Levitiko 12 - Mawu a Mulluku

Weellihiwa wa mutthiyana amuyara mwaana

¹ Apwiya yaallota ni Mose wi

² alleelle Aisraele wi, “Mutthiyana akhalla ni erukullu, amuyara mwaana aamullopwana, aneerokhalla ooripihiwa mallapo matthanu ni meelli, wonanko va enthawi yawoona mweeri.

³ Vaavo mullupa mukuthooyo oheera mutetho woomweellihella mullopwanooyo vamiitthoni va Apwiya. Nave va nllapo naneetthanu ni raru mwaanooyo aphaddiwe.

⁴ Mutthiyanooyo atiyere wa mallapo mamodda 33 wi eellihiwe o oripihiwa waye. Ahinattannya erive ello aweella nave ahiye onipuroni naweella ophiyera mallapo aweellihiwa emanlle.

⁵ Koma amuyara mwaana aamutthiyana, aneerokhalla ooripihiwa wonanko va enthawi yawoona mweeri koma wa mallapo khumi ni masese. Nave mutthiyanooyo atiyere wa mallapo mamodda 66 wi eellihiwe o oripihiwa waye.

⁶ “Vano mallapo a oddeelliha waye emanlle, a mwaana aamullopwana apaalle aamutthiyana, aye wa mullupa mukutho ni mwaanaankhosa a muyakha mmodda va mullako wa musasa wamutthukumano wi enkhoseeyo ekhalle mukutho wooshellelliha. Ayeewottho ni niwunda apaalle nnddiya wi okhalle mukutho woopepesella machimo.

⁷ Mullupa mukuthooyo aheraatthi ddennddo vamiitthoni va Apwiya moollikana ni mutetho woomweellihella mutthiyanooyo. Vaavo mutthiyanooyo aneerokhalla aweellihiwa o oripihiwa waye. Nenna tti lamulo na mutthiyana oomuyara mwaana aamullopwana apaalle aamutthiyana.

⁸ Koma aahikhallana mwaanaankhosa, akuse ekhunda piilli apaalle mawunda a ekhunda meelli. Nimodda nikhalle mukutho woopepesella machimo nave nimodda nikhalle mukutho wooshellelliha. Mullupa mukuthooyo aheraatthi ddennddo vamiitthoni va Apwiya moollikana ni mutetho woomweellihella mutthiyanooyo. Nave mutthiyanooyo aneerokhalla aweella.”