Luka 1 - Mawu a Mulluku

Mawu awaamba

¹ Ooriiheya Teofilo, athu anchichi yaheeseesa ototella vamodda epilli ya ddeko ddeereyille variyari vahu.

² Yatotenlle ddeko ddennddo nalleelliweehu ni amboni ayo yoonille ddeereyaka vawaambeella ni oollalleya awaamba a othenga waphaama.

³ Sika wa miyaano kahoonattho wi tti waphaama wi kaashaashe phaama ddene ddeko ddittheddene ovenyera vawaamba nave kuulembelleni ddaweereyannddo mootthopoowa.

⁴ Nave kenre yeella wi mudduwelle ddawoona dda nnddo mwahuddihiweenyu.

Oyariwa wa Yohane Oobatiza waallotelliwa

⁵ Mu enthawi eyo Herode* aariiye mwene a echigawo ya Yudeya, waakhalla mullupa mukutho nnddina naye Zakariya, a mulloko wa allupa mukutho wa Abiya. Mwaariye aari a nlloko na Aroni nave nnddina naye aari Elizabeti.

⁶ Eellaalla yaari oolungama vamiitthoni va Mulluku nave yahiiwellella phaama malamulo ni ddoolamulella dda Apwiya.

⁷ Nave kheyaarina mwaana kaambiiwa Elizabeti khaayara nave eellaalla yahuulluvalla.

⁸ Nllapo nimodda Zakariya aarumeyella mu enyumba ya Mulluku vawi yaari enthawi ya mullokwaaye wi orumeyelle.

⁹ Moollikana ni makhallello a allupa mukutho, olliyooyo aatthoolliwa mwawoombesa wi oose mukutho wa lubani* mu enyumba ya Apwiya.

¹⁰ Mulloko muullupalli wa athooyo waari ovekellaka vaatte va enthawi yawoosa mukuthooyo.

¹¹ Vano mungelo a Apwiya aamooneyella. Mungelooyo iimenlle onnattanatta wa nikuwa noowoosella mukutho wa lubanooyo.

¹² Nave Zakariya aarurumuwa amoonilleeye nave ahoova.

¹³ Koma mungelooyo aallota wi, “Zakariya, ohoove! Mulluku ohiiwa nivekello nawo sika mwaariyo, Elizabeti, aneerewuuyarella mwaana aamullopwana nave oneeromuvaha nnddina nawi Yohane.

¹⁴ Oneerohakallalla ni murimaawo muttheene, nave athu anchichi eneerohakallallattho ni oyariwa waye!

¹⁵ Aneerokhalla muullupalli vamiitthoni va Apwiya. Khawa amuwirya vinyo apaalle erive yoolezeliha. Aneeroddalliwa ni Munepa Waweella naari ahinayariwe.

¹⁶ Aneerorukunusa mirima dda Aisraele anchichi wi ehokollweelle wa Apwiya Mullukwiiwa.

¹⁷ Aneeroowa vahoollo va Apwiya, mwa munepa ni mwamasiva a namallotella Eliya. Aneerowaattaniha makhollo ni aniiwa nave aneerewaarukunusa mirima athu oohiiwellella wi ekhalle ni ezeru wonanko dda athu oolungama. Aneeroweeriha athu wi yaakhozekelle Apwiya.”

¹⁸ Zakariya aallota wa mungelooyo wi, “Kinaadduwelle mwawiidde wi yeella tti yawoona? Mi kohuulluvalla nave mwaaraka nayeenettho ohuulluvalla.”

¹⁹ Mungelooyo ahaakhulla wi, “Mi tti Gaburiyele, oorumeyella a Mulluku, oyo akirumalle wi kuulleelle othenga waphaamoolla.

²⁰ Vano weyaano khawaawukhulupililalle othengaakoolla, oyo onaakwakhwanihiwe va enthawi yaphaama. Sika oneerollakallakeya nave khoworaka ollota, ophiyera nllapo nno yoollotiweeyo eneeriiwa yeereye.”

²¹ Enthawi yeeyo athu yaari vaattaayo yaanamutiyera Zakariya nave yaanattikhina kaambiiwa aanallekellamo mu enyumba ya Mullukummo.

²² Akhumalleeye, khaawonre ollota ni athwaayo, allota ni matta nave aallakallakeya. Sika athwaayo yaadduwella wi muwarimmo ohoonamo masomphenya ovenyera wa Mulluku.

²³ Nave enthawi yoorumeyella mu enyumba ya Mulluku yamanlliiwa, Zakariya aarowa owaniwa.

