Levitiko 20 - Mawu a Mulluku

Ollakiwa ekaamba ya ohiiwellella

¹ Apwiya yaallota ni Mose wi

² aalleelle Aisraele wi, “Arive Muisraele apaalle mulleto ookhalla variyari vanyu aaheraatthi mukutho anaaye wa mulluku Moleki, iiphiwe, athu attheene emuvokhe malluku.

³ Muthu yooyo kineeromureya etulli nave kineeromuvenyiha variyari va Aisarele akhwaaye, ekaamba yawi ohaaheraatthi anaaye wa Moleki ni oripiha nipuro naweella navettho ooripiha nnddina naka naweella.

⁴ Athu yakhalla wonanko khenamoona muthooyo amuheraatthiki mmodda mwa anaaye wa Moleki, emuhiya woohimwiipha,

⁵ miyaano kineeromureya etulli yooyo ni nibanja naye nittheene. Kineerewaavenyiha variyari va Aisraele akhwiiwa ni attheene enaddoonihella ohiroromelleya wa miyaano voomullapellani Moleki.

⁶ “Muthu oollota ni minepa dda athu ookhwa apaalle amanyaka, anaddoonihella ohiroromelleya wa miyaano voowaathwarani alliwaayo, kineeromureya etulli nave kineeromuvenyiha variyari va Aisraele akhwaaye.

⁷ Sika vano muddeellihe nave mukhalle aweella vawi mi tti Apwiya Mullukwaanyu.

⁸ Muthwareke malamulwaaka mattheene nave mwiiwellelleke moollikana ni mmo kuulamulelleemini mi tti Apwiya oyo anaweellihani.

⁹ “Arive muthu anaatembelela attiitthinnya ni amennya iiphiwa vawi nikhame niwa ninaakhalle vamuruni vaye.”

¹⁰ “Muthu araruwa ni mwaara amwaneena, mullopwanooyo ni mutthiyanooyo attheene yiiphiwe.

¹¹ Muthu ookona ni mwaara attiitthinnya, ohaarulla attiitthinnyaayo nave attheenaayo yiiphiwe. Nikhame niwa ninaakhalle va muru viwa.

¹² Muthu akona ni mwaara a mwanaye, attheenaayo yiiphiwe. Alliwaayo aararuwa voobaleni, nikhame niwa ninaakhalle va muru viwa.

¹³ Muthu akona ni mullopwana mukhwaaye wonanko anakona ni mutthiyana, attheenaayo aheera ello yoonanara wunchichi nave yiiphiwe. Nikhame niwa ninaakhalle va muru viwa.

¹⁴ Muthu amutthella mutthiyana, aatthellattho amennya a mutthiyanooyo wenko tti weera ello yoonanara wunchichi. Attheenaayo enaphwanella eshellellihiwe, mullopwanooyo ni atthiyanaayo wi ello yoonanara wunchichi yawi ddiidda ehiphwanyeye variyari vanyu.

¹⁵ Mullopwana akona ni enama iiphiwe ni enameeyo.

¹⁶ Mutthiyana akona ni enama iiphiwe ni enameeyo nave nikhame niwa nikhalle va muru va mutthiyanooyo ni enameeyo.

¹⁷ “Muthu amutthella murokoriye, mwaana aamutthiyana a attiitthinnya apaalle mwaana aamutthiyana a amennya, eelliinaayo aheera ello yoowulliha muru, vano attheenaayo evenyihiwe vamiitthoni va Aisraele attheene. Kaambiiwa kheyiiwellelle malamulo yaalla nave eneerollakiwa.

¹⁸ Muthu akona ni mutthiyana oonille mweeri sika wi oorulla woona mweeri waye nave mutthiyanooyo ohiirulla. Athu eellaalla evenyihiwe variyari va Aisraele akhwiiwa.

¹⁹ Muhinamurulla mwanamunniwa a amennyu apaalle murokoriwa a attiitthaanyu vawi wenko tti omurulla mbalaanyu. Eelliinaayo eneerophwanella ollakiwa.

²⁰ Muthu akona ni mwaara a mwanamunniwa a attiitthinnya, oomurulla mwanamunniwa aattiitthiinnyooyo. Eelliinaayo eneerewiireya va muru machimwiiwa nave eneerokhwa ehinna anamwani.

²¹ Muthu amutthella mwaara a mwanamunne, ohiiripiha. Oomurulla mwanamunnooyo nave eelliinaayo khekhalla ni anamwani.

²² “Sika vano muthwareke malamulwaaka nave mwiiwellelleke ddittheddene kinuulamuleemini wi ellapo munayeenyu wi mwakhallekemweeyo ehuurapheyeni.

²³ Muhinattakiheraka makhallello a mutundu wa athu ayo kinawiikariheemi nyuwaano mwaaphiyaka. Alliwa yaaneera ddenndda sika ekaambiiwa kananariweemina.

²⁴ Koma kahuulleellani wi muneerewaakhella ellapo wi ekhalle yaanyu, ellapo yooddalla mukaka ni enwi. Mi tti Apwiya Mullukwaanyu oyo uupatulalleni variyari va mitundu ddittheddene.

²⁵ Sika vano muhiyaniheke variyari va enama ddooripihiwa ni ddaweellihiwa, variyari va epallame ddooripihiwa ni ddaweellihiwa. Muhiiripihe voochani enama apaalle epallame apaallettho ddirive ddeko ddawaapadda nnddo kidditthoonlleemi wi muddidduwelle wi tti ddooripihiwa.

²⁶ Mukhalleke aweella vamiitthoni vaka vawi miyaano tti aweella nave kohuupatulani variyari va athu attheene wi mukhalle athwaaka.

²⁷ “Mullopwana apaalle mutthiyana oollota ni minepa dda athu ookhwa apaalle amanyaka yiiphiwe voovokhiwani malluku nave nikhame niwa nikhalle va muru viwa.”