Levitiko 10 - Mawu a Mulluku

Chimo na Nadabu ni Abihu

¹ Anamwani eelli a Aroni, Nadabu ni Abihu yaakusa yoothuwihella mwiisi wa lubani* ehellamo mankhalla amunllo. Vamankhallanimvo yaahellavo lubani nave yaavelleella wa Apwiya munllo woohaakhullelliwa oyo yahilamuliwiiwa.

² Sika Apwiya yaakhariha munllo waashellelliha nave attheene yaakhwa vamiitthoni va Apwiya.

³ Vano Mose aamulleella Aroni, “Vallethi Apwiya yaallota wi, ‘Kineerewooniha weella waka wa attheene ayo eri vakhuviru ni miyaano nave kineerotitimihiwa vamiitthoni va athu attheene’ ” Koma Aroni khaawaakhullalle.

⁴ Mose aawiithana Mishaele ni Elizafani, anamwani a Uziyele, attiitthinnya ang'onong'ono a Aroni, aalleella wi, “Susellani vakhuviru, avenyihenivoni abalaanywaalla va nthato na musasa wamutthukumano nave mwaakhumihelle otte wa misasa.”

⁵ Sika yaasusera vakhuviru, yaatukhulla ookhwaayo eri m'mikanjoni mwiwa yaakhumihella otte wa misasa moollikana ni mmo Mose aalleellelleeye.

⁶ Vano Mose aamulleella Aroni ni anaaye Eleazara ni Itamara wi, “Muhinakhalla oohipesa apaalle waahulla ddoowara ddanyu wooniha ethakaraka, woova wi munaakhwe navettho wooviha wi Apwiya eneerewaashella murima athu attheene. Koma Aisraele akhwiinyu sika enawinlle ekaamba ya munllo oyo Apwiya yaashellellihalliiwana Nadabu ni Abihu

⁷ Va enthawi yeella Muhinavenyavo va nthato na musasa wamutthukumano, woova wi munaakhwe vawi mwaazoziwa ni makhura a Apwiya.” Alliwa yaheera moollikana ni mmo Mose allotelleeye.

Malamulo a dda allupa mukutho

⁸ Vano Apwiya yaallota ni Aroni wi,

⁹ “Muhinamuwiryaka vinyo apaalle yoowirya yoowalli, weyaano ni edduullu ddawo, mwaayaaka o musasa wamutthukumanoolla woova wi munaakhwe. Nenna nikhalle lamulo wa enthawi yoohimalla wa mibado ddanyu ddittheddene.

¹⁰ Muhiyaniheke variyari va ddeko ddoopatuleya ni ddeko shisha, variyari va ddeko ddaweellihiwa ni ddeko ddooripihiwa.

¹¹ Mwaahuddiheke Aisraele malamulo mattheene ayo kaavelleellilleemi oweella mwa Mose.”

¹² Mose aamulleella Aroni ni anaaye oohallaalle, Eleazara ni Itamara wi, “Kusani mukutho wa othu oyo ohanlle va mikutho ddawoosiwa viikho ddoovelleelliwa wa Apwiya nave muche woohikhalla ni yisiti vakhuviru ni nikuwa vawi yoolla tti woopatuleya wunchichi.

¹³ Muwuchelle vanipuroni noopatuleya kaambiiwa yoolla tti echigawaanyu ovenyera va mikutho ddawoosiwa viikho ddoovelleelliwa wa Apwiya wi okhalle waanyu, weyaano ni anaawo. Ddenndda tti nnddo Apwiya yakilamulalliiwa.

¹⁴ Koma ekhakadda yoovelleella mootukhullella muddullu ni mweto wamutulli woovelleelliwa, muddichelle vanipuroni noopatuleya weyaano ni anaawo aallopwana ni aatthiyaneene ayo eri ni weyaano. Ddenndda ddoovahiwa wa weyaano wi ddikhalle ddaawo ni anaawo ovenyera va mikutho ddeeyaattano nnddo ddivelleelliwe ni Aisraele.

¹⁵ Kasambara, ekhakadda ni mukutho wamakhura awoosiwa viikho odditukhullelle muddullu wi ekhalle yoovelleella yootukhullella muddullu vamiitthoni va Apwiya. Ddenndda ddikhalle ddaawo ni edduullu ddawo ddeellopwana wa enthawi yoohimalla moollikana ni mmo Apwiya yalamulelliiwa.”

¹⁶ Vano Mose ahaashaasha epuri yooheraatthella mukutho woopepesella machimo nave aphwanyille eyishellellihalle khalle. Vano ahaashella murima anaaye, Eleazara ni Itamara. Aallota wi,

¹⁷ “Kaambiiwa tini muhichenlleenyu mukutho woopepesella machimo vanipuroni noopatuleya? Tti waweella wunchichi nave Apwiya yahuuvahani wi muvenyihelleke machimo a Aisraele attheene, mweerelleke mutetho wawaapepesella machimo vamiitthoni va Apwiya.

¹⁸ Ekaamba yawi nikhame na epurinno khemwaavollowillena mu nipuro naweellesesa, mwaphwanenlle ochella ddenndda vanipuroni noopatuleya moollikana ni mmo kalamulalleemi.”

¹⁹ Nave Aroni aamulleella Mose wi, “Ngoonani, ollello athu aavelleella mukuthwiiwa woopepesella machimo ni mukuthwiiwa wooshellelliha vamiitthoni va Apwiya. Komave ddeko ddawoopiha ddawi ddiidda ddookeereyella miyaano. Vano kachilleke mukutho woopepesella machimo ollello, ethiyo Apwiya yaaweerohakallalla?”

²⁰ Mose iiwalleeye ddennddo, ahaakhullella.