Levitiko 9 - Mawu a Mulluku

Aroni anaheraatthi mikutho

¹ Va nllapo naneetthanu ni raru Mose aamwiithana Aroni ni anaaye owaaka oohoollella a Aisraele.

² Aamulleella Aronooyo wi, “Omukuse musaana a nankhoro a eng'ombe wi akhalle mukutho woopepesella machimo nave nankhoro a enkhosa wi akhalle mukutho wooshellelliha. Ddittheddenennddo ddikhalle ddoohirakalla nave oddivelleelle wa Apwiya.

³ Vano wallote ni Aisraele wi, ‘Mukuseni nankhoro a epuri wi muvelleelle mukutho woopepesella machimo. Mumukusettho musaana a nankhoro a eng'ombe owaakattho musaana eenkhosa. Asaana eellaalla ekhalle a muyakha mmodda, oohirakalla wi okhalle mukutho wooshellelliha.

⁴ Mukusettho eng'ombe ni enkhosa wi ddikhalle mukutho wa eyaattano wa Apwiya. Nave muweena mukutho wa othu woottakanyihera ni makhura. Vawi ollello Apwiya eneerowooneyellani.’ ”

⁵ Ddittheddene nnddo Mose aalamulalleeye athwaayo yaawaana vanthatoni na musasa wamutthukumano. Nave athu attheene yaasusera vakhuviru wi yaallapella Apwiya.

⁶ Vano Mose aallota wi, “Apwiya ahuulamulani wi mweere nndda wi ntitimiho niwa niwooneyelleni.”

⁷ Mose aamulleella Aroni wi, “Susera vakhuviru ni nikuwa nave oheraatthi mukutho woopepesella machimo ni mukutho wooshellelliha wi okhalle mutetho woopepesella machimo a Aisraele. Oheraatthi ddoovelleella dda athwaayo nave weere mutetho woopepesella machimwiiwa moollikana ni mmo Apwiya elamulelliiwa.”

⁸ Sika Aroni aasusella vakhuviru ni nikuwa amwiipha musaana a nankhoro a eng'ombe ooheraatthella mukutho woopepesella machimwaaye.

⁹ Nave anaaye yaavelleella nikhame wa Aroni. Olliye aatthaveya eyaallaaye munikhamenimmo, animara vannyakani na nikuwa, iithella nikhame noohallanno vatthi va nikuwanno.

¹⁰ Koma makhura ni apellepetu owaaka makhura mattheene a ohapa dda mukutho woopepesella machimooyo aaddishellelliha vanikuwani moollikana ni mmo Apwiya yamulamulalliiwa Mose.

¹¹ Enamiiwa ni nttapara niwa aaddishellelliha otte wa misasa.

¹² Vano ahiipha enama ya mukutho wooshellelliha nave anaaye yaamwinnyerera nikhame. Ahiithella nikhamenno moowaapheella nikuwanno.

¹³ Vatulli viwa yaavelleella wa olliye enthuli ni muru dda enama ya mukutho wooshellelliha nave olliye aaddishellelliha vanikuwani.

¹⁴ Vano ahuwalle marupo ni meto, aaddishellelliha vanikuwani vaavo, vaddullu va ddoohalla dda mukutho wooshellellihoolle.

¹⁵ Vatulli viwa aavelleella mikutho dda athwaayo, akusa epuri ya mukutho woopepesella machimo a athwaayo ayiipha, ayiheraatthi mukutho woopepesella machimo, wonanko mmo eerelleeye ni mukutho woopepesella machimo wawaamboolle.

¹⁶ Vano aawaana mukutho wooshellelliha awuheraatthi moollikana ni mutethwiiwa.

¹⁷ Avelleellatho mukutho wa othu, avahullawo mukuthooyo wooddalla nnatta nimodda ashellelliha vanikuwani, woonjerera va mukutho wooshellelliha woohinase.

¹⁸ Vano ahiiphattho eng'ombe ni nankhoro a enkhosa aaheraatthella athu mukutho wa eyaattano. Vatulli viwa anaaye yaamwinnyerera nikhame nave olliye ahiithella nikhamenno moowaapheella nikuwa.

¹⁹ Yaamwinnyerattho makhura eeng'ombe ni a nankhoro a enkhosa, makhura a mwiilla, makhura oohuruwella marupo, apellepetu ni makhuriiweene navettho makhura mattheene a ohapa.

²⁰ Anamwanaayo yaahiya makhura va ekhakadda nave Aroni ahaashellelliha makhuraayo vanikuwani.

²¹ Vano Aroni aatukhullella muddullu ekhakaddeeyo ni mweto wamutulli wi ddikhalle ddoovelleella ddootukhullella muddullu vamiitthoni va Apwiya moollikana ni mmo Mose aalamulelleeye.

²² Vano Aroni aatukhullella muddullu mattaaye aadalisa athwaayo. Nave aakittha vanikuwani mvo aheraattheeye mukutho woopepesella machimo, wooshellelliha ni wa eyaattano.

²³ Vano Mose ni Aroni yaavollowa m'musasani wamutthukumano. Ekhumallemo, yahaadalisa athwaalle nave ntitimiho na Apwiya naawooneyella athu attheenaayo.

²⁴ Nave Apwiya yaakhariha munllo oshellelliha mukutho wooshellelliha ni makhura nnddo ddaari vanikuwanimvo nave athu yoonilliiwa munllooyo, yaakhuwa emora ekhove ddiwa.