Levitiko 19 - Mawu a Mulluku

Malamulo mamodda

¹ Apwiya yaallota ni Mose wi

² aalleelle Aisraele attheene wi, “Khallani aweella kaambiiwa mi Apwiya Mullukwaanyu tti aweella.

³ Arive muthu aavaheke olemu amennya ni attiitthinnya. Musungeke nllapo na Sabata. Mi tti Apwiya Mullukwaanyu.

⁴ Muhinahokollweella o mafano apaalle wiipangella milluku dda mikoko. Mi tti Apwiya Mullukwaanyu.”

⁵ “Mwaavelleellaka mukutho wa eyaattano wa mi Apwiya, mweereke ddawi mukuthwaanyu waakhullelliwe.

⁶ Muwuche nllapo nenno muwuvelleelleenyu apaalle waasaka wene koma wahalla ophiyera omuroto muwushellellihe.

⁷ Mwawucha omurotomvo, mooripihiwa nave tti ello yoonanara wunchichi.

⁸ Arive muthu oyo anaawuche, aneerollakiwa kaambiiwa ooripiha ello yoopatuleya ya Apwiya, muthu yooyo avenyihiwe variyari va Aisraele akhwaaye.”

⁹ “Mwaahataka m'matani mwanyu, muhinahataka ophiyera m'malireni mwiwa nave muhinuurullakamo.

¹⁰ Muhinahataka mpesa muttheene m'matani mwanyu nave muhinuurullakamo mpesa woomora m'matani mwanyu. Ddennddo mwaahiyere athu oohoowa navettho alleto. Mi tti Apwiya Mullukwaanyu.

¹¹ “Muhiiye, muhilleke nave muhootthe.

¹² Muhinallupella mu nnddina naka mwawoottha ni oripiha nnddina na miyaano mullukwaanyu vaweerani ddiiddo. Mi tti Apwiya.

¹³ “Muhimunyingallelle mukhwiinyu apaalle omwiiyera ddeko ddaye. Muhinasunga mallivello a mullupa muttekwaanyu mahiiyu mattheene ophiyera ohinase.

¹⁴ Muhinamutembelela muthu oohiiwa apaalle omukwakwatulla muthu oohoona. Koma mumooveke Mullukwaanyu. Mi tti Apwiya.

¹⁵ “Muhineeruzaka moohikhalla ni echilungamo. Muhinakhallaka ni ntthoollo variyari va athu oohoowa ni eeyuuma koma mumweeruzeke mukhwiinyu mwa echilungamo.

¹⁶ Muhinakhallaka nawunawu. Nave muthu mmodda akhalla ni mullatu muvelleelleke omboni wawoona wi mumukavihere wakhalla wooworeya. Mi tti Apwiya.

¹⁷ “Muhiniitana ni mbalaanyu m'murimani mwanyu koma mumuhumullulle mwa echilungamo wi muhaakhullellane ni nichimo naye.

¹⁸ Muhinahokollosella ddoonanara nave muhinaananariwella akhwiinyu koma mumukondeke mmodda wonanko mmo muniikondelleenyu nyookha. Mi tti Apwiya.

¹⁹ “Muthwareke malamulwaaka. Muhaakhullelleke wi eziweto ddanyu ddiwellaneke ni eziweto dda mutundu mmodda. Muhimidde mmiddo miilli m'matani mwanyu nave muhiware ddoowara ddoopangiwa ni ekuwo dda mitundu miilli.”

²⁰ “Muthu akona ni mutthiyana oyo ari kaporwaaye oyo atomeliwe ni muthu mmodda koma ahinoopolliwe yiipiwe mullatu koma ehiiphiwe kaambiiwa mutthiyanooyo khanoopolliwe.

²¹ Koma mullopwanooyo aweena nankhoro a enkhosa wi okhalle mukutho wa olliva vamiitthoni va Apwiya, va mullako wa musasa wamutthukumano.

²² Mullupa mukutho eere mutetho woopepesella machimo a muthooyo ni nankhoro a enkhosa ya mukutho woolliva vamiitthoni va Apwiya, ekaamba ya nichimo neeriwe ni muthooyo nave nichimo eerilleeyenno nineerokhululukelliwa.

²³ “Mwavollowa mwiillaponimmo ni waallamo miteekho ddoohiyanahiyana dda ezipaso, ezipasonnddo ddikhalle ddoohaakhullelliwa oddicha wa miyakha miraru. Muhinaddicha va enthawi yeella.

²⁴ Va muyakha waneesese, ezipaso ddittheddene ddineerokhalla ddoopatulelliwa wa Apwiya wonanko yoovelleella yoothokoza.

²⁵ Koma va muyakha waneetthanu, muneerewaakhullelliwa oddicha ezipaso ddiwa. Vano mweera ddenndda miteekho ddanyu ddineerekewimma wunchichi. Mi tti Apwiya Mullukwaanyu.

²⁶ “Muhiche enama eri ni nikhame, Muhoombeseke makhanga apaalle weera ddookhwiri.

²⁷ Muhiphaddereke mphattamaaru apaalle mukhwipi mwa ereru ddanyu.

²⁸ Muhiichekeke vamwiillini vanyu ekaamba ya muthu ookhwa apaalle opopha orive mutundu wa ehungu. Mi tti Apwiya.

²⁹ “Muhimuripihe mwaninyu aamutthiyana voomutthattusani mutthiyana ooraruwa wi ellapo ehitthattuwe ya athu ooraruwa ni oonanara wunchichi.

³⁰ Musunguke Nllapo naka Sabata ni oriiha nipuro naka naweella. Mi tti Apwiya.

³¹ “Muhinayaaka wa athu oollota ni minepa dda athu ookhwa apaalle wa amanyaka. Muhinawaashaashaka wi ehuuripiheni. Mi tti Apwiya Mullukwaanyu.

³² “Mukhalleke oolemu vamiitthoni va muthu awuulluvalla nave mumooveke Mullukwaanyu. Mi tti Apwiya.

³³ “Muhinamuhoosa mulleto oyo ari variyari vanyu.

³⁴ Mulleto oyo anakhalla variyari vanyu akhalle wonanko Muisraele nave mumukondeke wonanko mmo muniikondelleenyu. Vallethi mwaakhalla alleto mu ellapo ya Iguputo. Mi tti Apwiya Mullukwaanyu.

³⁵ “Muhoottheke voolingani orekama, ollemella apaalle waata wa ddeko.

³⁶ Milingo ddanyu ddittheddene ddikhalleke ddoolungama. Mi tti Apwiya Mullukwaanyu oyo uukhumihalleni mu ellapo ya Iguputo.

³⁷ Muthwareke malamulwaaka mattheene nave mwiiwellelleke moollikana ni mmo kuulamulelleemini. Mi tti Apwiya.”