Levitiko 14 - Mawu a Mulluku

Weellihiwa wa muthu amakate

¹ Apwiya yaallota ni Mose wi,

² “Lamulo na muthu amakate va nllapo naweellihiwa waye tti nawi eyeena wa mullupa mukutho.

³ Vano mullupa mukuthooyo akhume otte wa misasa nave amuwehesese oovoriiwooyo. Muthu akhatooyo ooneya wi oochira,

⁴ mullupa mukutho aalamule athu wi emukuselle muthu oyo anaaka eellihiwooyo, epallame piilli nnddo Ayuda yaakhullelliwiiwa ocha, enthambi ya mukunguza, ekuwo yoofiira ni enthambi ya muteekho wa hisope.*

⁵ Mullupa mukuthooyo alamule wi epallame emodda yiiphelliwe vaddullu va embale yathaya mmo muri maaddi oovenyera mu maaddi aweeta.

⁶ Mullupa mukutho akuse epallame ekumeelle ni enthambi ya mukunguzoolle, ekuwo yoofiireelle owaaka enthambi ya hisopeelle. Ddittheddenennddo addiruweye munikhameni na epallame yiiphelliwe vaddullu va embale ya maaddi oovenyera mu maaddi aweeta.

⁷ Vano mullupa mukutho amidde otthanu ni opiilli va muthu oyo anaaka eellihiwe makataayo. Amweera oovoriiwooyo wi oheellihiwa, ayihiye epallame evaveke.

⁸ Oovoriiwa anaaka eellihiwooyo achape ddoowara ddaye, acheme meehaaye mattheene nave ahape, vano eeddiiddo aneerokhalla aweellihiwa. Amalliha ddittheddennddo, avollowe omisasani koma akhalle otte wa musasaaye mallapo matthanu ni meelli.

⁹ Va nllapo nookomihera, acheme meehaaye mattheene omuruni waye. Achemettho ereru ni ekwikwi ddene ni meehaaye mattheene. Vatulli viwa achape ddoowara ddaye nave ahape sika eeddiiddo aneerokhalla aweellihiwa.

¹⁰ “Va nllapo naneetthanu ni raru, muthooyo aakuse anamwani a nankhoro a enkhosa eelli oohirakalla, mwaanaankhosa aamutthiyana mmodda oohirakalla amuyakha mmodda, yoovelleella ya othu waphaama woollemella makilogaramu mararu woottakanyihera ni makhura navettho makhura ookwakhwana nimodda mwa magawo mararu a nilita.

¹¹ Mullupa mukuthooyo amwiimese muthooyo ari ni ddoovelleella ddaye ddittheddene vamiitthoni va Apwiya, va mullako wa musasa wamutthukumano.

¹² Mullupa mukutho amukuse mmodda a anankhoro anamwani ankhosa ni omuvelleella wi okhalle mukutho woolliva nimakhuraalle. Additukhullelle muddullu wi ddikhalle ddoovelleella ddootukhullella muddullu vamiitthoni va Apwiya.

¹³ Mwaanaankhosooyo amwiiphelle vanipuroni noopatuleya, vanipuroni mvo eniiphelliiwa enama dda mukutho woopepesella machimo ni mukutho wooshellelliha vawi mukutho woolliva tti waaye wa mullupa mukutho wonanko mmo enakhallella yoovelleella yoopepesella machimo. Ddoovelleellannddo tti ddaweella wunchichi.

¹⁴ Mullupa mukutho akuse nimodda mwa nikhame na enama ya yoovelleelliwa mukutho woolliva ni onimara otthoka wa naaru noonnattanatta na muthu oyo aneellihiwooyo. Amarettho va eyaalla yuullupalli nnatta noonnattanatta navettho eyaalla yuullupalli ya nnyallo noonnattanatta.

¹⁵ Mullupa mukutho arike makhura vang'ono, ahelle onnattani nawuunyotthoni naye.

¹⁶ Nave aruweye eyaallaaye ya m'mattani yoonnattanatta m'makhurani ayo eri munnattani naye nawuunyotthoni. Nave amidde makhuraayo ni eyaallaaye otthanu ni opiilli vamiitthoni va Apwiya.

¹⁷ Makhura oohalla m'mattani mwa mullupa mukuthooyo yaamare otthoka wa naaru noonnattanatta na muthu aneellihiwooyo navettho va eyaallaaye yuullupalli ya nnatta noonnattanatta naye. Amarettho va eyaallaaye yuullupalli ya nnyallo noonnattanatta, mvo amanreeyevo nikhame na enama yoovelleellella mukutho woolliva.

