Hoseya 7 - Mawu a Mulluku

¹ Kaawaachirihaka Aisraele, ochimwa wiwa onnooneyella vaweella nave mitteko ddoonanara dda Asamariya khaddivittheya. Ennaalleka athu, enninttaka enyumba monga allupaawiiya, ennaakha ddeko dda athu vaweella monga anamasikita.

² Koma khenaganiza wi kinnuupuwella mitteko ddiwa ddoonanara. Ddoolakwa ddiwa ddohaahuruwella nave kheddinavenyamo m'mwiitthoni mwaka.

Wiiphiwa athu a o enyumba yoomwene

³ Apwiya enallota wi, “Athu ennamukopa mwene ni mitteko ddiwa ddoonanara nave ennaddilleka enduna ddaye ni ddawoottha ddiwa.

⁴ Attheenaayo tti oohiroromelleya wiita wiwa tti wookhara wonanko munllo wa mu ufuni oyo oomwaapeya buledi ahinattettheereeye waambeella ovillika mitthi dda buledi ophiyera buledooyo afufumalle.

⁵ Va nllapo na ehakallallo ya mwene, enduna ddaye ddinnalezela, mwenooyo annavollowana mu mulloko wa athu oonanara.

⁶ Mirima ddiwa ddinnaviha wonanko ufuni ekaamba ya onanara wiwa. Mahiiyu mattheene owalliiwa onnathuwa. Nave ohinase onnakhara wonanko munllo.

⁷ Attheene ennaviha wonanko ufuni nave ennawiipha owaalamulelliiwa. Mamweniiwa mattheene aamora koma khaavo naari mmodda anninllella wa miyaano.”

Israele ni mitundu ddimodda

⁸ Apwiya enallota wi, “Aefuremu tti wonanko keke awiithwa embali emodda ekaamba yawi ennattakanyiherana ni athu a mitundu ddimodda.

⁹ Alletwaayo ennaamalliha masiva koma alliwa khenadduwella. Ahaamba omella embwi koma alliwa khenadduwella.

¹⁰ Aisraele ennavaanyihiwa ni wiitukhulla wiwa. Koma va ddittheddenenndda khenahokollweella wa Apwiya Mullukwiiwa, khenawaashaasha.

¹¹ Aefuremu tti wonanko ekhunda yookarangeya, yoohikhalla ni ezeru. Ennawiithana Aiguputo, ennaveka nikavihero wa Asiriya.

¹² Orive weko enaayeekiiwaawo kineerewaareya nthavi. Kineerewaamoriha wonanko epallame ddoovava. Kineerewaallaka ekaamba ya ddoolakwa ddiwa.

¹³ Otulli okhalle ni alliwa ekaamba yawi aakihiya. Yoonongeye ekaamba yawi aakiwukila. Kaanapaalla wi kaavulluse koma ennallota ddawoottha wa miyaano.

¹⁴ Winllella wiwa wa miyaano tti wawoottha. Enniirema wonanko athu oohimudduwella Mulluku ekaamba yoopaalla yoocha ni yoowirya koma ennakiwukila.

¹⁵ Naari kaalleellaka ni waallipiha enniiwanana okeerella ddoonanara.

¹⁶ Ennarukunuwella wa mulluku oohikhalla ni mutteko woohikhalla wa Mulluku ookhwaranya ddittheddene. Tti wonanko muura woollova. Owaahoollelliiwa eneerewiiphiwa ni nsupada ekaamba yawi ennakillotella ddeepewe. Sika a o Iguputo eneerewaattheya wunchichi.”