Hoseya 9 - Mawu a Mulluku

Hoseya anallalleya ollakiwa wa Aisraele

¹ Nyu Aisraele muhihakallalle nave muhithapelle wonanko athu a mitundu ddimodda. Vawi mooraruwa omuhiya Mullukwaanyu. Mookonda emphaso wonanko hule voomuuputhellavo tirigu.

² Moomuputhella tirigu ni moovotellamo mpesa khedduukwakhwanellakani, vinyo musha aneerorama.

³ Khemukhallakattho mu ellapo ya Apwiya. Nyu Aefuremu, muneerohokollweella wuukaporoni o Iguputo. Muneerocha yoocha yooripihiwa mu ellapo ya Asiriya.

⁴ Wenko athu khewa evelleella mikutho dda ddoowirya wa Apwiya. Kheyaahakallallihattho ni mikutho ddiwa. Yoochiiwa enaakhalle wonanko yoocha ya vamalironi. Attheene ayo enaache yoocha yeeyo eneeroripihiwana. Yoocheeyo enaakhalle yoochella ettalla oohikhalla yawi ttuuvelleella wa Apwiya.

⁵ Ethiyo nllapo nootthoolleya na Apwiya, nllapo na ehakallallo, athu enaaweere tini?

⁶ Enthawi yoollakiwa yaphiya, alliwa yapallalleya, Aiguputo eneerewaatthukumaniha wi yaavitthe mu mahame o Memfisi. Ekhwiya ddineeromella va eziwiya ddasiliva. Mpa mwiwa muneeromella miiwa.

⁷ Enthawi yoollakiwa yoophiya, mallapo oohokolloselliwa ddoonanara ahaamorella. Vano eneerodduwella wi ddenndda tti ddawoona. Enallota wi, “Namallotelloolla tti ookarangeya, muthu eezeru dda wa Mullukoolla tti mullupaanepa!” Eneera ddiiddo kaambiiwa ddoolakwa ddiwa tti ddawaata nave wiitanana wiwa tti wuullupalli.

⁸ Namallotella sika owaachenjeza Aefuremu, athu a Mulluku. Koma namallotellooyo aamureya musampha mu ettilla ddaye ddittheddene nave adanaaye aamwiipitthella mu enyumba ya Mullukwaaye.

⁹ Athu enimananarave wonanko ddeereyelliiwa o Gibea. Sika ekaambiiwa Mulluku khawa atiwalla onanara wiwa nave aneerollaka machimwiiwa.

Ochimwa wa Israele ni ollakiwa waye

¹⁰ Apwiya enallota wi, “Israele koomuphwanya wonanko mpesa wamuchipululuni. Makhollwaaye kahaahakallallella wonanko namukuyu awaamba wiithwa. Koma alliwa yaaya o Peori nave wenko yahiivelleella wa Baala. Sika yaatthattuwa ello yoonanara wonanko nifano yanikondiiwanne.

¹¹ Ntitimiho Aefuremu eriiwana nineerovava wonanko epallame. Khewa yaayarattho anamwani, awariwa khewa ekhalla ni erukullu nave khewa erupalla.

¹² Naari erimaayara anamwani kineerowoononga, khekhallana naari mmodda. Eneerokhalla ni otulli kaahiya.

¹³ “Nyu Apwiya mmo kinoonelleemi, anamwani a Aefuremu eneerokhalla wonanko enama ddoottakhuniwa. Aefuremu eneerewaahoollella aniiwa okhotoni nko eneeriiwa yiiphiwe.

¹⁴ Mwaavahe, nyu Apwiya, munaawaavahe tini? Mwaavahe erukullu yoonyingalla nihaka khalle ni mapelle awumma.”

Apwiya anamweeruza Israele

¹⁵ Apwiya enallota wi, “Onanara wiwa otthewene waambeelle o Giligala. Kaambeelle wiitanana wenko. Kineerowiikariha mwiillaponi mwaka kaambiiwa makhallellwiiwa tti oonanara. Ngiwa kaakondattho, oohoollelliiwa attheene aakiwukila.

¹⁶ Efuremu ari wonanko muteekho woophaddiwa oyo misisi ddiwa ddummalle nave khowa wimma ezipaso. Naari athwaayo yaayare anamwani, kineerowiipha aniiwa ookondiwaayo.”

Namallotella anallota dda Israele

¹⁷ “Mullukwaaka aneerewaakhoota athwaaye vawi kheyaamwiiwellelle. Eneerokhalla oothawathawa variyari va mitundu ddimodda.”