Levitiko 11 - Mawu a Mulluku

Enama ni epallame ddaweellihiwa ni ddooripihiwa

¹ Apwiya yaallota ni Mose ni Aroni wi

² yallote ni Aisraele wi, “Enama munaakhullelliweenyu oddicha variyari va enama ddittheddene dda va ellapo yavatthi tti nndda.

³ Enama ddittheddene ddookhalla ni akokotokwa ookawaneya nave ddoojikulla sika munnaakhullelliweenyu oddicha.

^4-6 Koma ddimodda mwa enama variyari va enama ddoojikulla apaalle dda enama dda manyallo ookawaneyannddo, muhiddicheke ekamira,* epilla ni wallullu. Ddenndda tti ddooripihiwa wa nyuwaano kaambiiwa naari ddijikullaka manyallwiiwa tti oohikawaneya.

⁷ Nave ekumba tti yooripihiwa wa nyuwaano kaambiiwa naari manyallwiiwa eri ookawaneya khenajikulla.

⁸ Enama ddenndda muhiddicheke nave ddakhwa muhiddittannye. Ddenndda tti ddooripihiwa wa nyuwaano.”

⁹ Ddookumi ddookhalla m'maaddini munaakhullelliweenyu oddicha tti ddittheddene ddookhalla ni miiwa ddoosambilella owaaka makarumbasa.

¹⁰ Koma ddittheddene ddookhalla m'maaddini dduullupalli apaalle dding'onong'ono ddoohikhalla ni miiwa ddoosambilella owaaka makarumbasa, tti ddooripihiwa wa nyuwaano.

¹¹ Ddennddo tti ddooripihiwa wa nyuwaano nave muhiddicheke. Ddakhwa ddikhalleve ddooripihiwa wa nyuwaano.

¹² Ddittheddene ddookhalla m'maaddini ddoohikhalla ni miiwa ddoosambilella ni makarumbasa tti ddooripihiwa wa nyuwaano.

¹³ “Nave epallame munaaddeesekeenyu ddooripihiwa, ddawi muhiddicheke vawi tti ddooripihiwa wa nyuwaano tti mpungu, ephangwi, nakhuku,

¹⁴ neekhwaambe, orive mutundu wa kuukuru,

¹⁵ orive mutundu wa anakhuku,

¹⁶ enthiwatiwa, eddiiddi, akakowa, orive mutundu wa neekhwaambe,

¹⁷ maarwe, echiswankhono, namame,

¹⁸ sekhwe, kuukuru amanyaka, ephangwi dda mutundu mung'onong'ono,

¹⁹ nasekwa, makokoko ni amullema.

²⁰ Ddoovava ddittheddene nnddo ddihiri epallame nave nnddo ddiri ni meto misese tti ddooripihiwa wa nyuwaano.

²¹ Koma variyari va ddoovava dda meto misese, munaakhullelliwa oddicha ddennddove ddiri ni minyonga.

²² Va ddennddo muchekevo orive mutundu wa nazombe, asankha a mitundu ddittheddene, asondollo a mitundu ddittheddene ni middope dda mitundu ddittheddene.

²³ Koma va ddoovava ddimodda ddittheddene dda meto misese tti ddooripihiwa wa nyuwaano.

²⁴ “Vano arive muthu ooddittannya aneeroripihiwa nave arive muthu ooddittannya ddikhwille akhalleke ooripihiwa ophiyera misikuwa.

²⁵ Arive muthu atukhulla erive echiwalo ya enama ddookhwannddo, achape ddoowara ddaye komave aneerokhalla ooripihiwa ophiyera misikuwa.

²⁶ Erive enama yookhalla ni manyallo koma oohikawaneya apaallettho yoohijikulla, yeeyo tti yooripihiwa wa nyuwaano nave arive muthu ooyittannya ekhwille aneerokhalla ooripihiwa.

²⁷ Variyari va enama dda meto misese, enama ddookhalla ni eyaalla omanyalloni, tti ddooripihiwa wa nyuwaano nave arive muthu ooddittannya ddikhwille akhalla ooripihiwa ophiyera misikuwa.

