Levitiko 25 - Mawu a Mulluku

Muyakha wa Sabata

¹ Apwiya yaallota ni Mose vamwaangoni wa Sinai wi

² aalleelle Aisraele wi, “Mwavollowa mu ellapo eyo kinuuvaheemini, mwaapatulelleke ethaya Apwiya muyakha waneetthanu ni piilli.

³ Va miyakha mitthanu ni mmodda mwallimeke emata ddanyu nave mwaphaddereke miteekho ddampesa ni orukulla ezipaso ddiwa.

⁴ Koma muyakha waneetthanu ni piilli, okhalle muyakha waawiithuuwiha ethaya, muyakha wowaapatulella Apwiya nave muhillime emata ddanyu apaalle ophaddera miteekho ddanyu ddampesa.

⁵ Muhinahata nnddo ddamenlle weekhiiwa m'matani mwanyu nave muhinarukulla mpesa vamiteekhoni ddanyu ddoohiphaddera. Muyakha yoolla okhalle muyakha wawiithuuwiha ethaya.

⁶ Muyakha waneetthanu ni piilli wawiithuuwooyo ethaya eneerewuuvahani yoocha yookwakhwanella attheenenyu, nyuwaano ni akaporwaanyu aallopwana ni aatthiyana, mullupa muttekwaanyu ni alleto ayo eri ni nyuwaano.

⁷ Eziweto ddanyu ni enama ddamuhakani ddineerocha ddawimma dda mwiillaponimmo.”

Muyakha woohakallallella miyakha 50

⁸ “Mweerenge miyakha 49 nnddo ddiri masabata matthanu ni meelli a miyakha.

⁹ Vano va nllapo na neekhumi na mweeri waneetthanu ni piilli, mwiipe nipallapata mookhuwa. Nllapo noopepesella machimo, tti nllapo nno muniipeenyu nipallapatanno mu ellapwaanyu ettheene.

¹⁰ Mupatule muyakha wa 50 nave mullalleye wi mukhalle ottaphuwa mu ellapo ettheene wa attheene ayo eri mwemmo. Wa nyuwaano muyakha yoolla okhalle wa ehakallallo. Muyakha yoolla emata eyo mwakullihalleenyu ehokolloselliwe wa nyuwaano apaalle wa edduullu ddanyu nave arive muthu akulliwe wonanko kaporo ahokollweelleke onibanjani waye.

¹¹ Muyakha wa 50 yooyo okhalle wa ehakallallo. Muhinamidda mmiddo apaalle ohata nnddo ddamenlle weekhiiwa m'matani mwanyu apaalle orukulla mpesa vamiittekhoni ddanyu ddoohiphaddera.

¹² Okhalle muyakha wa ehakallallo ni woopatuleya wa nyuwaano nave muche ddoomella weekhiiwa.

¹³ “Muyakha yoolla emata eyo mwakullihalleenyu ehokolloselliwe wa nyuwaano.

¹⁴ Wamukullihella mukhwaawo emata apaalle wakulla emata wa mukhwaawo vihikhalle ollekana.

¹⁵ Okulle wa mukhwaawo voothwarani echiwerengero ya miyakha ddaviralle waambeella va muyakha woohakallallella miyakha 50 eviralle. Nave mukhwaawooyo uukullihelle voothwarani waata wa miyakha ddoohata nnddo ddihanlle.

¹⁶ Miyakha ddaata woonjerere mutengo, miyakha ddayeva oyevihe mutengo vawi anuukullihella voothwarani waata wa miyakha ddoohata.

¹⁷ Sika muhillekane koma mumoove Mullukwaanyu. Mi tti Apwiya Mullukwaanyu.”

Okatamiha wa muyakha wa Sabata

¹⁸ “Muthwareke malamulwaaka mattheene nave mwiiwellelleke moollikana ni mmo kuulamulelleemini. Sika vano muneerokhalla mwiillaponimmo mwamurendelle.

