Levitiko 6 - Mawu a Mulluku

¹ Apwiya yaallota ni Mose wi

² aalleelle Aroni ni anaaye wi, “Muthu eera ddeko moohiroromelleya, vawaachimwellani Apwiya ekaamba ya omulleka mukhwaaye vookhootani omuhokollosella nnddo amusungenlleeye apaalle omwiiyera apaalle omoottottha,

³ apaalle oruna wi khatotille nnddo ddamorihiwe sika anallupella ddawoottha.

⁴ Muthooyo achimwa nave adduwella wi oochimwa, ahokollose nnddo ddihiri ddaaye.

⁵ Va nllapo nno anaadduwelleeye wi oochimwa, amuhokolloselle mwaneena ddittheddenennddo nave oonjererevo ello emodda va ddirive ezigawo dditthanu.

⁶ Nave aweena mukutho woolliva woovelleelliwooyo wa Apwiya wa allupa mukutho. Mukuthooyo okhalle wa nankhoro a enkhosa yoohirakalla nave mutengo wa enkhoseeyo okhalle wookwakhwana mutengo wookeraattheya wa enama ya mukutho woolliva.

⁷ Mwawi ddiidda aheraatthi mukutho wa olliva machimo ekaamba ya nichimo na muthooyo nave aneerokhululukelliwa machimwaaye mattheene.”

Mukutho wooshellelliha

⁸ Apwiya yaallota ni Mose wi

⁹ aalleelle Aroni ni anaaye wi, “Malamulo a mukutho wooshellelliha tti awi, mukuthooyo okhalleke viikho vanikuwani mahiiyu mattheene ophiyera ohinase nave munllo wa vanikuwanooyo ohithiimihiwe.

¹⁰ Vano mullupa mukutho amuware kabudulaaye a bafuta owaaka mukanjwaaye wa bafuta nave awollevo ntuura na enama yooshellelliha vanikuwani ni onihella vakhwipi va nikuwa nenno.

¹¹ Vano arulle ddoowara ddaye, aware ddimodda nave awolle ntuuranno wi akhumihelle otte wa misasa, o nddalla noopatuleya nko enatathillelliiwawo ntuura.

¹² “Munllo wa vanikuwani okhalleke wookhara, ohithiimeke. Mullupa mukutho attettheereke munllooyo ni ekhuni orive ohinase nave atthatteke mukutho wooshellelliha vanikuwanimvo ni oshellellihavo makhura a mukutho wa eyaattano.

¹³ Munllo wa vanikuwanimvo okhalleke wookhara, ohithiimeke.

Mukutho wa othu

¹⁴ “Malamulo a mukutho wa othu tti awi, anamwani a Aroni eweekena vahoollo va nikuwa ni ovelleella vamiitthoni va Apwiya.

¹⁵ Vano mmodda a alliwaayo avahulle nnatta nimodda na othu woottakanyihera ni makhura nave amukusettho lubanaaye muttheene. Ashellellihe ddennddo vanikuwani, wooniha wi mukutho muttheenooyo woovelleelliwa wa Apwiya nave ddikhumihe nthuko nawaaddivella Apwiya.

¹⁶ Vano ddoohalla dda mukuthooyo ddikhalle dda Aroni ni anaaye. Ddikhalle ddoohikhalla ni yisiti nave eddiche vanipuroni noopatuleya sika wi vanthatoni na musasa wamutthukumano.

¹⁷ “Voowaapeyani ehimuhellemo yisiti. Apwiya aatthoolla ddoohallannddo wi ddikhalle echigawiiwa ya mukutho wawoosiwa viikho. Ddittheddenennddo tti ddaweellihiwa wunchichi wonanko mukutho woopepesella machimo navettho mukutho woolliva.

¹⁸ Edduullu ddittheddene dda Aroni ddicheke dda mukutho wawoosiwa viikho ddoovelleelliwa wa Apwiya wonanko mmo ddalembelliwiiwa wi ddikhalleke ddiiddo enthawi ddittheddene wa mibado ddittheddene. Erive ello eyo enaattannye nikuwanno eneerewoonongiwa ekaamba ya masiva a weella wa nikuwanno.”

¹⁹ Apwiya yaallota ni Mose wi,

²⁰ “Mukutho oyo Aroni ni anaaye enaphwanelliiwa ovelleella wa Apwiya ovenyera va nllapo nno mullupa mukutho anazoziweeye, avelleelleke nllapo ni nllapo othu waphaama wookwakhwana nikilogaramu nimodda wonanko mukutho wa othu. Awuvelleelleke hafu ohinase hafu misikuwa.

²¹ Othooyo ottakanyiheriwe phaama ni makhura nave waarikiwe vachiwayani. Amuphaddephadde buledi wonanko mmo aneerelleeye ni mukutho wa othu. Nave amushellellihe wi akhumihe nthuko nawaaddivella Apwiya.

²² Vano mullupa mukutho a nlloko na Aroni oyo atthoolliwe wi avollowe munipuroni mwaye, ashellelliheke mukutho muttheene vawi mukuthooyo tti wa Apwiya enthawi ddittheddene.

²³ Orive mukutho wa othu oshellellihiweke muttheene, ohichiweke.”

Mukutho woopepesella machimo oohikhalla aphudda

²⁴ Apwiya yaallota ni Mose wi

²⁵ aalleelle Aroni ni anaaye wi, “Malamulo a mukutho woopepesella machimo tti awi, vanipuroni mvo viniiphelliwa enama ya mukutho wooshellelliha, yiiphellevottho enama ya mukutho woopepesella machimo wa Apwiya. Yooyo tti mukutho waweella wunchichi.

²⁶ Mullupa mukutho oyo anaayiheraatthi enameeyo, ache enameeyo vanipuroni noopatuleya sika wi vanthatoni na musasa wamutthukumano.

²⁷ Arive muthu oottannya mukuthooyo aneerewoonongiwa ekaamba ya masiva a weella wa mukuthooyo. Vano nikhame niwa namorella va yoowara, achape yoowareeyo vanipuroni noopatuleya.

²⁸ Vano apwese epalli aapeyilleeyemo enameeyo. Koma aapeya musupuliyani ahuwe nave attulluse ni maaddi.

²⁹ Arive mullopwana a mwa allupa mukutho ttuuchana. Yooyo tti mukutho waweella wunchichi.

³⁰ Koma ahiche enama ya mukutho woopepesella machimo oyo nikhame niwa enawaaniiwa m'musasani wamutthukumano wi ekhululukelliwe machimo. Enameeyo ahiyiche koma ayishellellihe.”