²⁴ Vatulli viwa, mwaariye Elizabeti aakhalla ni erukullu nave khaakhumalle mpa wa miyeri mitthanu.

²⁵ Aallota wi, “Omamallihello wiwa Apwiya aakeerella echifundo, aakivenyihella owulliwa muru waka variyari va athu.”

Oyariwa wa Yesu waallotelliwa

²⁶ Nave mweeri waneetthanu ni mmodda wa erukullu ya Elizabeti mungelo Gaburiyele aarumiwa ni Mulluku o etawoni o echigawo ya Galileya yooromolliwa Nazareti.

²⁷ Arumiwe wa namwalli nnddina naye Mariya oyo atomeliwe ni mullopwana nnddina naye Yosefe, edduullu ya Davide.

²⁸ Mungeloolle aawa wa Mariya allota wi, “Mooni! Apwiya aaweerella echifundo nave eri ni weyaano!”

²⁹ Mariya aatthukumellana wunchichi mawu a mungelwaalla nave aavirellella wiikoha yeekhaaye m'murimani mwaye wi mawu yaalla enattaphullella tini?

³⁰ Mungelooyo aallota wi, “Ohoove, Mariya, Mulluku ooweerella echifundo.

³¹ Oneerokhalla ni erukullu nave oneeromuyara mwaana aamullopwana nave omuvahe nnddina nawi Yesu.

³² Olliye aneerokhalla muullupalli nave aneeroromolliwa Mwaana a Mulluku Muullupalli. Apwiya Mulluku eneeromweera akhalle mwene wonanko nikhollo naye, Davide.

³³ Nave aneerolamulella Aisraele mallapo mattheene nave omwenaaye khomalla!”

³⁴ Koma Mariya aallota wa mungelooyo wi, “Mi namwalli oohimudduwella mullopwana, ddenndda ddinaaworeye mwawiidde?”

³⁵ Mungelooyo ahaakhulla wi, “Munepa Waweella aneerophiya va weyaano nave masiva a Mulluku Muullupalli eneerewuuhuruwella. Ekaamba ya yeella, mwaana ooyariwooyo anaakhalle Aweella nave aneeroromolliwa wi Mwaana a Mulluku.

³⁶ Vano ngiiwa, mbalaawo Elizabeti, nayeenettho naari uulluvanlle ookhalla ni erukullu. Athu yaganiza wi khawa ayara koma vano ookhalla ni erukullu ya miyeri mitthanu ni mmodda.

³⁷ Vawi kheyiivo ello enaalepheliwe ni Mulluku.”

³⁸ Vano Mariya aallota wi, “Mi tti owaarumeyella Apwiya, ddeereye wa miyaano ollikana ni ollota wanyu.” Nave mungelooyo aavenyavo.

Mariya anamweetella Elizabeti

³⁹ Ddimallille ddenndda, Mariya aatimulla mwawaakuva aya o echigawo yamiyaango, o etawoni emodda ya o Yudeya.

⁴⁰ Aavollowa mpa mwa Zakariya amvaha mooni Elizabeti.

⁴¹ Elizabeti iiwalleeye mooni wa Mariyooyo, mwaana aari m'mirimani mwayemmo ahiirukunusarukunusa. Vano Elizabeti aaddalliwa ni Munepa Waweella

⁴² Nave aallota mookhuwa wi, “We sika oodalisiwa mwa atthiyana attheene nave oodalisiwa tti mwaana onaamuyarawooyo!

⁴³ Miyaano kiri aani wi ameewa a Apwiyaaka ekeetella?

⁴⁴ Kiiwalleemi moonaawoolle, mwaana aarukunuwarukunuwa m'mirimani mwaka moohakallalla.

⁴⁵ Oodalisiwa tti weyaano kaambiiwa waakhulupilila ddallotille Apwiya wi ddineereweereya!”

Nchipo na Mariya

⁴⁶ Nave Mariya aallota wi, “Murimaaka onnaatitimiha Apwiya,

⁴⁷ nave munepaaka wohakallalla ekaamba ya Mulluku, oovullusaaka,

⁴⁸ vawi ookuupuwella miyaano, oorumeyellaaye oovevuwa! Waambeella ollello oya muhoollo athu attheene eneerokeera oodalisiwa,

⁴⁹ kaambiiwa Mulluku amasiva ookeerella ddeko dduullupalli. Nnddina naye sika naweella.

⁵⁰ Anaweerella echifundo ayo enamoova olliye ovenyera va mbado mmodda ophiyera mmodda.