¹⁹ Ethaya eneerewimma ezipaso ddiwa, muneeroddicha ophiyera ovona nave muneerokhalla mwiillaponimmo mwamurendelle.

²⁰ Mwakoha wi, ‘Ethiyo va muyakha waneetthanu ni piilli ninaacheke tini naahaalla nave naahihata ddeko?’

²¹ Miyaano kineerewuudalisani va muyakha waneetthanu ni mmodda wi ethaya ekhumihe ddoocha ddookwakhwana miyakha miraru.

²² Mwaawaallaka va muyakha waneetthanu ni raru munaakhalle muchaka ddoocha ddookonella. Ophiyera muyakha waneetthanu ni sese mwaahataka, munaachekeve ddoocha ddookonella.”

Ohokollosella wa ethaya

²³ “Ethaya ehikullihiwe wa enthawi yoohimalla vawi ellapo tti yaaka. Wa miyaano, nyuwaano tti alleto navettho aweeteeta.

²⁴ Mu ellapo ettheene munaakhalleenyu, mumwaakhullelle ethaya wi ehokolloselliwe wa mwaneena awaamba.

²⁵ “Muisraele mukhwaawo akhalla oohoowa nave akulliha emataaye mbalaayebalaaye ttuuwoopolla emateeyo.

²⁶ Muthu aahikhalla ni mbalaaye awi oopolle emateeyo nave vatulli viwa muthu oohoowooyo akhalla ni eyuuma, aphwanya ddookwakhwanella woopolla,

²⁷ eerenge miyakha waambeella nllapo nno akullihalleeye emateeyo. Amuhokolloselle makobiri ayo aphwanenlleeye ovelleella ophiyera muyakha woohakallallella miyakha 50 oyo akullalle emateeyo. Eeddiiddo akuse nipuro naye.

²⁸ Koma aahikhallana ddookwakhwanella woopolla, ethayeeyo enaakhalleve m'mattani mwa oyo akullallooyo, ophiyera muyakha woohakallallella miyakha 50. Va muyakha yoolla, ethayeeyo eneerohokollweella wa mwaneena awaamba.

²⁹ “Muthu akulliha enyumba mu muzinda wawaapheelliwa ni mpanda, ttuuwoopolla ohinamalle muyakha wamututha ayikullihalle.

³⁰ Muyakha muttheene wamalla enyumbeeyo ehinoopolliwe enaakhalle ya muthu akullallooyo wa mibado ddaye ddittheddene. Khehokollosiwa va muyakha woohakallallella miyakha 50.

³¹ Koma enyumba dda m'mawaani, ddoohaapheelliwa ni mpanda yeerena wonanko mmo eneerelliiwa ni ethaya dda mwiillaponimmo. Ttuuddoopolla nave ddineerohokollosiwa va muyakha woohakallallella miyakha 50.

³² Koma mizinda dda Alevi, enyumba nnddo ddiri m'mizindani mwiwa, Alevaayo ttuuddoopolla erive enthawi.

³³ Mulevi aahiyoopolla enyumba yakullihiwiiwa m'muzindani mwaye ahokolloselliwe va muyakha woohakallallella miyakha 50. Vawi enyumba ddiri m'mizindani dda Alevi tti ddayiwa variyari va Aisraele.

³⁴ Koma emata dda m'mawaani ddawaapheella muzindooyo ddihikullihiwe vawi tti ddayiwa wa enthawi yoohimalla.”

Waakongoliha athu oohoowa

³⁵ “Muisraele mukhwaawo akhalla oohoowa nave khanawora wiipwatha, weyaano omukavihere. Okhallekena wonanko mulleto apaalle muthu ookhalla ni weyaano wa enthawi yooyeva.

³⁶ Ohaakhelle makobiri awoonjerera va makobiri wakongolihalleewe alliwa apaalle woonjereravo ddimodda koma omooveke Mullukwaawo nave omwaakhullelle mbalaawooyo akhalleke ni weyaano.

³⁷ Muhinamukongolihaka makobiri ni yoolinga yawi mwaakhellevo makobiri awoonjerera apaalle omuvaha yoocha wi mupindulevo ello.

