Levitiko 1 - Mawu a Mulluku

Mukutho wooshellelliha

¹ Apwiya yaariiwa mu musasa wamutthukumano yaamwiithana Mose, emulleella wi

² allote ni Aisraele wi, “Arive muthu aawaaka wa Apwiya wi avelleelle mukutho, akuseke eng'ombe apaalle enkhosa apaalle epuri.

³ Mukutho wooshellellihooyo wakhalla wa eng'ombe, akhalleke nankhoro, oohirakalla. Aweekena va mullako wa musasa wamutthukumano wi Apwiya eyaakhelle.

⁴ Vano atthinddaanyere nnatta naye va muru wa eng'ombeeyo nave eneerowaakhelliwa wi ekhalle mukutho wooshellelliha woopepesella machimwaaye.

⁵ Vatulli viwa ayiiphe vamiitthoni va Apwiya nave anamwani a Aroni evelleelle nikhame na eng'ombenno voowiithani moowaapheella nikuwa nno niri va mullako wa musasa wamutthukumano.

⁶ Vano ayaatte eng'ombeeyo nave ayiphadde enthuli enthuli.

⁷ Vano anamwani a Aroni eviddeelle munllo vanikuwani nave ehelle ekhuni vamunllonimvo.

⁸ Anamwani a Aronaayo etthatte enthuli dda eng'ombeeyo, muru ni makhureene, va ekhuni ddiri vanikuwanimvo.

⁹ Koma muthooyo ahuwe marupo ni meto ddene. Nave mullupa mukutho ayishellellihe enama ettheeneeyo vanikuwani wi okhalle mukutho wooshellelliha, wawoosiwa viikho, wa nthuko nawaaddivella Apwiya.”

¹⁰ “Mukutho wooshellellihooyo wakhalla wa enkhosa apaalle epuri, akhalleke nankhoro oohirakalla.

¹¹ Nave ayiiphelle ompoto wa nikuwa vamiitthoni va Apwiya, vano anamwani a Aronaayo yiithe nikhame vanikuwanimvo moowaapheella.

¹² Vatulli viwa ayiphadde enthuli enthuli enameeyo. Allupa mukutho ekuse enthuli dda enameeyo, muru ni makhureene nave edditthatte ddittheddenennddo va ekhuni nnddo ddiri vanikuwani.

¹³ Koma muthooyo ahuwe marupo ni meto ddene. Nave mullupa mukuthooyo, ayishellellihe enama ettheeneeyo vanikuwani wi okhalle mukutho wooshellelliha, wawoosiwa viikho, wa nthuko nawaaddivella Apwiya.

¹⁴ “Mukutho wooshellellihooyo wakhalla wa epallame, nikhalleke nnddiya apaalle niwunda.

¹⁵ Mullupa mukutho awaana vanikuwani, ayiphadde muru mooyinyokotholla nave ashellellihe murooyo vanikuwani. Attannyihe epallameeyo vasirini va nikuwanno wi nikhame neetellelle vakhwipi va nikuwa.

¹⁶ Vano avenyihevo ethoogoro ni ddamuwari mwa ethoogoro nave edditathillelle vaddallani, wookhuma nndduwa wa nikuwanno.

¹⁷ Vatulli viwa ayitthalle variyari, nuuphello nimodda nngu, nimodda nngu koma woohivenyihavo muuphellwaayo. Nave eyishellellihe epallame ettheeneeyo vanikuwani wi okhalle mukutho wooshellelliha, wawoosiwa viikho, wa nthuko nawaaddivella Apwiya.”