Hoseya 6 - Mawu a Mulluku

¹ “Hankoni nihokollweelle wa Apwiya, aanikhaddulla koma eneeronichiriha. Aaniphoriiha koma eneeromaka makhwataahu

² Vamalla mallapo meelli eneeronihihimulla. Va nllapo naneeraru eneeronivenyiha wi nikhalle ni okumi vamiitthoni viwa.

³ Hankoni nillipihelle waadduwella Apwiya. Eneeronihokollweella wonanko waayaaka ni osa, owa wiwa onaakhalle madaliso wonanko murimu, murimwiine ntthokollapallaka oyo anoollowiha ethaya.

⁴ Koma Apwiya enallota wi, ‘Nyu Aefuremu, kiweereni tini? Nave nyu Ayuda, kiweereni tini? Echikondaanyu ennathiima wonanko ethapo yoohinase, tti wonanko nikame noohillekella wumma.

⁵ Sika ekaambiiwa kuuphanddemini oweella mwa anamallotella, kiwiiphalleemini ni mawaaka. Okamulla waka tti wawooneya wonanko owala wa nndduwa.

⁶ Vawi kinapaalla echikondi yoohisintheya ohiri mukuthove. Kinapaalla wi athu ekidduwelle miyaano Mulluku, ohiri mukuthove wooshellelliha.

⁷ Koma athwaayo aatathilla echipanganwaaka wonanko mmo eerelle Adamu. Sika yaakeerella ddoohiroromelleya.

⁸ Giliyadi tti muzinda wa athu oonanara, enniiphanana.

⁹ Monga mmo allupaawiiya enamwiipitthelliiwa muthu tti mmo allupa mukutho enatthukumanelliiwa wi ewiipheke athu va ettilla yooya o Shekemu. Ddawoona ennawiipha athu.

¹⁰ Variyari va Aisraele kohoonavo ello yoonanara. Aefuremu yaanararuwa, Aisraele yahiiripiha.

¹¹ Nyuttho Ayuda, muneerohata ollaka. Kaawaahokollosellaka ddaphaama athwaaka.’ ”