²⁸ Nave muthu anatukhulla enamanndda ddikhwille, achapeke ddoowara ddaye komave aneerokhalla ooripihiwa ophiyera misikuwa. Ddenndda tti ddooripihiwa wa nyuwaano.

²⁹ Vano ddawaapadda ddittheddene ddiri ddooripihiwa wa nyuwaano tti nikoongwe, muthoro, orive mutundu wa mung'azi,

³⁰ nikootwa, ephenembe, neemara, neekwangwa ni neetiyambe.

³¹ Ddenndda tti ddooripihiwa wa nyuwaano variyari va ddawaapadda ddittheddene. Arive muthu ooddittannya ddenndda ddikhwille aneerokhalla ooripihiwa ophiyera misikuwa.

³² Nave enama ddenndda ddakhwa nave ddamorella va erive ello, ellweeyo eneerokhalla yooripihiwa, khaya tti yamuteekho, yeekuwo, yanttapara, yeechiguduli apaalle erive echipangizo yoopharihella orive mutteko. Ellweeyo eyiruweye m'maaddini koma eneerokhallave yooripihiwa ophiyera misikuwa. Vatulli viwa eneerokhalla yaweellihiwa.

³³ Vano erive enama ya ddenndda yamorella mwiipallini, ddittheddene ddiri mwemonnddo ddineerokhalla ddooripihiwa nave epalleeyo muyipwese.

³⁴ Maaddi a mwiipallinimmo yiithelleya va erive yoocha yawaakhullelliwa, yoocheeyo eneerokhalla yooripihiwa. Erive yoowirya yawaakhullelliwa yamwiipallini mwemmo eneerokhalla yooripihiwa.

³⁵ Erive echiwalo ya enama yookhwa yamorella va erive ello, ellweeyo eneerokhalla yooripihiwa, khaya tti ufuni apaalle embawula, ddittheddenennddo muddipwese vawi tti ddooripihiwa nave ddineerokhalla ddooripihiwa wa nyuwaano.

³⁶ Koma enama yookhweeyo yamorella va neetuutu apaalle ehime ddineerokhalla ddaweellihiwa koma erive ello yoottannya enama yookhweeyo eneerokhalla yooripihiwa.

³⁷ Erive echiwalo ya enama ddookhwannddo yamorella va mmiddo oyo athu enaakiiwa yaalle, mmiddooyo oneerokhallave waweella.

³⁸ Koma mmiddooyo wakhalla wawoollowa ni maaddi nave erive echiwalo ya enama yookhwa yamorella va mmiddooyo, oneerokhalla wooripihiwa wa nyuwaano.

³⁹ “Muthu attannya enama yookhwa, eyo eri yawaakhullelliwa ocha, muthooyo aneerokhalla ooripihiwa ophiyera misikuwa.

⁴⁰ Nave muthu acha enameeyo achape ddoowara ddaye koma akhalle ooripihiwave ophiyera misikuwa. Nayeenettho oyo anaatukhulle enama yookhweeyo achape ddoowara ddaye koma aneerokhalla ooripihiwa ophiyera misikuwa.

⁴¹ “Erive ello yawaapadda, muhiyicheke.

⁴² Erive ello yawaapadda ni emirima navettho erive ello ya meto misese apaalle ya meto ddinchichi, muhiyicheke vawi tti yooripihiwa wa nyuwaano.

⁴³ Muhiiripihe ni erive yawaapadda, muhiiripihena.

⁴⁴ Mi tti Apwiya Mullukwaanyu. Vano muddeellihe nave mukhalle aweella vawi mi tti aweella. Muhiiripihe ni erive ello yawaapadda.

⁴⁵ Vawi mi tti Apwiya oyo yuukhumihalleni mu ellapo ya Iguputo wi kikhalle Mullukwaanyu. Vano mukhalle aweella vawi mi tti aweella.”

⁴⁶ Nenno tti lamulo noollota dda enama, epallame, erive yookhalla m'maaddini ni erive ello yawaapadda,

⁴⁷ wi muhiyaniheke ddeko ddooripihiwa ni ddaweellihiwa navettho va ddookumi munaakhullelliweenyu oddicha ni nnddo muhinaakhullelliweenyu oddicha.