Levitiko 26 - Mawu a Mulluku

Oowiiwellella ennadalisiwa

¹ “Muhiniipangella mafano, muhiimese ddoophwanaphwaniha ddoosema, malluku awuupuwelliha apaalle apoto amalluku oosema moophwanaphwanihella mu ellapwaanyu wi muddillapelleke. Mi tti Apwiya Mullukwaanyu.

² Musungeke nllapo naka Sabata ni oriiha nipuro naka naweella. Mi tti Apwiya.”

³ “Mwaathwareke malamulwaaka mattheene nave mwiiwellelleke moollikana ni mmo kuulamulelleemini,

⁴ kineerewuuvahani murimu mu enthawiiwa wi muneerohata ddawaata nave miteekho ddineerewimma ezipaso.

⁵ Muneerekewuuputha ddeko ophiyera enthawi yoorukulla ezipaso nave muneerekorukulla ezipaso ophiyera enthawi yawaalla. Muneerocha yoocha ophiyera muvonille nave muneerekokhalla mwiillaponaanyu mwamurendelle.

⁶ Kineerowaana murendelle mwiillaponaanyu nave muneerekokonaatthi woohikhallavo owoopopihani. Kineerowiikariha enama ddamuhakani ddawoopiha mwiillaponaanyu nave khamuwa mukhalla ekhoto.

⁷ Muneerowiikarihattho adanaanyu nave muneerewaagonjiha ni nsupada.

⁸ Athu atthanuve eneerekowiikariha athu 100 nave athu 100 a nyuwaano eneerekowiikariha athu 10,000 nave muneerewaagonjiha ni nsupada adanaanywaayo.

⁹ Kineerowuupuwellani nave kineeroweerihani wi mwaayare anamwani anchichi ni oweerihani wi mwaate. Kineerosunga echipanganwaaka ni nyuwaano.

¹⁰ Muneerekoocha ddookonella nave muneerekovenyihamo ddookonellannddo wi vikhalle mapuro oohiyamo ddishannddo.

¹¹ Kineerokhalla variyari vanyu nave ngiwa kuuhiyani.

¹² Kineereweeta variyari vanyu. Miyaano kineerokhalla Mullukwaanyu nave nyuwaano muneerokhalla athwaaka.

¹³ Mi tti Apwiya Mullukwaanyu oyo uukhumihalleni mu ellapo ya Iguputo wi muhikhalle akaporwiiwa. Koopwesa nigoli* nanyu wi mweeteke mwawookowa.”

Ollakiwa ekaamba yoohiiwellella

¹⁴ “Koma mwaahikiiwellella nave mwaahithwara malamulwaaka mattheenaalla,

¹⁵ mwaavevullaka malamulwaaka nave murimaanyu waakhootaka nnddo kinuulamulellaamini ophiyera ohiwiiwellella malamulwaaka mattheene ni otathilla echipanganwaaka,

¹⁶ kineeroweerellani ddawoopiha moorurumusa, ereta ddoohichiriheya navettho ereta yooviha mwiilli yawoononga miittho ni yoofookiha okumi. Muneerewaalla mmiddo ddanyu koma khamuphuravo ello vawi adanaanyu eneeroddicha.

¹⁷ Kineerewuureyani etulli nave adanaanyu eneerewuugonjihani, awiitana ni nyuwaano eneerewuulamulellani nave muneerekothawa muhiikarihiwaka.

¹⁸ Mwaahikiiwellella moonille ddittheddenenndda, kineerewuullakanittho mwawaanjerera otthanu ni opiilli ekaamba ya machimwaanyu.

¹⁹ Kineerowoononga masiva munakotellaanywaayo nave kineerotthattusa mirapo wi ddikhalle ddawumma navettho ethayaanyu wi ekhalle wonanko nlluku.

²⁰ Ollipihella mutteko wanyu khophuraka ello vawi khamuhataka ello nave miteekho ddanyu khaddiimmaka ezipaso.

²¹ “Vano mwavirellella oovaanyihana ni miyaano woohikiiwellella, kineerowaana millilli ddimodda va nyuwaano waanjerera otthanu ni opiilli ekaamba ya machimwaanyu.

²² Kineerewuurumihellani enama ddawoopiha ddamuhakani nave ddineerowoonongellani aniinyu owaaka eng'ombe ddanyu. Enama ddawoopiha dda muhakaninnddo ddineeroyeviha waata wanyu sika vano mu ettilla ddanyu khamuviraka athu.

²³ “Mwaahihokollweella wa miyaano kuullakilleni ddiidda nave mwavirellella weera ddoovaanyihana ni miyaano,

²⁴ kineerovaanyihanattho ni nyuwaano nave kineerewuullakani mwawaanjerera otthanu ni opiilli ekaamba ya machimwaanyu.

²⁵ Kineerewuurumihellani ekhoto eyo enuullakeni ekaamba yootathilla echipanganwaaka. Nave mwathawella m'mizindani mwanyu, kineerorumiha millilli variyari vanyu nave kineeroweeriha adanaanyu wi yuugonjiheni.

