Levitiko 18 - Mawu a Mulluku

Malamulo a okonana woohaakhullelliwa

¹ Apwiya yaallota ni Mose wi

² aalleelle Aisraele wi, “Mi tti Apwiya Mullukwaanyu.

³ Muhineeraka eneera athu a o Iguputo mwakhalleenyu wulle nave muhineeraka nnddo eneera athu a o Kanani nko kineereemi kuuphiyiheniwoni. Muhinattakihaka makhallellwiiwa.

⁴ Mweereke nnddo kinuulamuleemini, mwiiwellelleke nave muthwareke malamulwaaka. Mi tti Apwiya Mullukwaanyu.

⁵ Sika vano mweereke nnddo kinuulamuleemini. Mwiiwellelleke nave muthwareke malamulwaaka wi mukhalle ni okumi. Mi tti Apwiya.

⁶ “Arive muthu a nyuwaano ahikone ni mbalaaye. Mi tti Apwiya.

⁷ Ohaarulle attiittho vookonani ni amaayo. Yaayo tti amaayo ohaarulle.

⁸ Ohaarulle attiittho vookonani ni arive mwaariwa.

⁹ Ohikone ni murokoriyo, mwaana aamutthiyana aattiittho apaalle aamaayo naari ari ni attiitthinnya aayeene apaalle amennya aayeene.

¹⁰ Ohinakona ni muddullawo, mwaana a mwanawo aamullopwana apaalle aamutthiyana kaambiiwa wenko wiirulla.

¹¹ Ohinakona ni mwaana aamutthiyana a mwaariwa a attiittho oyo attiitthwaayo yamuyarilliiwa vawi yooyo tti murokoriyo.

¹² Ohinakona ni attiittho murokoriwa vawi yooyo tti mwiilli mmodda ni attiittho.

¹³ Ohikone ni amaayo mwanamunniwa vawi yooyo tti mwiilli mmodda ni amaayo.

¹⁴ Ohikone ni mwaara a attiittho mwanamunniwa vawi yaayo tti amaayo.

¹⁵ Ohikone ni mwaara a mwanawo vawi yooyo tti mvokohaawo.

¹⁶ Ohikone ni mwaara a mwanamunno kaambiiwa wenko tti omurulla mwanamunno.

¹⁷ Ohikone ni mutthiyana navettho mwaana a mutthiyanooyo nave ohikone ni mwaana aamutthiyana a mwanaye aamullopwana apaalle mwaana aamutthiyana a mwanaye aamutthiyana. Yaayo tti mwiillaawo nave wenko tti weera ello yoonanara wunchichi.

¹⁸ Nave ohimutthelle mwanamunne a mwaariyo ni omurulla mwaariyooyo ari mukumi.

¹⁹ “Ohikone ni mutthiyana ari omweerini vawi tti ooripihiwa.

²⁰ Ohinakonaka ni mwaara amwaneena ni wiiripihana.

²¹ Ohinamukusa arive mwanawo wi omuheraatthi mukutho wa mulluku Moleki woova wi anaaripihe nnddina na Mullukwaawo. Mi tti Apwiya.

²² Ohinakonaka ni mullopwana wonanko mmo oneerelleewe ni mutthiyana, yeella tti ello yoonanara wunchichi.

²³ Mullopwana apaalle mutthiyana ahikone ni erive enama wi ahiiripihena yeeyo, tti ello yoonanara wunchichi.”

²⁴ “Muhiiripihe ni ddeko ddenndda kaambiiwa mitundu ddimodda dda athu nnddo kinaddiikariheemi nyuwaano mwaaphiyaka, ddahiiripiha ni ddenndda.

²⁵ Ddenndda ddaaripiha ellapo sika wi kaallaka nichimo niwa nave ellapweeyo yahaarapheya athu ookhalla mwemmo.

²⁶ Koma nyuwaano muthware malamulwaaka ni weera nnddo kuulamulalleemini. Muhineera erive ello mwa ddooripihiwa ddenndda naari muri nyu Aisraele apaalle mulleto ookhalla variyari vanyu.

²⁷ Vallethi athu ayo yaari mwiillaponimmo nyuwaano muhinaphiye, yaaneera ddooripihiwa ddenndda nave ellapo yaaripihiwa.

²⁸ Muheere ddenndda wi ellapo ehuurapheyeni mwayiripiha wonanko mmo yaarapheyelliiwa athu ayo yaari mwemmo nyuwaano muhinaphiye.

²⁹ Vawi arive muthu anaaweere ddooripihiwa ddenndda aneerovenyihiwa variyari va Aisraele akhwaaye.

³⁰ Vano iwellani malamulwaaka oovaanyiha ottakiha ddooripihiwa nnddo athu yaddeeriiwa nyuwaano muhinaphiye nave muhiiripihena naari vang'ono. Mi tti Apwiya Mullukwaanyu.”