Levitiko 23 - Mawu a Mulluku

Mallapo a ehakallallo ya mallapello

¹ Apwiya yaallota ni Mose wi

² aalleelle Aisraele wi, “Mallapo a ehakallallo ootthoolliwa a Apwiya ayo munaawaallalleyeenyu wi ekhalle mallapo a mitthukumano ddoopatuleya, mallapo a ehakallallo ayo miyaano kaatthoonlleemi.

³ Va mallapo matthanu ni nimodda ophareke mitteko ddawo koma nllapo naneetthanu ni piilli tti nllapo na Sabata, nllapo nawiithuuwa, nllapo na mutthukumano woopatuleya. Tti nllapo na Sabata na Apwiya nave onisungeke orive weko onaakhallekeewe.

⁴ “Alla tti mallapo mamodda a ehakallallo ootthoolliwa ni Apwiya, mallapo a mitthukumano ddoopatuleya ayo onaawaallalleyeewe va enthawiiwa.

Paska ni Ehakallallo ya Buledi Oohikhalla ni Yisiti

⁵ “Va nllapo na 14 misikuwa na mweeri wawaamba, tti nllapo na Paska a Apwiya.

⁶ Nave va nllapo na 15 na mweeri yooyo tti nllapo nawaamba Ehakallallo ya Buledi Oohikhalla ni Yisiti, nowaariiha Apwiya. Va mallapo matthanu ni meelli mumucheke buledi oohikhalla ni yisiti.

⁷ Va nllapo nawaamba na ehakallallo mweere mutthukumano woopatuleya nave muhiphareke mutteko.

⁸ Koma muvelleelleke nllapo ni nllapo mukutho wawoosiwa viikho wa Apwiya va mallapo matthanu ni meelli. Nllapo naneetthanu ni piilli tti nllapo na mutthukumano woopatuleya, muhiphareke mutteko.”

⁹ Apwiya yaallota ni Mose wi

¹⁰ aalleelle Aisraele wi, “Mwavollowa mu ellapo eyo kinaawuuvaheemini ni ohata dda m'matani mwanyu, muwe wa mullupa mukutho ni mutolo wa tirigu awaamba owaraalla mwa ddoohata ddanyu.

¹¹ Mullupa mukutho atukhullelle muddullu mutolooyo vamiitthoni va Apwiya wi nyuwaano mwaakhelliwe. Awutukhullelle muddullu va nllapo noothwarellella namalla nllapo na Sabata.

¹² Va nllapo nno munaatukhullelleenyu muddullu mutolooyo, mumuvelleellettho nankhoro a enkhosa ya muyakha mmodda oohirakalla wi akhalle mukutho wooshellelliha woovelleelliwa wa Apwiya.

¹³ Mukutho wa othu waphaama ni enkhoseeyo okhalle makilogaramu meelli a othu waphaama woottakanyihera ni makhura wi okhalle mukutho wawoosiwa viikho, wa nthuko nawaaddivella Apwiya. Nave muvelleelle mukutho wayoowirya yookwakhwana lita nimodda ni enkhoseeyo.

¹⁴ Muhinamucha tirigu yoolla awumma apaallettho mukitthi apaalle buledaaye nllaponna nihinaphiye, ophiyera muwiillena mukutho wa Mullukwaanyu. Nenna nikhalle lamulo wa enthawi yoohimalla wa mibado ddanyu ddittheddene orive weko nko munaakhallekeenyu.

Ehakallallo ya Ddoohata Ddawaamba

¹⁵ “Waambeella nllapo noothwarellella namalla nllapo na Sabata, nne mwavelleelleenyu mutolo wootukhullella muddullu vamiitthoni va Apwiya, mweerengeke milungu mitthanu ni miilli dda mututha.

¹⁶ Va nllapo na 50, nllapo noothwarellella namalla nllapo na Sabata naneetthanu ni meelli, muweena mukutho wa tirigu anaanweene wa Apwiya.

¹⁷ Nirive nibanja niweena mitthi miilli dda buledi nave miillinnddo ttuuwaana wonanko yoovelleella yootukhullella muddullu vamiitthoni va Apwiya. Orive mwitthi okhalle wookwakhwana makilogaramu meelli a othu waphaama nave wawoosiwa moottakanyihera ni yisiti wi ddikhalle dda ddoohata ddawaamba ddoovelleella wa Apwiya.

¹⁸ Vamodda ni buledooyo muvelleellettho anankhoro a enkhosa atthanu ni eelli a muyakha mmodda oohirakalla ni musaana mmodda a anankhoro a eng'ombe ni eenkhosa piilli. Ddenndda ddikhalle mukutho wawoosiwa viikho woovelleelliwa wa Apwiya ni mukuthwaaye wa othu owaaka mukutho wa ddoowirya. Ddittheddenennddo ddikhalle mukutho wawoosiwa viikho, wa nthuko nawaaddivella Apwiya.

¹⁹ Muvelleellettho nankhoro a epuri wonanko mukutho woopepesella machimo ni a nankhoro a enkhosa eelli a muyakha mmodda wonanko mukutho wa eyaattano.

²⁰ Mullupa mukutho amutukhullelle muddullu buledi a ddoohata ddawaamba ni a anankhoro a enkhosa eellaalle wa Apwiya. Mikutho ddenndda tti ddoopatuleya wa Apwiya nave tti dda allupa mukutho.