²⁶ Kineeromuyeviha buledaanyu a nllapo ni nllapo ophiyera atthiyana khumi eneerekomwaapeya buledi mu ufuni mmodda. Nave eneerewuukawellani buledooyo vang'ono vang'ono. Sika muneerekoocha koma woohivona.

²⁷ “Mwaahikiiwellella moonille ddittheddenenndda nave mwavirellella weera ddoovaanyihana ni miyaano,

²⁸ kineerovaanyihanattho ni nyuwaano moowalli nave miyaano mwaneenaaka kineerewuullakani mwawaanjerera otthanu ni opiilli ekaamba ya machimwaanyu.

²⁹ Muneerewaattakhuna aniinyu aallopwana ni aniinyu aatthiyana.

³⁰ Kineerowoononga mapurwaanyu oollapellellamo mafano omwaangoni ni okumulla makuwaanyu oothuwiheravo lubani* nave kineerovokhella mitembo ddanyu vaddullu va mafano oohikhalla ni okumi nave kineerewuuhiya ni nyuwaano.

³¹ Kineerotthattusa mizinda ddanyu wi ddikhalle matepe, kineerotthattusattho mapurwaanyu oollapellellamo wi ehikhalle ni athu nave ngaakhullella wi kiiwe nthuko nookiddivella na ddoovelleella ddanyu.

³² Kineerewoononga ellapwaanyu sika wi adanaanyu ayo enaakhalle mwemmo eneerottikhina.

³³ “Kineerowiikarihani ni nsupada. Nave kineerewuupallallesani variyari va mitundu ddimodda nave Ellapwaanyu khekhalla ni athu nave mizinda ddanyu ddineerotthattuwa matepe.

³⁴ “Va enthawi yeeyo ethaya eneerohakallallella miyakha ddawiithuuwa mwiillaponimmo muhiriiwa athu, nyuwaano muri mu ellapo ya adanaanyu. Vano ethaya eneerewiithuuwa ni ohakallallella miyakha ddawiithuuwa.

³⁵ Enthawi ettheene mwiillaponimmo muhinaakhalliiwa athu, ethaya eneerowiithuwa wiithuuwa wene nko ohinakhallekevo va miyakha ddittheddene nyuwaano mwakhalleenyumo.

³⁶ Nave naari nyuwaano munaahalle, kineerowiikaatthi murima wawoova mwa nyuwaano mwakhalla mu ellapo ya adanaanyu. Muneerekothawa muttottoroso wa makattha. Muneerothawa wonanko mmo muthu anathawelleeye nsupada nave muneerowiikuha muhiikarihiwaka.

³⁷ Muneerokwakwatullana wonanko munathawa ekhoto naari ahiivo oyo anawiikarihani. Nave khamukhalla ni masiva awi mullipane ni adanaanyu.

³⁸ Muneerotthollowesesa variyari va mitundu ddimodda nave ellapo ya adanaanyu eneerewuumiryani

³⁹ Naari amodda munaahallenyu nanyeenettho muneerotthollowa mwiillaponi ya adanaanyu ekaamba ya machimwaanyu nave muneerohoowattho ekaamba ya machimo a makhollwaanyu.

⁴⁰ “Vano edduullu ddanyu ddineerowulula machimwiiwa ni machimo a makhollwiiwa ekaamba ya ohiroromelleya wiwa nko yakillekilliiwana navettho ekaamba ya weeta moovaanyihana ni miyaano.

⁴¹ Valle ekaamba ya ddenndda miyaano kaavaanyihana kiwiikarihella mu ellapo ya adaniiwa. Vano yiiyeviha weekhiiwa, athu awumma mirimaalla nave yaakhullella ollakiwa ekaamba ya machimwiiwa.

⁴² Kineerewuupuwella echipanganwaaka ni Yakobo, Isaki ni Abrahamu nave ellapweeyo kineeroyuupuwella.

⁴³ Koma yaambe oyihiya ethaya wi ehakallallelle miyakha ddawiithuuwa, ellapweeyo yaahikhalla ni athu. Vano alliwa eneerollakeya ekaamba ya machimwiiwa vawi yaakhoota nnddo kaalamulalleemi nave mirima ddiwa ddahiitana ni malangizwaaka.

⁴⁴ Naari ddeereyille ddittheddenndda, alliwa eri mu ellapo ya adaniiwa, ngiwa kaakhoota nave ngiitanana ophiyera voowoonongesesa ni otathilla echipanganwaaka ni alliwaayo kaambiiwa mi tti Apwiya Mullukwiiwa.

⁴⁵ Koma vooweerellani echifundo kineerewuupuwella echipanganwaaka ni makhollwiiwa ayo kaakhumihalleemi mu ellapo ya Iguputo mitundu ddimodda ddoonaka wi kikhalle Mullukwiiwa. Mi tti Apwiya.”

⁴⁶ Yaalla tti malamulo ni malangizo ayo Apwiya yahiyalliiwa variyari va alliwa ni Aisraele vamwaangoni wa Sinai oweella mwa Mose.