¹⁸ Makhura oohalla m'mattani mwa mullupa mukutho, aahelle va muru va muthu aneellihiwooyo. Mmu sika mullupa mukutho anaamweerellekeeye muthooyo va mutetho woomupepesella machimo vamiitthoni va Apwiya.

¹⁹ Vatulli viwa mullupa mukutho avelleelle mukutho woopepesella machimo wi eere mutetho woomupepesella machimo muthu wi eellihiwe makataayaalle. Vano mullupa mukutho iiphe enama yoovelleellella mukutho wooshellelliha.

²⁰ Nave ayiheraatthi vanikuwani ni mukutho wa othu. Eeddiiddo sika wi oheera mutetho woomupepesella machimo oovoriiwooyo sika vano muthooyo anaakhalle aweellihiwa.

²¹ Koma muthu oovoriiwooyo akhalla oohoowa, aahikhallana ddittheddenennddo, amuvelleelle nankhoro a mwaanaankhosa ayivelleelle mootukhullella muddullu wi okhalle mukutho woolliva wa mutetho woomupepesella machimo. Avelleellettho nikilogaramu nimodda na othu waphaama woottakanyihera ni makhura wi okhalle mukutho wa othu ni makhura ookwakhwana echigawo emodda ya magawo mararu a lita.

²² Avelleellettho mawunda meelli apaalle manddiya meelli moollikana ni opata waye. Nimodda nikhalle na mukutho woopepesella machimo, nimoddanno nikhalle na mukutho wooshellelliha.

²³ Va nllapo waneetthanu ni raru aweena ddittheddenennddo wa mullupa mukutho, va mullako wa musasa wamutthukumano vamiitthoni va Apwiya wi muthooyo eellihiwe.

²⁴ Mullupa mukutho amukuse mwaanaankhosa oovelleella mukutho woolliva ni makhuraalla nave additukhullelle muddullu wi ekhalle yoovelleella yootukhullella muddullu vamiitthoni va Apwiya.

²⁵ Vano ayiiphe enkhosa yoovelleellella mukutho woolliva. Mullupa mukutho akuse nimodda mwa nikhame na enama ya yoovelleelliwa mukutho woolliva ni onimara otthoka wa naaru noonnattanatta na muthu oyo aneellihiwooyo. Amarettho va eyaalla yuullupalli ya nnatta noonnattanatta navettho eyaalla yuullupalli ya nnyallo noonnattanatta.

²⁶ Mullupa mukutho arike makhura vang'ono, ahelle onnattani nawuunyotthoni naye,

²⁷ Nave aruweye eyaallaaye ya m'mattani yoonnattanatta m'makhurani ayo eri munnattani naye nawuunyotthoni. Nave amidde makhuraayo ni eyaallaaye otthanu ni opiilli vamiitthoni va Apwiya.

²⁸ Makhura oohalla m'mattani mwa mullupa mukuthooyo yaamare otthoka wa naaru noonnattanatta na muthu aneellihiwooyo navettho va eyaallaaye yuullupalli ya nnatta noonnattanatta naye. Amarettho va eyaallaaye yuullupalli ya nnyallo noonnattanatta, mvo amanreeyevo nikhame na enama yoovelleellella mukutho woolliva.

²⁹ Makhura oohalla m'mattani mwa mullupa mukutho, aahelle va muru va muthu aneellihiwooyo. Mmu sika mullupa mukutho anaamweerellekeeye muthooyo va mutetho woomupepesella machimo vamiitthoni va Apwiya.

³⁰ Vano moollikana ni opata waye, avelleelle mawunda meelli apaalle manddiya meelli.

³¹ Avelleelle meellaayo wi nimodda nikhalle mukutho woopepesella machimo nave nimoddanno nikhalle mukutho wooshellelliha ni yoovelleella ya othu. Eeddiiddo sika wi oheera mutetho woomupepesella machimo muthu aneellihiwooyo vamiitthoni va Apwiya.

³² Nenno tti lamulo na muthu amakate oyo ahinna ddeko ddittheddene ddoovelleella va weellihiwa waye.”

Enguwi dda mpa

³³ Apwiya yaallota ni Mose ni Aroni wi,

³⁴ “Mwavollowa mu ellapo ya Kanani eyo kinuuvaheemini wi ekhalle yaanyu nave keeriha enyumba wi ekhalle ni enguwi mu ellapwaanyweeyo,

³⁵ mwaneena a enyumbeeyo aye wa mullupa mukutho amulleelle wi, ‘Mpa mwaka mookhalla ello wonanko enguwi.’

