Levitiko 24 - Mawu a Mulluku

Mapwathello a enyali

¹ Apwiya yaallota ni Mose wi,

² Aalamule Aisraele wi emuvahe makhura a olivi oopangiwa phaama, ookharihella enyali wi ekhareke mahiiyu mattheene.

³ Aroni ayikharihe enyaleeyo vamiitthoni va Apwiya otte wa ekatani yootchinga nibokosi na echipangano nno niri m'musasani wamutthukumano wi ekhareke waambeella misikuwa ophiyera ohinase. Nenna nikhalle lamulo wa enthawi yoohimalla wa mibado ddanyu ddittheddene.

⁴ Aroni apwatheke enyali ddittheddene ddiri va yoohiyavo enyali ya golide aphaama wunchichi wi ddikhalle ddookhara wiilliwiilli vamiitthoni va Apwiya.

Buledi oopatuleya

⁵ “Mukuse makilogaramu khumi ni meelli a othu waphaama, mumwaapeye buledi khumi ni miilli.

⁶ Mumuhiye m'mizereni miilli vatebuloni oohuruwelliwa ni golide aphaama wunchichi vamiitthoni va Apwiya, orive muzere okhalle wa buledi mutthanu ni mmodda.

⁷ Orive muzere muhiyevo lubani* naphaama wi ekhalle echikumbuso yawi buledooyo tti oopatuleya wa Apwiya.

⁸ Va nirive nllapo na Sabata, Aroni amuhiyeke buledi a mukuthooyo wiilliwiilli vamiitthoni va Apwiya munipuroni na Aisraele wi ekhalle echipangano ya enthawi yoohimalla.

⁹ Yoocheeyo ekhalle ya Aroni ni anaaye nave eyichelle m'mapuroni oopatuleya vawi wa alliwa yeella tti yoopatuleya wunchichi, yoovenyera va mikutho ddawoosiwa viikho wa Apwiya. Lamulo nenna nikhalle na enthawi yoohimalla.”

Ollaka woolungama

^10-11 Waakhalla muthu mmodda oyo amennya yaari Muisraele koma attiitthinnya yaari Muiguputo. Amennya yaari Shelomiti mwaana a Dibiri a nlloko na Dani. Nllapo nimodda aaya wa Aisraele nave aakangana ni Muisraele mmodda omisasani nave aavevulla nnddina na Apwiya anitembelela. Vano yaawaana wa Mose.

¹² Yaamusunga ophiyera opaalla wa Apwiya odduwanyeyille.

¹³ Apwiya yaallota ni Mose wi,

¹⁴ “Omukhumihe omisasaninko muthu ootembelelooyo. Attheene ayo yiiwalle atembelelaka etthinddaanyere mattiiwa vamuruni vaye, osimikiza wi tti oochimwa nave athu attheene emuvokhe malluku.

¹⁵ Vano waalleelle Aisraele wi, ‘Arive muthu oomutembelela Mulluku machimwaaye ekhalle vamuruni vaye.

¹⁶ Oovevulla nnddina na Apwiya khaya tti Muisraele apaalle mulleto iiphiweke voovokhiwani malluku ni Aisraele attheene.’

¹⁷ “Arive muthu anamuukutha muthu ni omwiipha, olliyettho iiphiwe.

¹⁸ Muthu iipha echiweto ya mukhwaaye allive emodda, okumi olliva okumi.

¹⁹ Muthu amurakalliha mukhwaaye, nayeenettho amweerelle mwemmo.

²⁰ Nikhuva olliva nikhuva, niittho olliva niittho, niino olliva niino. Moollikana ni mmo muthu amurakallihelleeye mukhwaaye nayeenettho amweerelle mwemmo.

²¹ Muthu iipha echiweto ya mukhwaaye allive emodda koma muthu oomwiipha mukhwaaye iiphiwe.

²² “Lamulo na Muisraele ni mulleto nikhalle nimoddave nenno. Mi tti Apwiya Mullukwaanyu.”

²³ Mose ahaalleella ddenndda Aisraele nave alliwa yaamukhumiha muthu ootembeleloolle omisasani, emuvokha malluku. Sika Aisraele yaheera nnddo Apwiya yamulamulalliiwa Mose.