Levitiko 22 - Mawu a Mulluku

Mikutho dda Apwiya tti ddoopatuleya

¹ Apwiya yaallota ni Mose wi

² amulleelle Aroni ni anaaye wi, “Muriiheke ddeko ddoopatuleya nnddo Aisraele enavelleelliiwa wa miyaano woova wi munaaripihe nnddina naka naweella. Mi tti Apwiya.

³ Arive muthu mwa edduullu ddanyu dda mibado ddittheddene, asusera va ddoopatuleya nnddo Aisraele yavelleelliiwa wa Apwiya ari ooripihiwa avenyihiwe vamiitthoni vaka. Mi tti Apwiya.

⁴ Arive muthu mwa edduullu ddawo oyo ari ni makate apaalle oyo anakhumiha ddooripihiwa m'mwiillini mwaye ahichena ddoopatuleya ophiyera eellihiwe. Mullupa mukutho tti ooripihiwa attannya ello ettannyiwe ni ello yookhwa, atathillella vatthi ellopwana,

⁵ attannya ello yawaapadda eyo eri yooripihiwa nave amuttannya arive muthu oyo anaamuripihe mu erive ettilla.

⁶ Mullupa mukutho aripihiwa aneerokhalla ooripihiwa ophiyera misikuwa nave ahiche ddeko ddoopatuleya ophiyera ahapille mwiilli muttheene.

⁷ Aneerokhalla aweella nndduwa navollowa nave vatulli viwa ttuucha ddeko ddoopatuleya vawi ddennddo tti ddoocha ddaye.

⁸ Ahiiripihe voochani ello yookhwa weekhiiwa apaalle yoottakhuniwa ni enama ddawoopiha. Mi tti Apwiya.

⁹ Sika allupa mukutho esunge malamulwaaka wi ehichimwe nave ehikhwe ekaamba yooripaha malamulwaayo. Mi tti Apwiya ayo enaapatula.

¹⁰ “Muthu shisha ahiche ddeko ddoopatuleya. Mulleto a mullupa mukutho apaalle mullupa muttekwaaye ahichenattho ddeko ddoopatuleya.

¹¹ Koma mullupa mukutho amukulla kaporo wi akhalle aye, kaporooyo ttuuchana ddekonnddo. Nave akaporo attheene eyariwe mpa mwa mullupa mukutho ttuuchana.

¹² Mwaana aamutthiyana a mullupa mukutho ahichekena ddeko ddoopatuleya atthelliwa ni muthu shisha.

¹³ Koma mwaana aamutthiyanooyo mamune akhwa apaalle ahiyiwa ni mamune nave aahikhalla ni mwaana ahokollweella owaniwa wonanko mmo aariiye namwalli ttuuchana yoocha yaattiitthinnya. Koma muthu shisha ahichena.

¹⁴ Muthu shisha achana yoocha yoopatuleya moohidduwella, amullivelle mullupa mukuthooyo ekaamba ya yoocheeyo nave oonjererevo yaneetthanu ya mutengwiiwa.

¹⁵ Allupa mukutho ehiripihe ddoopatuleya dda Aisraele nnddo enaddivelleelliiwa wa Apwiya.

¹⁶ Ahaachimwihe ni waattatthamullella Aisraelaayo voowaakhullellani ocha ddoocha ddoopatuleya. Mi tti Apwiya ayo enaddipatula.”

¹⁷ Apwiya yaallota ni Mose wi

¹⁸ amulleelle Aroni ni anaaye ni Aisraele attheene wi, “Arive Muisraele apaalle mulleto ookhalla variyari vanyu awaana mukutho moollupella apaalle mwa opaalla waye wi okhalle mukutho wooshellelliha,

¹⁹ mukuthooyo oneerewaakhelliwa wakhalla enama yaamullopwana yoohirakalla, eng'ombe apaalle enkhosa apaalle epuri.

²⁰ Muhinavelleella erive enama yoorakalla kaambiiwa mi Apwiya ngaakhella.

²¹ Muthu avelleella mukutho wa eyaattano wa Apwiya wi eere nnddo moollupella apaalle mwa opaalla waye nave yakhalla eng'ombe apaalle enkhosa apaalle epuri ekhalle yoohirakalla.

²² Muhinavelleella wa Apwiya enama ddoohoona apaalle ddoorakalla apaalle ddoophaddeya echiwalo apaalle ddookhumiha marohi m'mwiillini mwiwa apaalle dda ereta yooneena apaalle ddoovelle. Enama ddawi ddiidda ehiddivelleelle vanikuwani wi ddikhalle mukutho wawoosiwa viikho wa Apwiya.

²³ Ttuuvelleella enama eyo erakamille apaalle ekhuveyille mweto mmodda wakhalla mukutho wa opaalla waye koma wakhalla mukutho woollupella tti woohaakhullelliwa.

²⁴ Erive enama eyo mukhoveni mwiwa muhumbuwalle, mupweseyille, mwaahuwalle apaalle muphaddeyille, muhiyivelleelle mukutho wa mi Apwiya mu ellapwaanyu.

²⁵ Nave muhivelleelle erive enama ya mutundu yoolla eyo muyaakhenlleenyu wa mulleto wi okhalle mukutho wa yoocha woovelleelliwa wa Apwiya. Ddenndda kheddaakhella vawi ddoorakalla.”

²⁶ Apwiya yaallota ni Mose wi,

²⁷ “Eng'ombe, enkhosa apaalle epuri yarelliwa, ekhalle ni meewa wa mallapo matthanu ni meelli. Nave waambeella nllapo naneetthanu ni raru oya muhoollo ttuuwaakhelliwa wi ekhalle mukutho wawoosiwa viikho, woovelleelliwa wa Apwiya.

²⁸ Meewooyo muhinamwiipha ni mwanaye nllapo nimodda.

²⁹ Mwaavelleellaka mukutho woothokoza wa Apwiya, muyivelleelle mu ettilla yawi yaakhelliwe.

³⁰ Muyiche nllapo nenno nave muhiyisunge ophiyera osiisello ohinase. Mi tti Apwiya.

³¹ “Vano muthwareke nave mwiiwellelleke malamulwaaka. Mi tti Apwiya.

³² Muhinaripiha nnddina naka naweella koma nikhalle naweella variyari va Aisraele. Mi tti Apwiya, ayo enuupatulani.

³³ Nave kahuukhumihani mu ellapo ya Iguputo wi kikhalle Mullukwaanyu. Mi tti Apwiya.”