³⁶ Vano mullupa mukutho ahinawehesese enguweeyo, alamule wi athu ekhumihe ddeko ddittheddene woova wi ddeko ddampannddo ddinaaripihiwe. Vatulli viwa mullupa mukutho avollowe mpammo wi awehesesemo.

³⁷ Nave awehesese enguweeyo. Aphwanya wi eri musirini mwa enyumba, enooneya mwa girini apaalle moofiira nave yooneya wi yoophiya muwari,

³⁸ mullupa mukuthooyo akhume mpammo nave awallemo wa mallapo matthanu ni meelli.

³⁹ Va nllapo naneetthanu ni piilli mullupa mukuthooyo awettho wi awehesese. Enguweeyo yamwareyella musirini mwa enyumbeeyo,

⁴⁰ mullupa mukuthooyo alamule wi ekumulle malluku eri ni enguwaayo nave yaatathille oddallani otte wa muzinda.

⁴¹ Vatulli viwa mullupa mukutho aalleelle wi ewake esiri ettheene muwari mwa enyumbeeyo nave ethaya enaayiwakiiweeyo yatathillelle oddallani otte wa muzinda.

⁴² Vano athwaayo ekuse malluku mamodda ni oyimakella mmo ekumullalliiwa mallukwaalle nave ekusettho ethaya emodda asiringenna enyumbeeyo.

⁴³ “Enguwinnddo ddamellattho mpammo ekumullallemo khalle mallukwaalle nave eyiwakille navettho eyisiringalle,

⁴⁴ mullupa mukutho aye ayiwehesese. Yakhalla wi yoomwareyellattho mpammo sika wi tti enguwi yawoopiha nave enyumbeeyo tti yooripihiwa.

⁴⁵ Eyikumulle enyumbeeyo nave mallukwiiwa, miteekho ddiwa ni ethaya eyo yasirengelliiwa enyumbeeyo, ddittheddene yadditatthille oddallani otte wa muzinda.

⁴⁶ Nave muthu oyo anaavollowe mpammo ewalliwe ddiiddo aneerokhalla ooripihiwa ophiyera misikuwa.

⁴⁷ Muthu oyo akonille mpammo achape ddoowara ddaye nave oyo achelle mpammo achapettho ddoowara ddaye.

⁴⁸ “Mullupa mukutho awa awehesesa mpammo nave aphwanya wi enguweeyo khemwareyellemo enyumbeeyo eyisiringalle, mullupa mukutho ayeere enyumbeeyo yaweella vawi enguweeyo kheyaamo.

⁴⁹ Mwaneena a enyumbeeyo akuse epallame piilli, enthambi dda muteekho wa mukunguza, ekuwo yoofiira ni enthambi ya muteekho wa hisope* wi ddikhalle ddaweellihella enyumbeeyo.

⁵⁰ Mullupa mukutho ayiiphelle emodda mwa epallame piillinnddo vaddullu va embale yathaya mmo muri maaddi oovenyera mu maaddi aweeta

⁵¹ Mullupa mukutho akuse epallame ekumeelle ni enthambi ya mukunguzoolle, ekuwo yoofiireelle owaaka enthambi ya hisopeelle. Ddittheddenennddo addiruweye munikhameni na epallame yiiphelliwe vaddullu va embale ya maaddi oovenyera mu maaddi aweeta nave amidde enyumbeeyo otthanu ni wiilli.

⁵² Eeddiiddo sika mullupa mukuthooyo oheelliha enyumbeeyo ni nikhame na epallame, maaddi oovenyera mu maaddi aweeta, epallame ekumi, enthambi ya mukunguza, enthambi ya hisope navettho ekuwo yoofiira.

⁵³ Epallame ekumeeyo ayihiye evaveke otte wa muzindooyo. Vaavo sika wi mullupa mukutho oheera mutetho woopepesella enyumbeeyo nave enaakhalle yaweellihiwa.

⁵⁴ Nenna tti lamulo na ereta ya vamwiillini ni ya ekakha,

⁵⁵ enguwi ya ekuwo nave ya va enyumba,

⁵⁶ makate a yawiipa, makate waavuwa ni makate a etthuku.

⁵⁷ Malamulo yaalla tti oollota dda oripihiwa ni ohiripihiwa. Ethwariwe va ereta ddittheddene dda makate.”