³⁸ Vawi mi tti Apwiya Mullukwaanyu oyo uukhumihalleni mu ellapo ya Iguputo wi kiwinnyeni ellapo ya Kanani wi kikhalle Mullukwaanyu.”

Ottaphulliwa wa akaporo

³⁹ “Muisraele mukhwaawo akhalla oohoowa nave iikulliha wa weyaano, ohinamweera kaporwaawo.

⁴⁰ Akhalle wonanko mullupa muttekwaawo navettho wonanko mulletwaawo. Uupharelleke mutteko ophiyera muyakha woohakallallella miyakha 50.

⁴¹ Vatulli viwa avenyewo wa weyaano ni anaayeene, aye onibanjani naye, ahokollweelle ethaya yamakhollwaaye.

⁴² Aisraele tti oorumeyellaaka ayo kaakhumihalleemi mu ellapo ya Iguputo, sika ehikullihiwe wonanko akaporo.

⁴³ Ohaalamulelle mwa ekuku koma omooveke Mullukwaawo.

⁴⁴ Ttuuwaakulla akaporo aallopwana ni aatthiyana wa mitundu ddimodda dda athu oowaapheellani.

⁴⁵ Ttuuwaakullattho alleto ookhalla ni nyuwaano apaalle edduullu ddiwa ddooyarelliwa mwiillaponi mwanyu. Yaawo ttuukhalla aanyu.

⁴⁶ Akaporwaayo ttuuhalla m'mattani mwa aniinyu nyuwaano mwakhwa wi ekhalle yoohallaniiwa enthawi ddittheddene. Yaayo ttuuweesa akaporo koma Aisraele akhwiinyu muhaalamulelle mwa ekuku.

⁴⁷ “Mulleto apaalle muthu ookhalla ni nyuwaano wa enthawi yooyeva akhalla ni eyuuma nave Muisraele mukhwiinyu ookhalla vakhuviru ni nyuwaano akhalla oohoowa, iikulliha yeekhaaye wa mulletooyo apaalle muthu ookhalla ni nyuwaanoolle apaalle wa arive muthu a munibanjani na mulletooyo,

⁴⁸ Muisraele mukhwiinyu awiikullihooyo ttuuwoopolliwa. Mmodda mwa abalaaye ttuumoopolla.

⁴⁹ Mwanamunniwa a attiitthinnya apaalle mwaana a mwanamunniwa a attiitthinnya apaalle arive mbalaaye, attheenaayo ttuumoopolla. Nave awiikullihooyo akhalla ni eyuuma, ttuuddoopolla.

⁵⁰ Yeerengelane ni muthu amukullallooyo waambeella muyakha oyo iikullihalleeye wa ophiyera muyakha woohakallallella miyakha 50. Mutengo wawoopolliwa wayenko wiiwanane ni waata wa miyakhannddo nave ollivelliwa wa mullupa mutteko wa enthawi eyo akhalle ni olliye.

⁵¹ Miyakha ddoohalla ddakhalla wi tti ddinchichi va mutengo oyo amullivenlleeye voomukullani, olliye ahokollose mutengo woomoopollellooyo.

⁵² Ddahalla miyakha ddooyeva wi ophiye muyakha woohakallallella miyakha 50, Yeerengelane ni amukullallooyo nave voothwarani miyakha ddihanlle ophiyera muyakha woohakallallella miyakha 50, ahokollose mutengo woomoopollellooyo.

⁵³ Akhallekena wonanko mullupa mutteko oolembiwa orive muyakha. Ahimulamule mwa ekuku.

⁵⁴ Aahoopolliwa mwa ettilla ddenndda, anaawoopolliwe va muyakha woohakallallella miyakha 50, olliye ni anaaye.

⁵⁵ Vawi wa miyaano Aisraele tti oorumeyellaaka ayo kaakhumihalleemi mu ellapo ya Iguputo. Mi tti Apwiya Mullukwaanyu.”