Levitiko 8 - Mawu a Mulluku

Ozoziwa wa Aroni ni anaaye

¹ Apwiya yaallota ni Mose wi,

² “Omukuse Aroni ni anaaye. Okusettho ddoowara dda allupa mukutho, makhura oozozella, nankhoro a eng'ombe ya mukutho woopepesella machimo, anankhoro a enkhosa eelli navettho mutaanga wa buledi oohikhalla ni yisiti.

³ Vano waatthukumanihe athu attheene va mullako wa musasa wamutthukumano.”

⁴ Mose aheera nnddo Apwiya yamulamulalliiwa. Sika athu attheene yaatthukumana va mullako wa musasa wamutthukumano.

⁵ Vano ahaalleella athu attheenaayo wi, “Nnddo kinaapaalleemi weera Apwiya sika elamulalle.”

⁶ Mose aawaana Aroni ni anaaye, aweeriha wi ehape moopatuleya.

⁷ Aamuwariha malaya Aroni, amumakella laamba muyuununi. Aamuwarihattho mukanjo ni yoowara ya efodi* nave aammakellattho laamba a efodooyo.

⁸ Vano aamuwariha yoowara ya vakhakaddani nave mu yoowareeyo aahiyamo ddeko ddaweeriwa Urimu ni Tumimu.*

⁹ Aamuwariha enduwira omuruni. Owiitthoni wa enduwireeyo aahiyawo malluwa a golide wi ekhalle echizindikiro ya opatuleya. Sika Mose aheera ddittheddene moollikana ni mmo Apwiya yamulamulalliiwa.

¹⁰ Vatulli viwa Mose aakusa makhura oozozella, azoza musasa wamutthukumano ni ddittheddene nnddo ddaari mwemmo nave aaddeelliha.

¹¹ Aamidda makhura mamodda olendo otthanu ni opiilli vanikuwani nave aazoza nikuwanno ni ezipangizo ddiwa ddittheddene nave aaddipatula. Aazozattho ebeseni yoonawellamo ni voohiyavo ebeseneeyo nave aaddipatula.

¹² Vano aamuzoza Aroni voohellani makhura vamuru vaye wi amweellihe.

¹³ Vano Mose aawaana anamwani a Aroni, aawariha malaya, aamakella laamba muyuununi, aawariha enduwira omuruni. Sika Mose aheera ddittheddene moollikana ni mmo Apwiya yamulamulalliiwa.

¹⁴ Vatulli viwa Mose aawaana nankhoro a eng'ombe ya mukutho woopepesella machimo nave Aroni ni anaaye yaatthinddaanyera mattiiwa va muru wa nankhorooyo.

¹⁵ Vano Mose ahiipha eng'ombeeyo atthaveya eyaallaaye munikhameni amara va manyaka oowaapheella va nikuwa nave aaneelliha. Aaniithella nikhame noohalla vatthi va nikuwanno aneelliha. Sika aheera mutetho woopepesella machimo.

¹⁶ Vano Mose aakusa makhura mattheene oowaapheella nave oohuruwella marupo, makhura mattheene a ohapa ni apellepetu ni makhuriiweene nave aashellelliha vanikuwanimvo.

¹⁷ Koma nttapara na nankhoro a eng'ombe ni muhehe, muru, meto, marupo ni marupwiiwa ddittheddenennddo addishellellihe otte wa misasa moollikana ni mmo Apwiya yamulamulalliiwa Mose.

¹⁸ Vatulli viwa aavelleella nankhoro a enkhosa ya mukutho wooshellelliha nave Aroni ni anaaye yaatthinddaanyera mattiiwa va muru va enkhoseeyo.

¹⁹ Vano Mose ahiipha enkhoseeyo iitha nikhame niwa moowaapheella nikuwa.

²⁰ Enkhoseeyo ayiphaddille enthuli enthuli, Mose aashellelliha muru ni enthulinndde ni makhura.

²¹ Vano ahuwalle marupo owaaka meto, aaddishellellihattho. Sika aashellelliha enama ettheeneeyo vanikuwani wi okhalle mukutho wooshellelliha, wa nthuko nawaaddivella Apwiya wawoosiwa viikho moollikana ni mmo alliwa yamulamulelliiwa Mose.

