Levitiko 7 - Mawu a Mulluku

Mukutho woolliva

¹ Mukutho woolliva tti waweella wunchichi. Malamulwiiwa tti awi,

² Vanipuroni mvo viniiphelliwa enama ya mukutho woopepesella machimo, yiiphellevottho enama ya mukutho woolliva. Nave yiithe nikhame niwa moowaapheella nikuwa.

³ Vano avelleelle makhura mattheene a mwiilla ni makhura oohuruwella marupo.

⁴ Aakusettho apellepetu ni makhuriiweene navettho makhura mattheene a ohapa, ayo anaavenyihelleeye nimodda ni apellepetwaalle.

⁵ Mullupa mukutho addishellellihe ddittheddenennddo vanikuwani wi ddikhalle mukutho wawoosiwa viikho, woovelleelliwa wa Apwiya. Yooyo sika mukutho woolliva.

⁶ Arive mullopwana a mwa allupa mukutho ttuuchana. Ayichelle vanipuroni naweella. Yooyo tti mukutho waweella wunchichi.

⁷ Mukutho woolliva tti woophwanaphwana ni mukutho woopepesella machimo nave mikutho miillinndda ddookhalla ni lamulo nimoddave. Enameeyo enaakhalle ya mullupa mukutho ooheraatthi mukutho woopepesella machimooyo.

⁸ Nave mullupa mukutho ooheraatthi mukutho wooshellelliha woovelleelliwa ni arive muthu akuse nttapara na enameeyo wi nikhalle naaye.

⁹ Vano orive mukutho wa othu wawaapeyiwa mu ufuni apaalle wawaarikiwa apaalle wawaapeyiwa muchiwayani okhalle wa mullupa mukutho oyo aheraatthille munipuroni na muthu mmodda.

¹⁰ Nave orive mukutho wa othu woottakanyihera ni makhura apaalle wawumma okhalle wa anamwani a Aroni. Nave allupa mukuthwaayo ekawane moophwanaphwana.

Mukutho wa eyaattano

¹¹ “Malamulo a mukutho wa eyaattano woovelleelliwa wa Apwiya tti awi,

¹² muthu aavelleellaka ekaamba yoopaalla othokoza ni enama ya mukutho wa eyaattano aweena buledi oohikhalla ni yisiti oottakanyihera ni makhura owaaka buledi oohikhalla ni yisiti, ooshashaalla, oomara makhura navettho buledi a othu waphaama ooruweyiwa phaama mumakhurani.

¹³ Aweenattho buledi ookhalla ni yisiti ni mukutho wa eyaattano woothokozerooyo.

¹⁴ Vatulli viwa akusewo mwitthi mmodda va orive mutundu wa buledi wi okhalle yoovelleella yoopatuleya yoovelleella wa Apwiya. Mwitthi yooyo tti wa mullupa mukutho oyo anaawiithe moowaapheella nikuwa, nikhame na mukutho wa eyaattano.

¹⁵ Enama yoohalla ya mukutho wa eyaattano woothokozerooyo ayiche va nllapo noovelleella mukuthooyo. Ahinayisunga naari vang'ono ophiyera osiisello ohinase.

¹⁶ “Koma mukuthooyo awuvelleella moollupella apaalle mwa opaalla waye, ayiche va nllapo nno anavelleelleeye mukuthooyo. Nave enama yoohalla ayiche waasaka wene.

¹⁷ Koma enama yoohalla ophiyera nllapo naneeraru, ayishellellihe.

¹⁸ Muthu ayicha enama ya mukutho wa eyaattanooyo va nllapo naneeraru, Mulluku khemwaakhella oyo awuvelleellooyo. Nave mukuthooyo khophura ello koma onaakhalle ello yooripihiwa nave oyo anaachooyo aneerophwanella ollakiwa.

¹⁹ Erive ello eyo enattannya ello yooripihiwa, ehichiwe koma eshellellihiwe. Koma arive muthu oyo eellihiwe ayiche enama ya mukuthooyo.

²⁰ Koma oyo aripihiwe ayicha enameeyo, avenyihiwe variyari va Aisraele.

²¹ Nave arive muthu attannya erive ello yooripihiwa, khaya ya muthu apaalle ya enama apaallettho erive ello yooripihiwa nave achana yoocha ya mukutho wa eyaattano woovelleelliwa wa Apwiya, muthooyo avenyihiwe variyari va Aisraele.”

²² Apwiya yaallota ni Mose wi

²³ aalleelle Aisraele wi ehicheke makhura eeng'ombe apaalle eenkhosa apaallettho eepuri.

²⁴ Ehaachettho makhura a enama yookhwa weekhiiwa owaaka makhura a enama yoottakhuniwa ni enama ddamuhakani koma ttuuwaaphariha orive mutteko.

²⁵ Vawi muthu oyo anacha makhura a enama yoovelleelliwa wa Apwiya wi ekhalle mukutho wawoosiwa viikho avenyihiwe variyari va Aisraele.

²⁶ Navettho orive weko nko enaakhallekiiwa ehiche nirive nikhame na epallame apaalle na enama.

²⁷ Arive muthu oohithwara lamulo nenna avenyihiwe variyari va Aisraele.

²⁸ Apwiya yaallota ni Mose wi

²⁹ aalleelle Aisraele wi, “Muthu oyo anavelleella wa Apwiya mukutho wa eyaattano,

³⁰ akusewo embali dda mukutho wawoosiwa viikho, woovelleella wa Apwiya. Akusettho makhura ni ekhakaddeene mootukhullella muddullu wa Apwiya wi okhalle yoovelleella yootukhullella muddullu wa Apwiya.

³¹ Mullupa mukutho ashellelliheke makhuraayo vanikuwani koma ekhakaddeeyo ekhalleke ya Aroni ni anaaye.

³² Mullupa mukutho avahiweke mweto wamuhoollo wonnattanatta.

³³ Sika anaakhelle mweto wonnattanatta wi okhalle waaye tti mmodda a anamwani a Aroni oyo anaaheraatthi nikhame ni makhura a mukutho wa eyaattano.

³⁴ Sika Apwiya aatthoolla ekhakadda yoovelleelliwa mootukhullelliwa muddullu ni mweto wamutulli wi ddikhalle dda Aroni ni anaaye wonanko embali ya mukutho wa eyaattano wa enthawi ddittheddene.

³⁵ Yeeyo tti embali ya Aroni ni anaaye, yoovahulla va mikutho dda Apwiya ddawoosiwa viikho, va nllapo nno alliwa yatthoolliwiiwa wi ekhalle mullupa mukutho owaarumeyella Apwiya.

³⁶ Apwiya yahaalamulella Aisraele wi evelleelleke ddennddo wa allupa mukutho ovenyera nllapo nno yazoziwiiwa wi ekhalle embaliiwa wa mibado ddiwa ddittheddene.

³⁷ “Yaayo sika malamulo a mikutho ddittheddene, wooshellelliha, wa othu, woopepesella machimo, wa olliva, wa ozoza navettho wa eyaattano.

³⁸ Malamulo yaalla tti ayo Apwiya yavelleelliiwa wa Mose vamwaangoni va Sinai mu echipululu, va nllapo nno aalamulalleeye Aisraele wi ewe ni mikutho ddiwa wa Apwiya.”