⁵¹ Oheera ddeko ddamasiva ni muwonwaaye, nave ohaapallallesa athu awiitukhulla m'murimani mwiwa.

⁵² Ohaavenyiha mamwene vamipandoni ddiwa dda omwene, koma athu oovevuwa ohaawelliha.

⁵³ Athu oohoowa ohaakwakhwanihella ni ddeko ddaphaama, nave athu eeyuuma ahaahokollosa ahaavahille ello.

⁵⁴ Ookwakhwaniha allotilleeye wa makhollwaahu, nave oohaakavihera athwaaye a Israele, oomurumeyellaaye.

⁵⁵ Sika ohuupuwella omweerella echifundo Abrahamu ni edduullu ddaye mallapo mattheene.”

⁵⁶ Nave Mariya aakhalla ni Elizabeti miyeri miraru nave aahokollweellattho owaniwa.

Oyariwa wa Yohane Oobatiza

⁵⁷ Enthawi yawi Elizabeti amuyare mwaana yaakwakhwana nave aamuyara mwaana aamullopwana.

⁵⁸ Akhwaaye ni abalaaye yahiiwa wi Apwiya aamweerella echifundo nave yaahakallallana.

⁵⁹ Nave mwaanooyo aariiye ni mallapo matthanu ni mararu, yaawa wi yoonelle ophaddiwa waye nave yapaalla omuvaha nnddina naattiitthinnya Zakariya.

⁶⁰ Koma amennyaayo yaakhoota ellota wi, “Iyaayi! Nnddina naye anaakhalle Yohane.”

⁶¹ Athwaayo yaallota ni Elizabeti wi, “Khaavo a mbalaanyu ari ni nnddina nenna!”

⁶² Nave yaallota ni attiitthinnya ni matta, yaakoha wi mwaanooyo nnddina naye anaakhalle aani.

⁶³ Zakariya aaveka voolemba nave alemba wi, “Nnddina naye tti Yohane.” Athu attheenaayo yaattikhina.

⁶⁴ Enthawi yeeyo Zakariya aattaphuwa muwano, aamba ollota, vano aamutitimiha Mulluku.

⁶⁵ Nave athu attheene awaatamanana yahoova nave epilli ya ddeko ddenndda yaavuwa mu echigawo ettheene yamiyaango ya Yudeya.

⁶⁶ Athu attheene ayo yiiwalle, yaanaddiganizera, eniikoha wi, “Mwaana yoolla anaakhalle muthu awiidde?” Vawi ddaanooneya wi masiva a Apwiya eri ni olliyooyo.

Ollotella wa Zakariya

⁶⁷ Nave Zakariya, attiitthinnya a Yohane, yaaddalliwa ni Munepa Waweella nave yaallotella wi;

⁶⁸ “Ootitimiheya tti Apwiya Mulluku a Aisraele! Oowa wi aakavihere athwaaye nave awoopolle.

⁶⁹ Oonivaha Oovullusa amasiva, edduullu ya Davide, oorumeyellaaye,

⁷⁰ Wonanko mmo alonjezilleeye oweella mwa anamallotella aweella murima ayo yaariwo mallapo akhalle,

⁷¹ wi aneeronivullusa wa adanaahu, ovenyera m'mattani mwa attheene ayo enaniita hiyaano.

⁷² Aaweerella echifundo makhollwaahu nave ahuupuwella echipanganwaaye yaweella.

⁷³ Wonanko mmo allupelleeye wa Abrahamu, nikhollo nahu,

⁷⁴ wi aneeronivullusa wa adanaahu, nave nineeromurumeyella moohoova,

⁷⁵ koma mwaweella murima ni mwa echilungamo vamiitthoni vaye mallapo mattheene ookumaahu.”

⁷⁶ “We, mwanaka, oneeroromolliwa namallotella a Mulluku Muullupalli. Oneerewaahoollella Apwiya, wi wookolle ettilla ddiwa.

⁷⁷ Oneerewaalleella athwiiwa wi eneerovullusiwa, vookhululukelliwani machimwiiwa.

⁷⁸ Ekaamba ya echikondi ni echifundo ya Mullukwaahu, owala woovenyera oddullu oneerokhuma ni oniwalella hiyaano.

⁷⁹ Nave oneerewooneya wa ayo eri mwiipiphini ni m'muuthuuchini wa okhwa, wi onihoollelle mu ettilla ya murendelle.”

⁸⁰ Mwaanooyo ahunnuwa m'mwiillini ni m'munepani nave aakhalla ochipululuni ophiyera mallapo addoonihelleeye wa Aisraele.