Levitiko 3 - Mawu a Mulluku

Mukutho wa eyaattano

¹ “Arive muthu aawaaka wa Apwiya wi avelleelle mukutho wa eyaattano, mukuthweene wakhalla wa eng'ombe, akhalleke nankhoro apaalle yaamutthiyana, yoohirakalla.

² Muthooyo atthinddaanyere nnatta naye va muru wa eng'ombeeyo nave ayiiphelle va mullako wa musasa wamutthukumano. Vano anamwani a Aroni, evelleelle nikhame na eng'ombenno vawiithani moowaapheella nikuwa.

³ Vano vamukuthoni wa eyaattanooyo, muthooyo akuse makhura mattheene oowaapheella nave oohuruwella marupo wi okhalle mukutho wawoosiwa viikho wa Apwiya.

⁴ Aakusettho apellepetu ni makhuriiweene navettho makhura mattheene a ohapa, ayo anaavenyihelleeye nimodda ni apellepetwaalle.

⁵ Vano anamwani a Aroni eshellellihe ddittheddenennddo vanikuwani ni mukutho wooshellelliha oyo ori vakhunini viikhomvo. Yooyo sika mukutho wawoosiwa viikho, wa nthuko nawaaddivella Apwiya.

⁶ “Arive muthu aawaaka wa Apwiya wi avelleelle mukutho wa eyaattano, mukuthweene wakhalla wa enkhosa, ekhalleke nankhoro apaalle yaamutthiyana, yoohirakalla.

⁷ Avelleella enkhosa wi okhalle mukutho wa Apwiya,

⁸ atthinddaanyere nnatta naye va muru wa enkhoseeyo nave ayiiphelle va nthato na musasa wamutthukumano. Vano anamwani a Aroni evelleelle nikhame na enkhosanno vawiithani moowaapheella nikuwa.

⁹ Vano vamukuthoni wa eyaattanooyo, muthooyo akuse makhura mattheene a mwiilla woophaddiwa vakhuviru ni mutthana owaakattho makhura mattheene oowaapheella nave oohuruwella marupo wi okhalle mukutho wawoosiwa viikho wa Apwiya.

¹⁰ Aakusettho apellepetu ni makhuriiweene navettho makhura mattheene a ohapa, ayo anaavenyihelleeye nimodda ni apellepetwaalle.

¹¹ Vano mullupa mukutho ashellellihe ddittheddenennddo vanikuwani wi okhalle mukutho wa othu wawoosiwa viikho woovelleelliwa wa Apwiya.

¹² “Avelleella epuri wi okhalle mukutho wa Apwiya,

¹³ atthinddaanyere nnatta naye va muru wa epureeyo, vano ayiiphelle va nthato na musasa wamutthukumano. Vano anamwani a Aroni evelleelle nikhame na epurinno vawiithani moowaapheella nikuwa.

¹⁴ Vano vamukuthoni wa eyaattanooyo, muthooyo akuse makhura mattheene oowaapheella nave oohuruwella marupo wi okhalle mukutho wawoosiwa viikho wa Apwiya

¹⁵ Aakusettho apellepetu ni makhuriiweene navettho makhura mattheene a ohapa, ayo anaavenyihelleeye nimodda ni apellepetwaalle.

¹⁶ Vano mullupa mukutho ashellellihe ddittheddenennddo vanikuwani wi okhalle mukutho wa othu, wawoosiwa viikho, wa nthuko nawaaddivella Apwiya. Makhura mattheene a enama tti a Apwiya.

¹⁷ Nenna nikhalle lamulo wa enthawi yoohimalla wa mibado ddanyu ddittheddene wi muhiche nikhame apaalle makhura a enama orive weko nko munaakhallekeenyu.”