Levitiko 21 - Mawu a Mulluku

Opatuleya wa allupa mukutho

¹ Apwiya yaallota ni Mose wi aalleelle anamwani a Aroni wi, “Vihikhalle naari mmodda oyo anaawiiripihe voottannyani mutembo variyari va abalaaye.

² Koma ttuuttannya mutembo wa amennya, wa attiitthinnya, wa mwanaye aamullopwana, wa mwanaye aamutthiyana, wa mwanamunne

³ apaalle wa murokoriye oohitthelliwa oyo anakhalla vakhuviru ni olliye vawi khanna mullopwana.

⁴ Mullupa mukutho ahiiripihe ni mutembo wa allamwaaye.

⁵ Allupa mukutho ehicheme meehi omuruni wiwa apaalle ochema mukhwipi mwa ereru ddiwa apaallettho wiiremarema vamwiillini.

⁶ Ekhalle aweella vamiitthoni va miyaano Mulluku nave ehiripihe nnddina naka. Vawi ennaheraatthi mukutho woowoosiwa viikho. Yoocha ya miyaano Mullukwiiwa, ekhalleke yaweella.

⁷ Ehinamutthella mutthiyana ooraruwa apaalle mutthiyana oyo aripihiwe navettho ehimutthelle mutthiyana oyo ahiyiwe ni mamune vawi mullupa mukutho tti aweella vamiitthoni va Mullukwaaye.

⁸ Akhalle aweella wa nyuwaano vawi annavelleella yoocha ya Mullukwaanyu. Akhalle aweella wa nyuwaano kaambiiwa mi Apwiya ayo enuupatulani tti aweella.

⁹ Nave mwaana aamutthiyana a mullupa mukutho iiripiha vookhallani ooraruwa, annaaripiha attiitthinnya. Vano mwaanooyo emushellellihe.

¹⁰ “Muthu oyo ari mullupa mukutho muullupalli oyo yamuzozilliiwa ni makhura navettho oyo apatuliwe wi aware ddoowara dda ddoopatuleya ahikhalle oohipesa apaalle waahulla ddoowara ddaye wooniha ethakaraka.

¹¹ Ahivollowe nko ori orive mutembo ni wiiripihana apaalle mutembo wa attiitthinnya naari wa amennya.

¹² Ddeereya ddenndda ahikhume munipuroni naweella apaalle oripiha nipuro naweella na Mullukwaaye vawi makhura oomuzozella a Mullukwaaye ayo azozelliweeye eri va olliye. Mi tti Apwiya.

¹³ Nave amutthelle namwalli oohimudduwella mullopwana.

¹⁴ Ahimutthelle naamukhwelle apaalle mutthiyana oyo mamune amuhiyalle apaallettho mutthiyana ooraruwa. Koma amutthelle namwalli oyo oohimudduwella mullopwana variyari athu a nlloko naye,

¹⁵ wi ahiripihe edduullu ddaye vawi mi tti Apwiya ayo yamupatulalle.”

¹⁶ Apwiya yaallota ni Mose wi

¹⁷ allote ni Aroni wi, “Arive muthu a edduullu ddawo a mibado ddittheddene oyo arakanlle ahiwe wi aheraatthi mukutho wa Mullukwaaye.

¹⁸ Arive muthu oorakalla ahisusere vakhuviru ni nikuwa wonanko oohoona apaalle oottutthunya, oorakalla owiitthoni apaalle ookhalla ni mweto mmodda wookhuveya okhwaranya mukhwaaye,

¹⁹ oorakalla nnyallo apaalle oorakalla nnatta,

²⁰ amuralla apaalle ookhuveyesesa, oondeeluwa niittho, ookhalla ni ereta yooneena apaalle oovelle apaallettho oophweeya mukhoveni.

²¹ Vihikhalle naari mmodda a edduullu dda Aroni oyo arakanlle anaasuselle vakhuviru ni nikuwa wi aheraatthi mukutho wawoosiwa viikho wa mi Apwiya ekaamba ya orakalla waye ahaatamelle vakhuviru ni nikuwa wi avelleelle ddoocha dda Mullukwaaye.

²² Koma ttuucha ddoocha ddoovelleelliwa wa Mullukwaaye, buledi oopatuleya ni ddoocha ddoopatuleya ddoohalla dda mukutho.

²³ Koma ahiwe vakhuviru ni ekatani apaalle osusera va nikuwa kaambiiwa oorakalla woova wi anaaripihe ddeko ddaka ddaweellihiwa oopatuleya. Vawi mi tti Apwiya ayo yapatulalle ddeko ddenndda.”

²⁴ Ddenndda tti nnddo Mose amulleelleeye Aroni ni anaaye navettho Aisraele attheene.