Levitiko 27 - Mawu a Mulluku

Malamulo a ddoovelleella wa Apwiya

¹ Apwiya yaallota ni Mose wi

² aalleelle Aisraele wi, “Muthu allupella wi aneeromuvelleella muthu mukhwaaye wa Apwiya koma vatulli viwa apaalla omoopolla,

³ ddoophwanella ovelleella va mullopwana a miyakha 20 ophiyera miyakha 60, ddikhalle makobiri a siliva 50, voothwarani yoolingella yoopatuleya.

⁴ Muthwiine akhalla aamutthiyana, mutengweene okhalle wookwakhwana makobiri a siliva 30.

⁵ Akhalla muthu a variyari va miyakha mitthanu ni 20, mutengwiiwa okhalle wookwakhwana makobiri a siliva 20 va arive muthu aamullopwana nave makobiri a siliva khumi va arive muthu aamutthiyana.

⁶ Akhalla muthu a variyari va mweeri mmodda ni miyakha mitthanu, mutengwiiwa okhalle wookwakhwana makobiri a siliva matthanu va arive muthu aamullopwana nave mararu va arive muthu aamutthiyana.

⁷ Akhalla muthu a miyakha 60 apaalle okhwaranya vaava, okhalleke mutengo wookwakhwana makobiri a siliva 15 va arive muthu aamullopwana nave khumi va arive muthu aamutthiyana.

⁸ Akhalla muthu oohoowa wunchichi wawi khawora ollivella mutengo yoolla, aweena muthooyo wa mullupa mukutho nave mullupa mukuthooyo aromolle mutengo wa muthooyo, Mutengo oyo mullupa mukuthooyo anaaromolleeye okhalle woollikana ni mmo oollupellooyo anaaworeeye ollivella.”

⁹ “Muthu allupella wi aneerovelleella enama yawaakhullelliwa ovelleelliwa mukutho wa Apwiya, enama yawi ddiidda tti yoopatuleya.

¹⁰ Muthooyo ahivelleelle emodda apaalle waakakhaniha ni emodda ahivelleelle yoonanara munipuroni mwa yaphaama. Nave aakakhaniha enameeyo ni emodda, ddittheddenennddo ddinaakhalle ddoopatuleya.

¹¹ Yakhalla enama yooripihiwa, yoohaakhullelliwa ovelleelliwa mukutho wa Apwiya, muthooyo awe ni enameeyo wa mullupa mukutho.

¹² Nave mullupa mukuthooyo aromolle mutengwiiwa vawoonani wi tti yaphaama apaalle yoonanara. Moollikana ni mmo mullupa mukutho anaaromollelleeye, mutengo onaakhalle yooyo.

¹³ Koma apaalla wi ayoopolle, oonjererevo emodda mwa ezigawo dditthanu dda mutengooyo.”

¹⁴ “Muthu avelleella enyumbaaye wi ekhalle yoopatuleya ya Apwiya, mullupa mukutho aromolle mutengwiiwa vawoonani wi tti yaphaama apaalle yoonanara. Moollikana ni mmo mullupa mukutho anaaromollelleeye, mutengo onaakhalle yooyo.

¹⁵ Koma apaalla wi ayoopolle, oonjererevo emodda mwa ezigawo dditthanu dda mutengooyo nave eneerokhalla yaaye.”

¹⁶ “Muthu avelleella wa Apwiya embali ya emata yoohallana ovenyera wa makhollwaaye, mutengo okhalle woollikana ni mmiddo oyo onaalliwevo. Va mmiddo wa barele wookwakhwana makilogaramu 20, mutengwiiwa okhalle wookwakhwana makobiri a siliva 50.

¹⁷ Avelleella emataaye waambeella va muyakha woohakallallella miyakha 50, mutengwiiwa okhalle wamututha moollikana ni mmo waromollelliwiiwa.

¹⁸ Koma avelleella emataaye omanlle muyakha woohakallallella miyakha 50, mullupa mukutho eerengelle mutengo moollikana ni miyakha ddihanlle wi ophiye muyakha woohakallallella miyakha 50 nave avukulle va mutengo oyo waromolliwe.

¹⁹ Muthu apaalla woopolla emateeyo, va mutengo wa emateeyo oonjererevo echigawo emodda ya ezigawo dditthanu dda mutengooyo nave eneerokhalla yaaye.

²⁰ Koma aahipaallaka wi oopolle nave yakullihiwa wa muthu mmodda emateeyo khewa yoopolliwa.

²¹ Muyakha woohakallallella miyakha 50 wamalla, emateeyo enaakhalle yoopatulelliwa wa Apwiya wonanko emata yoovelleelliwa mukutho. Mullupa mukutho aneeroyikusa wi ekhalle yaaye.

²² Muthu avelleella wa Apwiya emata eyo ayikullalleeye, yeeyo khehiyo echigawo ya ddoohallana ovenyera wa makhollwaaye,

²³ mullupa mukutho eerengelle mutengwiiwa ophiyera muyakha woohakallallella miyakha 50. Vano muthooyo avelleelle makobiri ookwakhwanella mutengwiiwa va nllapo nenno wi ekhalle yoopatulelliwa wa Apwiya.

²⁴ Va muyakha woohakallallella miyakha 50, emateeyo ehokolloselliwe wa muthu oyo akullihalle emateeyo eyo yaari yoohallana ovenyera wa makhollwaaye.

²⁵ Vooromollani orive mutengo, mullupa mukutho eerengeke moollikana ni yoolingella yoopatuleya.”

²⁶ “Koma vihikhalle muthu anaamuvelleelle musaana awaamba a enama. Vawi ovenyera khalle musaanooyo tti Apwiya. Naari eri eng'ombe apaalle enkhosa apaalle epuri, yeeyo tti ya Apwiya.

²⁷ Yakhalla enama yooripihiwa, ayoopolle va mutengo mullupa mukutho anaawuromolleeye nave oonjererevo emodda mwa ezigawo dditthanu dda mutengooyo. Koma aahiyoopolla ekullihiwe va mutengo oyo mullupa mukuthooyo anaaromolleeye.”

²⁸ Erive ello yoovelleelliwa ni murima muttheene wa Apwiya, khaya tti muthu apaalle enama apaalle emata eyo eri yoohallana ovenyera wa makhollwaaye, ehikullihiwe apaalle woopolliwa. Ello yoovelleelliwa mwawi ddiidda wa Apwiya tti yoopatuleya wunchichi.

²⁹ Naari ari muthu oyo avelleelliwe ni murima muttheene, ahoopolliwe koma iiphiwe.

³⁰ “Erive echigawo yaneekhumi ya mu ellapo, khaya tti mmiddo wa muthayani apaalle tti ezipaso ddammuteekhoni tti ya Apwiya. Yeeyo tti yoopatuleya ya wa Apwiya.

³¹ Arive muthu apaalla wi oopolle erive echigawo yaneekhumi, oonjererevo emodda mwa ezigawo dditthanu dda mutengwiiwa.

³² Nave erive echigawo yaneekhumi ya eziweto eyo mbusa anaayeerengeeye, ekhalle yoopatuleyella wa Apwiya.

³³ Mwaneena ahikohe dda enamaayeeyo yaarimi eri yaphaama apaalle yoonanara nave ahiyaakakhanihe. Ayaakakhaniha ni emodda, piilliddennennddo ddineerokhalla ddoopatuleyella wa Apwiya nave khaddoopolla.”

³⁴ Yaalla tti malamulo ayo Apwiya yamulamulalliiwa Mose vamwaangoni wa Sinai wi aalleelle Aisraele.