneerollakiwa ekaamba ya wiiphiwa wa athu attheenaayo!

⁵² “Nyu, ahuddihi a malamulo, mookhalla ni otulli! Moomukusa mumuvittha kiiyi a vamullakoni va enyumba ya ezeru. Nyuwaano weekhiinyu khamwaavollowillemo nave mwahaahiiha ayo yapaalla ovollowamo!”

⁵³ Nave Yesu akhumalleeye mpammo, ahuddihi a malamulo ni Afarisi yaamushella murima wunchichi sika yahaamba omukoha makoho manchichi.

⁵⁴ Vawi yapaalla omuphwanyella yoomwiipella mullatu voomuwakani muwano.