Hoseya 8 - Mawu a Mulluku

Aisraele enaakhoota Apwiya

¹ Apwiya enallota wi, “Ipani nipallapata! Adani aatthukumanella enyumba ya Apwiya wonanko mipungu va enama yookhwa. Athu aatathilla echipanganwaaka nave aachimwella malamulwaaka.

² Enninllella wa miyaano wi ‘Hi Aisraele ninnuudduwellani nyu Mullukwaahu.’

³ Koma Aisraele aakhoota ddaphaama. Sika ekaambiiwa adaniiwa enaawiikarihiiwa.

⁴ Enniitthoollella mwene moohithwara opaalla waka. Enniikeraatthihella oohoollelliiwa kihiwaakhullelle. Ahiipangella mafano asiliva ni agolide koma aaddoonongana.

⁵ Nifano na musaanaang'ombe nno a o Samariya enallapelliiwa ninnakinanara. Vano owallaaka wohaakharella wunchichi athwaayo. Vinaavire enthawi yoorekama mwawiidde athu a o Israele wi yeelle?

⁶ Nifanonno khe Mulluku, anipangille tti muthu eeruso a o Israele. Nifano na o Samariyanna nineeronyenyeya.

⁷ Aisraele ennamidda ephevo nave enamuhata namangalle. Tirigu khanna makalla, khakhalla ni yoocha. Akhanllekena, alleto sika yaache yoocheeyo.

⁸ Aisraele aamiryiwa, aatthattuwa wonanko nikattuphe variyari va mitundu ddimodda.

⁹ Yaathawella o Asiriya wonanko embizi yaweeta shisha. Aefuremu yahaallivella athu a mitundu ddimodda wi yaakavihere.

¹⁰ Ekaamba yawi yahiiwanana ni mitundu ddimodda kineerewaatthukumaniha wi kiwoononge. Naanweene vaava eneerohoowa wunchichi ekaamba ya olamulello wa mwene a o Asiriya.

¹¹ “Aefuremu yahoonjera makuwa oovenyihellavo machimo koma makuwaayo yaatthattuwa mapuro oochimwellavo.

¹² Kahaalembella malamulo manchichi koma khenaapwatha, enaweesa eelleto.

¹³ Ennavelleella mikutho dda enama wa miyaano enattakhuna enama yamukuthweeyo koma mi Apwiya nginahakallallana naari vang'ono. Ngiwa kitiwalla onanara wiwa nave kineerewaallaka machimwiiwa. Kineerewaahokollosella wuukaporoni o Iguputo.

¹⁴ “Aisraele ahiimakella enyumba dduullupalli omutiwalla owaaphatusiiwa. Ayuda ahoonjerera mizinda ddampanda. Koma miyaano kineerewoosa mizindannddo nave munllooyo oneerohella enyumba ddiwa dduullupallinnddo.”