Levitiko 17 - Mawu a Mulluku

Opatuleya wa nikhame

¹ Apwiya yaallota ni Mose wi

² amulleelle Aroni ni anaaye ni Aisraele attheene wi Apwiya ahaalamula wi,

³ “Arive Muisraele iipha eng'ombe apaalle mwaanaankhosa apaalle epuri, omisasani apaalle otte wa misasa,

⁴ koma woohiwaana va mullako musasa wamutthukumano wi ekhalle yoovelleella wa Apwiya, muthooyo oottatthamulla mullatu wa nikhame kaambiiwa oomoriha nikhame. Muthu yooyo avenyihiwe variyari va Aisraele.

⁵ Sika wi Aisraele ekuseke enama nnddo yaddiiphelliiwa virive veko, eweena vamiitthoni va Apwiya wa mullupa mukutho vamiitthoni va musasa wamutthukumano nave ayiiphelle vaavo wi okhalle mukutho wa eyaattano.

⁶ Nave mullupa mukutho iithelle nikhame niwa vanikuwani na Apwiya, va mullako wa musasa wamutthukumano, vatulli viwa ashellellihe, makhuriiwa wi ekhumihe nthuko nawaaddivella Apwiya.

⁷ Sika mikutho ddiwa ehiddiivelleellelle milluku ddeepuri nnddo enaddoonihelliiwana ohiroromelleya wa Apwiya. Nenno nikhalle lamulo wa enthawi yoohimalla wa mibado ddittheddene.”

⁸ Waalleelle wi, “Arive Muisraele apaalle mulleto oyo ari variyari viwa, oovelleella mukutho wooshellelliha apaalle orive mukutho,

⁹ aahiwaana va mullako wa musasa wamutthukumano ayivelleelle vamiitthoni va Apwiya, muthu yooyo avenyihiwe variyari va Aisraele attheene.

¹⁰ “Arive Muisraele apaalle mulleto oyo ari variyari viwa acha nikhame, kineeromureya etulli nave muthu yooyo kineeromuvenyiha variyari va Aisraele.

¹¹ Vawi okumi wa erive yoophatusiwa okonne munikhameni nave koonivelleella wa nyuwaano wi mweerelleke mukutho wa mutetho woopepesella machimo a okumaanyu vanikuwani. Vallethi nikhame sika ninavenyiha machimo ekaamba ya okumi oyo ori munikhamenimmo.

¹² Sika ekaambiiwa kaalleelleemi Aisraele wi arive muthu mwa nyuwaano apaalle mulleto ookhalla variyari vanyu, ahiche nikhame.

¹³ Nave Aisraele attheene apaalle mulleto ookhalla variyari vanyu oyo aniipha enama apaalle epallame nnddo yaakhullelliwiiwa oddicha, etathille nikhame niwa nave enivuhellelle ni ethaya.

¹⁴ “Vallethi okumi wa erive yoophatusiwa okonne munikhameni mwiwa. Sika ekaambiiwa kaalleelleemi Aisraele wi ehicheke nikhame na erive yoophatusiwa vawi arive muthu anaaniche aneerovenyihiwa variyari va Aisraele

¹⁵ Arive muthu oocha ello yookhwa weekhiiwa apaalle yoottakhuniwa ni enama yawoopiha yamuhakani naari ari Muisraele apaalle mulleto, achape ddoowara ddaye nave ahape koma akhalleve ooripihiwa ophiyera misikuwa nave vatulli viwa eneerokhalla aweellihiwa.

¹⁶ Koma aahichapa ddoowara ddaye nave aahihapa aneerophwanella ollakiwa.”