²¹ Vano va nllapo nenno muwiithane athu o mutthukumano woopatuleya nave muhinaphara mutteko. Nenna nikhalle lamulo wa enthawi yoohimalla wa mibado ddanyu ddittheddene orive weko nko munaakhallekeenyu.

²² “Mwaahataka m'matani mwanyu, muhinahataka ophiyera m'malireni mwiwa nave muhinuurullakamo. Ddennddo mwaahiyere athu oohoowa navettho alleto. Mi tti Apwiya Mullukwaanyu.”

Ehakallallo ya Muyakha Wanaanweene

²³ Apwiya yaallota ni Mose wi

²⁴ aalleelle Aisraele wi, “Va nllapo nawaamba na mweeri waneetthanu ni piilli, munisungeke wi nikhalle nllapo nuullupalli nawiithuuwa, nllapo nawuupuwella, noollalleyiwa ni mapallapata, nllapo na mutthukumano woopatuleya.

²⁵ Muhiphare mutteko nave muvelleelle mukutho wawoosiwa viikho wa Apwiya.”

Nllapo noopepesella machimo

²⁶ Apwiya yaallota ni Mose wi,

²⁷ “Nllapo naneekhumi na mweeri waneetthanu ni piilli tti naweera mutetho woopepesella machimo. Nenna nikhalle nllapo naweera mutthukumano woopatuleya. Muhalle ocha nave muvelleelle mukutho wawoosiwa viikho wa Apwiya.

²⁸ Muhinaphara mutteko nllapo nenna kaambiiwa tti nllapo naweera mutetho woopepesella machimwaanyu vamiitthoni va Apwiya Mullukwaanyu.

²⁹ Koma oyo aripihiwe ekaamba yoohihalla ocha,* avenyihiwe variyari va Aisraele.

³⁰ Arive muthu oyo anaaphare mutteko va nllapo nenna, kineeromoononga variyari va Aisraele.

³¹ Muhinaphara orive mutteko. Nenna nikhalle lamulo wa enthawi yoohimalla wa mibado ddanyu ddittheddene orive weko nko munaakhallekeenyu.

³² Va nllapo naneetthanu ni sese na mweeri, waambeella misikuwiiwa ophiyera misikuwa mamodda oothwarellella musunge nllaponno wonanko nllapo na Sabata nave muhalleke ocha.”

Ehakallallo ya Misasa

³³ Apwiya yaallota ni Mose wi

³⁴ aalleelle Aisraele wi, “Waambeella va nllapo na 15 na mweeri waneetthanu ni piilli va mallapo matthanu ni meelli, vikhalleke Ehakallallo ya Misasa yowaariihana Apwiya.

³⁵ Va nllapo nawaamba vikhalle mutthukumano woopatuleya nave muhiphare mutteko.

³⁶ Nllapo ni nllapo na mallapo matthanu ni meelli muvelleelleke mukutho wawoosiwa viikho wa Apwiya. Va nllapo naneetthanu ni raru mukhalleke ni mutthukumano woopatuleya ni ovelleellattho mukutho wawoosiwa viikho wa Apwiya. Yooyo tti mutthukumano muullupalli nave muhiphare mutteko.”

³⁷ “Yaalla tti mallapo a ehakallallo ootthoolliwa waariiha Apwiya, ayo munaawaallalleyekeenyu wi tti enthawi ya mutthukumano woopatuleya. Mallapo yaayo, muvelleelleke wa Apwiya mikutho ddawoosiwa viikho wonanko dda ddooshellelliha, dda othu, dda enama ni dda ddoowirya, orive mukutho nllapo naayenaaye.

³⁸ Muvelleelle ddennddo ni mikutho dda va nllapo na Sabata na Apwiya, emphaso ddanyu, mikutho ddanyu ddittheddene ddoollupellella ni mikutho ddanyu ddittheddene dda opaalla wanyu nnddo munaddivelleelleenyu wa Apwiya.

³⁹ “Va nllapo na 15 na mweeri waneetthanu ni piilli, muhatille ddeko m'matani mwanyu, mwaariihe Apwiya wa mallapo matthanu ni meelli. Nllapo nawaamba nikhalle nllapo nuullupalli nawiithuuwa nave nllapo naneetthanu ni raru nikhallettho nllapo nuullupalli nawiithuuwa.

⁴⁰ Va nllapo nawaamba mukuse ezipaso ddaphaama, enthambi dda kanjeza, enthambi dduullupalli dda makattha manchichi ni dda nnjalle nave muhakallalle vamiitthoni va Apwiya Mullukwaanyu, mallapo matthanu ni meelli.

⁴¹ Orive muyakha, mallapo matthanu ni meellaayo mwaasungeke wi ekhalleke mallapo a ehakallallo yowaariiha Apwiya. Nenna nikhalle lamulo wa enthawi yoohimalla wa mibado ddanyu ddittheddene. Munisungeke mweeri waneetthanu ni piilli.

⁴² Mukhalleke m'misasani mallapo matthanu ni meelli. Aisraele attheene ekhalleke m'misasani,

⁴³ wi edduullu ddanyu ddidduwelle wi tti miyaano kaweerihalle Aisraele wi ekhalle m'misasani, kaakhumihalleemi mu ellapo ya Iguputo. Mi tti Apwiya Mullukwaanyu.”

⁴⁴ Mmu tti mmo Mose aatthopoollelleeye Aisraele dda mallapo a ehakallallo ootthoolliwa, owaariiha Apwiya.