²² Vano Mose aawaana nankhoro a enkhosa yaneepiilli yoomuzozella mullupa mukutho. Nave Aroni ni anaaye yaatthinddaanyera mattiiwa va muru wa enkhoseeyo.

²³ Mose aayiipha, akusavo nikhame niwa animara va etthoka ya naaru na onnattanatta na Aroni. Aamarattho va eyaallaaye onnattanatta ni va eyaalla yuullupalli ya nnyallo na onnattanatta.

²⁴ Vatulli viwa Mose aawa ni anamwani a Aroni nave aamara nikhame o etthoka dda maarwiiwa a onnattanatta, eyaalla ddiwa dduullupalli dda nnattanatta navettho va eyaalla ddiwa dduullupalli dda onnyalloni na onnattanatta. Vano Mose ahiithella nikhame noohalla vanikuwani moowaapheella.

²⁵ Aakusa makhura mattheene a omwiillani, a vamaruponi, a voohapani, a vaapellepetuni ni mweto wamutulli woonnattanatta.

²⁶ Nave ovenyera m'mutaangani wa buledi oohikhalla ni yisiti, woopatulelliwa wa Apwiya aakusamo mwitthi mmodda wa buledi oohikhalla ni yisiti, mwitthi mmodda wa buledi ooruweyiwa m'makhurani ni mwitthi mmodda wa buledi ooshashaalla. Ddittheddenennddo aaddihiya vamakhurani valle ni va mweto wamutulli wonnattanattoolle,

²⁷ aaddihiya m'mattani mwa Aroni ni mwa anaaye, additukhullella muddullu wi ddikhalle yoovelleella yootukhullella muddullu wa Apwiya.

²⁸ Vatulli viwa Mose aakusamo m'mattani mwiwammo aaddishellelliha vanikuwani ni mukutho wooshellellihoolle wi okhalle mukutho woomuzozella mullupa mukutho, wawoosiwa viikho, wa nthuko nawaaddivella Apwiya.

²⁹ Nave aakusa ekhakadda ayitukhullella muddullu wi ekhalle yoovelleella yootukhullella muddullu wa Apwiya. Yeeyo tti embali ya Mose ya nankhoro a enkhosa yoomuzozella mullupa mukutho moollikana ni mmo Apwiya yamulamulelliiwa Mose.

³⁰ Vano Mose aakusa makhura oozozellaalle ni nikhame nno naari vanikuwani, ammidda Aroni ni ddoowara ddaye navettho anaayaalle ni ddoowara ddiwa. Mmu tti mmo Mose amweellihelleeye Aroni ni ddoowara ddaye navettho anaaye ni ddoowara ddiwa.

³¹ Mose ahaalleella Aroni ni anaaye wi, “Mwaapeye enameeyo va mullako wa musasa wamutthukumano nave muyichelle vaavo ni buledi oyo ari m'mutaangani wa ddoovelleella va ddoomuzozella mullupa mukutho, voothwarani nnddo Apwiya yalamulalliiwa wi, ‘Aroni ni anaaye sika enaache ddennddo.

³² Ddoohalla dda enameeyo ni dda buledi ddene muddishellellihe.

³³ Nave va mallapo matthanu ni meelli muhikhumelle otte wa musasa wamutthukumano, ophiyera mallapo a mutetho wa omuzoza mullupa mukutho emanlle vawi mutethoolla tti wa mallapo matthanu ni meelli.

³⁴ Apwiya yaanilamula wi niweerelleni nnddo niweerelleehuni ollello wi okhalle mutetho woopepesella machimwaanyu.

³⁵ Mukhalleke va mullako wa musasa wamutthukumano otthaana ni mahiiyu, mallapo matthanu ni meelli nave mweereke nnddo Apwiya yuulamulalliiwani wi muhikhwe. Ddenndda tti nnddo Apwiya ekilamulalliiwa.’ ”

³⁶ Vano Aroni ni anaaye yaheera ddittheddenennddo moollikana ni mmo Apwiya yalamulelliiwa oweella mwa Mose.