Levitiko 2 - Mawu a Mulluku

Mukutho wa othu

¹ “Arive muthu aawaaka wa Apwiya wi avelleelle mukutho wa othu, mukuthooyo okhalle wa othu waphaama. Othooyo awuhelle makhura ni lubani,*

² nave aweena wa anamwani a Aroni. Mmodda a alliwaayo avahulle nnatta nimodda na othu woottakanyihera ni makhura nave amukusettho lubanaaye muttheene. Vano mullupa mukutho ashellellihe ddennddo vanikuwani, wooniha wi mukutho muttheenooyo woovelleelliwa wa Apwiya, wawoosiwa viikho, wa nthuko nawaaddivella Apwiya.

³ Ddoohalla dda mukuthooyo ddikhalle dda Aroni ni anaaye. Ddenndda tti ddoopatuleya kaambiiwa ddoovahulliwa vamukuthoni wawoosiwa viikho woovelleelliwa wa Apwiya.

⁴ “Aamuvelleellaka buledi awaapeyiwa mu ufuni, akhalle a othu waphaama woohikhalla ni yisiti woottakanyihera ni makhura apaalle akhalle buledi oohikhalla ni yisiti, ooshashaalla, oomara makhura.

⁵ “Mukuthwaaye wakhalla buledi awaapeyiwa vachiwayani, akhalle buledi a othu waphaama woohikhalla ni yisiti, woottakanyihera ni makhura.

⁶ Amuphaddephadde nave amuhelle makhura. Yooyo sika mukutho wa othu.

⁷ “Nave mukuthwaaye wakhalla buledi awaarikiwa muchiwayani, akhalle a othu waphaama woottakanyihera ni makhura.

⁸ Vano aweena mukutho yoolla wa Apwiya nave awuvelleelle wa mullupa mukutho, olliyooyo aweena vanikuwani.

⁹ Vaavo mullupa mukuthooyo akusewo echigawo emodda wooniha wi mukutho muttheenooyo woovelleelliwa wa Apwiya, vano awushellellihe vanikuwani. Yooyo sika mukutho wawoosiwa viikho, wa nthuko nawaaddivella Apwiya.

¹⁰ Ddoohalla dda mukuthooyo ddikhalle dda Aroni ni anaaye. Ddenndda tti ddoopatuleya kaambiiwa ddoovahulliwa vamukuthoni wawoosiwa viikho woovelleelliwa wa Apwiya.

¹¹ “Mukutho wa othu oyo onaavelleelleewe wa Apwiya ohikhalle ni yisiti vawi khewawaakhullelliwa ovelleella wa Apwiya mukutho wawoosiwa viikho oyo ori ni yisiti apaalle enwi.

¹² Piillinnddo ttuuwaana wonanko mukutho wa ddoohata ddawaamba ddoovelleelliwa wa Apwiya. Koma ahinaddishellelliha vanikuwani wi ddikhalle ni nthuko nawaaddivella Apwiya.

¹³ Mukuthwaaye wa othu awuhelleke mwiinyu vawi mwiinyooyo onnooniha echipangano ya variyari va olliye ni Mullukwaaye. Sika ahelleke mwiinyu mikutho ddaye ddittheddene.

¹⁴ Aavelleellaka wa Apwiya mukutho wa ddoohata ddawaamba, mukuthooyo okhalle wa tirigu anaanweene awaarika nave oosilleya.

¹⁵ Nave awuhelle makhura ni lubani nave yooyo sika mukutho wa othu.

¹⁶ Vano mullupa mukutho ashellellihe echigawo ya ddoosilleyanndde ni ya makhura navettho lubanaaye muttheene, wooniha wi mukutho muttheenooyo woovelleelliwa wa Apwiya. Yooyo tti mukutho wawoosiwa viikho, woovelleelliwa wa Apwiya.