Levitiko 15 - Mawu a Mulluku

Ddeko ddooripihiwa ddookhuma m'mwiillini

¹ Apwiya yaallota ni Mose ni Aroni wi

² yaalleelle Aisraele wi, “Arive mullopwana akhalla ni ereta yookhumiha marohi mukhoveni, ddennddo tti ddooripihiwa.

³ Lamulo niwa na wiiripiha ni ddooripihiwa ddookhuma mukhoveni mwa mullopwana tti nawi, mukhovenimmo mwaakhumakave marohi, khaya eneerohiya komave mullopwanooyo tti ooripihiwa.

⁴ Arive bedi mvo mullopwanooyo anaakonaattheeyevo, aneerokhalla ooripihiwa nave erive ello anaakeraatthelleeye eneerokhalla yooripihiwa.

⁵ Arive muthu anaamuttannye bedaayooyo achape ddoowara ddaye nave ahape koma aneerokhalla ooripihiwa ophiyera misikuwa.

⁶ Arive muthu anaakeraatthi va erive ello eyo mullopwanooyo akeraatthelleeye, achape ddoowara ddaye nave ahape koma aneerokhalla ooripihiwa ophiyera misikuwa.

⁷ Arive muthu oottannya mwiilli wa mullopwanooyo, achape ddoowara ddaye nave ahape koma aneerokhalla ooripihiwa ophiyera misikuwa.

⁸ Mullopwanooyo amuttaphera mukhwaaye oyo ari aweella, mukhwaayooyo achape ddoowara ddaye nave ahape mwiillaaye koma aneerokhalla ooripihiwa ophiyera misikuwa

⁹ Nave yookeraatthella ya vakavaloni, eyo mullopwanooyo akeraatthelleeye, eneerokhalla yooripihiwa.

¹⁰ Arive muthu oyo anaattannye erive ello eyo mullopwanooyo akeraatthelleeye, aneerokhalla ooripihiwa ophiyera misikuwa nave arive muthu oyo anaatukhulle ello yeeyo, achape ddoowara ddaye nave ahape koma aneerokhalla ooripihiwa ophiyera misikuwa

¹¹ Arive muthu oyo mullopwanooyo anaamuttanyeeye ahinanawe, achape ddoowara ddaye nave ahape koma aneerokhalla ooripihiwa ophiyera misikuwa.

¹² Erive echipangizo yeethaya eyo muthu mullopwanooyo anaayittannyeeye, epwesiwe nave erive echipangizo yamuteekho eyihuwe.

¹³ “Muthu ookhumiha marohooyo oona wi oochirihiwa, eerenge mallapo matthanu ni meelli a weellihiwa nave achape ddoowara ddaye, ahape vaneetuutuni nave aneerokhalla aweellihiwa.

¹⁴ Va nllapo naneetthanu ni raru akuse apaalle mawunda meelli apaalle manddiya meelli nave aweena vamiitthoni va Apwiya va mullako wa musasa wamutthukumano, addivelleelle wa mullupa mukutho.

¹⁵ Mullupa mukutho aheraatthi ddennddo, nimodda nikhalle mukutho woopepesella machimo, nimoddanno nikhalle mukutho wooshellelliha. Vaavo mullupa mukuthooyo oheera mutetho woomweellihella mullopwanooyo vamiitthoni va Apwiya.

¹⁶ “Mullopwana atathillella vatthi ellopwanaaye, achape ddoowara ddaye nave ahape koma aneerokhalla ooripihiwa ophiyera misikuwa.

¹⁷ Erive ello ya ekuwo apaalle ya nttapara vamorella ellopwana eyihuwe koma ddineerokhallave ddooripihiwa ophiyera misikuwa.

¹⁸ Mullopwana atathilla ellopwanaaye vookonani ni mutthiyana, eelliinaayo ehape koma eneerokhalla ooripihiwa ophiyera misikuwa.

¹⁹ “Mutthiyana oona mweeri, aneerokhalla ooripihiwa wa mallapo matthanu ni meelli nave oyo anaamuttannye aneerokhalla ooripihiwa ophiyera misikuwa.

²⁰ Nave erive ello mutthiyanooyo anaakonaatthelleeye olliyooyo ari ooripihiwa, eneerokhalla yooripihiwa. Nave erive ello eyo anaakeraatthelleeye eneerokhalla yooripihiwa.

²¹ Arive muthu oyo anaamuttannye bedaayooyo achape ddoowara ddaye nave ahape koma aneerokhalla ooripihiwa ophiyera misikuwa.

²² Arive muthu oyo anaattannye mvo anakeraattheeye, achape ddoowara ddaye nave ahape koma aneerokhalla ooripihiwa ophiyera misikuwa.

²³ Khaya ellweeyo tti bedi apaalle erive ello eyo mutthiyanooyo anaakeraatthelleeye, muthu ayittannya, aneerokhalla ooripihiwa ophiyera misikuwa.

²⁴ Mullopwana akona ni mutthiyana oyo ari omweerini, mullopwanooyo aneerokhalla ooripihiwa wa mallapo matthanu ni meelli. Nave arive bedi oyo mullopwanooyo anaamukonelleeye aneerokhalla ooripihiwa.

²⁵ “Mutthiyana aatathillaka nikhame enthawi yoorekama koma ahoonille mweeri apaalle oona mweeri okhwaranya mallapwaaye awoona mweeri, mallapo yaayo olliyooyo aneerokhalla ooripihiwa, wonanko mmo anakhallelleeye mallapwaaye awoona mweeri.

²⁶ Arive bedi oyo mutthiyanooyo anaamukonelleeye enthawi eyo anatathilleeye nikhame, aneerokhalla ooripihiwa. Nave ddittheddene anaakeraatthelleeye ddineerokhalla ddooripihiwa, wonanko mmo ddinakhallelliiwa ddooripihiwa olliyooyo aawoonaka mweeri.

²⁷ Arive muthu anaaddittannye ddennddo aneerokhalla ooripihiwa ophiyera misikuwa. Vano achape ddoowara ddaye nave ahape koma aneerokhalla ooripihiwa ophiyera misikuwa.

²⁸ Ahiya otathilla nikhame wayenko, mutthiyanooyo eerenge mallapo matthanu ni meelli nave vatulli viwa aneerokhalla aweellihiwa.

²⁹ Va nllapo naneetthanu ni raru, akuse mawunda meelli apaalle manddiya meelli nave aweena wa mullupa mukutho, va mullako wa musasa wamutthukumano.

³⁰ Mullupa mukutho aheraatthi nimodda wi nikhalle mukutho woopepesella machimo, nimoddanno nikhalle mukutho wooshellelliha. Vaavo mullupa mukuthooyo oheera mutetho woomweellihella mutthiyanooyo vamiitthoni va Apwiya.

³¹ “Sika mwaachenjeze Aisraele dda oripihiwa wiwa wi ehikhwe ekaamba yaweera machimo ooripiha musasaaka oyo ori variyari vanyu.”

³² Nenno tti lamulo noollota dda mullopwana oyo anakhumiha marohi mukhoveni mwaye, oyo anatathilla ellopwanaaye eyo enamutthattusa ooripihiwa,

³³ mutthiyana oyo anoona mweeri. Lamulonna tti na arive muthu, mullopwana apaalle mutthiyana oyo anakhuma ddeko ddooripihiwa ddookhuma m'mwiillini mwaye navettho mullopwana oyo anakona ni mutthiyana ooripihiwa.